राष्ट्रकविको रथारोहण

नेपाली सेना र प्रहरीको ब्यान्ड बाजाले पछ्याउँदा माला पहिरिएर बग्गीमा विराजमान दुवै जनाको मुहार उज्यालो देखिन्थ्यो ।

२०६ औं भानुजयन्तीको अवसर पारेर नेपाल प्रज्ञा प्रतिष्ठान र भानु प्रतिष्ठानले राष्ट्रकवि घिमिरेको रथारोहणसँगै प्रभातफेरी गरेका हुन् । विभिन्न स्कुलका विद्यार्थीको सांस्कृतिक झाँकीसहितको रथारोहण र प्रभातफेरी सहरका विभिन्न थलो परिक्रमा गर्दै कमलादीस्थित प्रज्ञा भवन पुगेपछि राष्ट्रकवि घिमिरेलाई उनकै कद बराबरको ताम्रपत्रसहित अभिनन्दन गरियो ।

अभिनन्दनपछि घिमिरेले भानुलाई सम्झे । उनले भानुजयन्ती मनाउने परम्परा भारतको दार्जिलिङबाट सुरुवात भएको रोचक तथ्य स्मरण गर्दै संसारभर फैलिएका नेपालीको मनमुटु जोड्ने प्रतीकका रूपमा भानुलाई लिन सकिने बताए ।

म्यान्मारबाट आएका स्रष्टा ओम बगाले थापाले नेपाली भाषा नरहे नेपाली जाति, संस्कृति र संस्कार नरहने, आफूहरूले विदेशमा बसेर पनि भाषा जगेर्नाका लागि काम गरिरहेको जनाए ।