विवेकशील साझाले भन्यो, 'थापाले नयाँ दल दर्ताको प्रक्रिया प्रारम्भ गर्नु दुःखद'

कान्तिपुर संवाददाता

काठमाडौँ — विवेकशील साझा पार्टीले संयोजक उज्ज्वल थापाले नयाँ दल दर्ताको प्रक्रिया प्रारम्भ गर्नु दुखद् अवस्था भएको बताएको छ ।प्रवक्ता सूर्यराज आचार्य शुक्रबार साँझ विज्ञप्ति जारी गर्दै पार्टीमा रहेका मतभिन्नताहरुलाई सम्बोधन गर्न बोलाइएको केन्द्रीय समिति बैठकमा सहभागी नभई संयोजक थापाले नयाँ दल दर्ता प्रक्रिया थाल्नुले आश्चर्यचकित पारेको बताएका छन् ।

'हामीलाई आशा एवं विश्वास थियो, आगामी बैठकमा संयोजक थापालगायत केन्द्रीय सदस्यले आफ्ना भनाइ राख्नुहुनेछ, केही असन्तुष्टि रहेका भए छलफल गर्नुहुनेछ र पार्टीलाई गतिशील र एकताबद्ध गर्न मद्दत गर्नुहुनेछ' विज्ञप्तिमा भनिएको छ, 'तर संयोजक थापा स्वयंले आसन्न बैठकमा सहभागी समेत नभई नयाँ दल दर्ताको प्रक्रिया प्रारम्भ गर्नु दुःखद अवस्था हो ।' उनका अनुसार पार्टी केन्द्रीय समिति बैठक पुस ३० गतेलाई बोलाएको छ ।

पार्टी नेतृत्वप्रति असन्तुष्ट थापा समूहका १६ केन्द्रीय सदस्यले शुक्रबार निर्वाचन आयोगमा दल दर्ताको निवेदन दिएका छन् । पार्टीका केही नेताहरु बाहिरिएपछि प्रवक्ता शर्माले वैकल्पिक पार्टी निर्माणको पवित्र उद्देश्यलाई घात भएको भन्दै प्रवक्ता आचार्यले पार्टी निर्माणमा लामो समयदेखि क्रियाशिल युवा र मतदाताप्रति पनि अन्याय भएको टिप्पणी गरेका छन् । थापा समूहले वैकिल्पक पार्टी निर्माणको अभियानमा पुर्‍याएको आघात र धोकापूर्ण कार्यको इतिहासले मूल्यांकन गर्नेसमेत विज्ञप्तिमा उल्लेख गरिएको छ।

प्रवक्ता आचार्यले विवेकशील साझा पार्टीका सबै प्रदेश तथा जिल्ला संयोजकहरू आ–आफ्नै जिम्मेवारीमा यथावत क्रियाशील रहेको प्रस्ट्याएका छन् । उनले आगामी बैठकले पार्टीको राजनीतिक तथा सांगठनीक अवस्थाको समग्र समीक्षा गर्नुका साथै केन्द्रीय समिति विस्तार गरी आगामी कार्ययोजना र रणनीति तयार गरेर अगाडि बढ्ने विश्वास दिलाएका छन् । उनले पार्टीको पछिल्लो विकसित घटनाक्रमबाट कत्ति पनि विचलित नभई जिम्मेवारीप्रति सचेत रहने विश्वासमेत व्यक्त गरेका छन् ।

प्रकाशित : पुस २७, २०७५ २०:०४
ADVERTISEMENT
प्रतिक्रिया
पठाउनुहोस्
ADVERTISEMENT

सार्वजनिक शिक्षाको झन्डा माथि उठ्ने छ : शिक्षामन्त्री

कान्तिपुर संवाददाता

काठमाडौँ — शिक्षा, विज्ञान तथा प्रविधि मन्त्री गिरिराजमणि पोखरेलले संघीय संरचनाअनुकूलको नीति तय गर्न बनेको उच्चस्तरीय राष्ट्रिय शिक्षा आयोगले सार्वजनिक शिक्षालाई प्रमुख प्राथमिकतामा राखेको बताएका छन् ।

‘सात दशकको सशस्त्र संघर्षपछि २०७२ सालमा संघीय संविधान बनेको छ,’ संविधान सहमतिको साझा दस्तावेज भएको उल्लेख गर्दै मन्त्री पोखरेलले भने, ‘संविधानअनुकूल गठन भएको शिक्षा आयोगले सार्वजनिक शिक्षाको पीडादायी कोणबाट मस्यौदा तयार गरेको छ । अब सार्वजनिक शिक्षाको झन्डा माथि उठाइने छ ।’

मन्त्री पोखरेलले शिक्षा मन्त्रालयका सचिव खगराज बरालद्वारा लिखित ‘सिकाउने शैली’ नामक पुस्तक सार्वजनिक गर्दै शुक्रबार उक्त विचार व्यक्त गरेका हुन् । ‘सार्वजनिक शिक्षा कमजोर हुनुमा हाम्रो कमजोरी छ,’ शिक्षालयको गुणस्तर ह्रास हुनुको महत्वपूर्ण पक्ष सिकाइसँग जोडिएको उल्लेख गर्दै मन्त्री पोखरेलले भने, ‘गुणात्मक शिक्षाको अवयव सुधार्न नयाँ दिशातर्फ जाँदैछौं । अब प्रत्येक अभिभावकलाई स्वतन्त्र ढंगले सार्वजनिक शिक्षालाई छनोट गर्ने अवसर पाउने छन् ।’ मन्त्री पोखरेलको अध्यक्षतामा गत असारमा गठित आयोगले यसै महिना प्रधानमन्त्री केपी ओलीलाई प्रतिवेदन बुझाउनेसमेत उनले जनाए ।

शिक्षा सचिव बरालको शिक्षासम्बन्धी प्रकाशित आठौं कृति हो । बरालका यसबाहेक तीनवटा साहित्यिक कृति तथा गीतिएल्बम प्रकाशित छन् । लेखक बरालले अनुभव तथा अनुभूतिलाई ३१ शीर्षकमा प्रस्तुत गरेका छन् । सार्वजनिक गरिएका ‘विद्यालयको शिक्षकदेखि शिक्षा मन्त्रालयका सचिवसम्म बन्न सफल लेखक साना साना संवेदनशील विषयलाई सरल शैलीमा प्रस्तुत गरेका छन्,’ पुस्तकबारे बोल्दै साहित्यकार मोमिला जोशीले भनिन्, ‘यो पुस्तकले शिक्षाको उज्यालोलाई अँध्यारो पाटोबाट चियाएको छ ।’

पुस्तकबारे बोल्दै पूर्वराजदूत जयराज आचार्य लेखकले मिहिनेतपूर्वक मुलुकको शिक्षालाई प्रतिवद्ध भएर संस्मरणात्मक ढंगले केलाएको बताए । त्यसैगरी योजना आयोगका सदस्य उषा झाले पुस्तकको प्रत्येक शीर्षकमा सिकाउने शैली आफ्नो भोगाइबाट प्रस्तुत गरिएको बताइन् । ‘सही व्यक्ति सही ठाउँमा हुनु र विषयवस्तुलाई सुक्ष्म ढंगले केलाएर सरल शैलीमा प्रस्तुत भएको छ,’ उनले भनिन् ।

प्रकाशित : पुस २७, २०७५ १९:२४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT