विद्युत् चुहावट गर्नेलाई जरिवाना

कान्तिपुर संवाददाता

भक्तपुर — नेपाल विद्युत् प्राधिकरण भक्तपुर वितरण केन्द्रले जिल्लाका विभिन्न स्थानमा विद्युत् चोरी गर्ने २ सय ३३ उपभोक्तालाई कारबाही गरेको छ ।

चालु आर्थिक वर्षको करिब ६ महिनामा विद्युत् चोरी गर्ने २ सय ३३ उपभोक्तालाई कारबाही गरी ७५ लाख ९५ हजार ४ सय ९४ रुपैयाँ राजस्व संकलन गरेको केन्द्र प्रमुख प्रज्ज्वलमान श्रेष्ठले बताए । चालु आर्थिक वर्षको पुस २३ सम्ममा ३४, मंसिरमा ४९, कात्तिकमा २९, असोजमा ३९, भदौमा ३३ र साउनमा ४९ उपभोक्ता विद्युत् चुहावटको कारबाहीमा परेका छन् ।

Citizen


विद्युत् चुहावट नियन्त्रणलाई कडाइ गर्न प्राधिकरणले दैनिक विशेष र छडके अनुगमन टोली खटाउँदै आएको जनाएको छ । ‘चुहावट बढी भएको क्षेत्र हेरी डेढ वर्षदेखि दैनिक दुई टोली अनुगमनका लागि पठाएका छौं,’ उनले भने, ‘विद्युत् चोरी गर्न प्रयोग गरेको सामग्रीसहित नियन्त्रणमा लिई कारबाही गर्ने गरेका छौं ।’ चोरीमा संलग्न आफैं आएर आवश्यक जरिवाना तिर्ने गरेको प्राधिकरणले जनाएको छ ।

प्राधिकरणका अनुसार गत आर्थिक वर्ष ०७४/७५ मा विद्युत् चुहावट गर्ने ३ सय ६८ उपभोक्ता कारबाहीमा परेका थिए । कारबाहीमा परेका उपभोक्ताबाट १ करोड १७ लाख ७४ हजार ६ सय ४४ रुपैयाँ राजस्व संकलन भएको नेपाल विद्युत् प्राधिकरण भक्तपुर वितरण केन्द्रले जनाएको छ ।

मुलुकमै बढी विद्युत् चोरी हुने जिल्लामा पर्ने भक्तपुरमा चुहावट नियन्त्रण गर्न केन्द्रले जिल्लामा कार्ययोजना निर्माण गरी विद्युत् चुहावट नियन्त्रण अभियान सञ्चालन गरेको छ । प्राधिकरणका अनुसार केही वर्ष अघिसम्म ६५ प्रतिशतसम्म विद्युत् चुहावट हुँदै आएको भक्तपुरमा सोमबार सम्ममा भने विद्युत् चुहावट १३ दशमलव ७२ प्रतिशतमा झार्न सफल भएको छ ।

चुहावट नियन्त्रणका लागि पोस्टर, पम्प्लेट टाँस्ने, प्रचारप्रसार गर्ने, नगरमा कति विद्युत् खपत भइरहेको छ त्यसको जानकारीका लागि प्रत्येक फिडरका बस्ती/बस्तीमा विद्युत् खपत देखाउने मेसिन जडान गरी मापन गर्ने कार्य गरी विद्युत् चुहावट न्यूनीकरण अभियान थालिएको प्राधिकरणले जनाएको छ ।

विद्युत् चुहावट बढी देखिनुमा बन्द मिटरको प्रभाव भएको प्राधिकरणले जनाएको छ । पुरानो इलेक्ट्रो मेकानिकल मिटरहरू धेरै मात्रामा बन्द भएको र फेर्ने कार्य भइरहेको श्रेष्ठले बताए ।

प्रकाशित : पुस २६, २०७५ ०७:५८
प्रतिक्रिया
पठाउनुहोस्

गुम्बा पुनर्निर्माण भएन

कान्तिपुर संवाददाता

काठमाडौँ — भूकम्पको ३ वर्ष बढी बितिसक्दा पनि क्षतिग्रस्त गुम्बा पुनर्निर्माण हुन नसकेको भन्दै सरोकारवालाले राज्यको ध्यान आकर्षण गराएका छन् ।

बौद्ध फूलबारीस्थित ठरिग गुम्बा स्थापनाको ५० औं वसन्त पार गरेको अवसरमा आयोजित समारोहमा बौद्ध धर्मावलम्बीले पुरातात्त्विक महत्त्वका गुम्बाको अस्तित्व मेट्न सक्ने खतरा बढेको भन्दै चिन्ता व्यक्त गरेका हुन् ।

बौद्ध दर्शन प्रवद्र्धन तथा गुम्बा विकास समितिका कार्यकारी निर्देशक नरेन्द्र गुरुङले मुलुक बहुभाषी, बहुजातीय, बहुधार्मिक भएको र यहाँ विभिन्न थरीका ४५ सय गुम्बा तथा विहार रहेको बताए । ‘०७२ को भूकम्पले १ हजार ३ सय २० गुम्बामा क्षति पुगेको छ,’ उनले भने, ‘हालसम्म ती गुम्बाको पुनर्निर्माण हुन सकेको छैन ।’ उनले राष्ट्रिय पुनर्निर्माण प्राधिकरणले क्षतिग्रस्त गुम्बाको निर्माण गर्न ५० प्रतिशत रकम प्रदान गर्ने निर्णय गरे पनि समस्या उस्तै रहेको बताए ।

‘यसले बुद्ध जन्मस्थल मुलुक घुम्न आउनेको संख्या घट्न सक्छ,’ उनले भने, ‘यसले राज्यको अर्थतन्त्रमा नराम्रो असर पर्न सक्छ ।’
समारोहमा शाक्य गुरु ट्रिन्जेन रत्नबज्र रेम्पोर्छेको आत्मकथा ‘द मेलोडी अफ धर्म’ नामक पुस्तकको लोकार्पण भएको छ । ठरिग गुम्बामा पुर्‍याएको योगदान कदर गर्दै बौद्ध धर्मगुरु र बौद्धका स्थानीय सूर्यबज्र लामा सम्मानित भएका छन् ।

रत्नबज्र रेम्पोर्छेको दर्शन गर्न भारत, ताइवान, मलेसियाबाट बौद्ध धर्मावलम्बी उपस्थित रहेको आयोजकले जनाएको छ । रेम्पोर्छेले भक्तजनलाई अभिषेक (वाङ) दिएर दीर्घायुको कामना गरेका थिए । बौद्धका प्रदेश सभा सांसदछिरिङदोर्जे लामाले राज्यले नामको पछाडि लामा लेख्ने नागरिकलाई फरक धारले हेर्ने गरेको बताए ।

उनले ठरिग गुम्बाले ५० वर्षमा समाज, राष्ट्र र बौद्ध धर्ममाथि पुर्‍याएको योगदानको कदर व्यक्त गरे । बौद्ध धर्मका छैटौं गुरु टुल्कु ठरिग रेम्पोर्छेले ०२५ मा ठरिग गुम्बा स्थापना गरेका हुन् ।

प्रकाशित : पुस २६, २०७५ ०७:५७
पूरा पढ्नुहोस्
प्रतिक्रिया
पठाउनुहोस्