निर्मला हत्या प्रकरण : राहत बुझ्ने विषयमा परिवारमै विवाद

भवानी भट्ट

(कञ्चनपुर) — निर्मला पन्त घटनामा सरकारले घोषणा गरेको राहत बुझ्ने विषयमा पीडित परिवारबीच विवाद भएको छ । निर्मलाकी आमा दुर्गादेवीले डीएनए परीक्षणका लागि रगतको नमुना दिनुका साथै राहत बुझ्ने तयारी गरेपछि विवाद भएको हो । 

निर्मलाका बुवा यज्ञराजले रगत किन दिएको भन्दै बिहीबार बिहान दुर्गादेवीमाथि हातपात नै गरे । उनले घाँटी च्यापेर मारिदिने धम्कीसमेत दिएको दुर्गादेवीले बताइन् । ‘मलाई नसोधी डीएनए चेक गर्न किन रगत दिएको भन्दै हातपात गरे,’ बिहीबार महिला अधिकारकर्मीसँगको छलफलमा दुर्गादेवीले भनिन्, ‘अहिले राहत पनि बुझ्न पाइँदैन भन्दै घरभित्रका भाँडाकुँडा सबै फोडिदिए ।’

निर्मलाको शरीरबाट लिइएको भेजाइनल स्वाब वास्तविक भए/नभएको शंका उठेपछि यकिन गर्न आमा दुर्गादेवीले बुधबार रगतको नमुना दिएकी थिइन् । उनले जिल्ला प्रहरी कार्यालयमै निवेदन दिएर वास्तविकता पत्ता लगाउन नमुना संकलनको माग गरेकी हुन् । सोही दिन उनले राहत पनि बुझ्ने बताएकी थिइन् । प्रहरीले यज्ञराजसँग पनि नमुनाका लागि आग्रह गरेको थियो । तर उनले रगत दिन अस्वीकार गरेपछि दुर्गादेवीले एक्लै रगतको नमुना दिएकी हुन् ।

बिहीबार बिहानै घरमा पुगेर यज्ञराजले कुटपिटसँगै राहत बुझ्न नपाइने बताएको उनले बताइन् । निर्मला घटनापछि भीमदत्त नगरपालिकाले ३ लाख, सुदूरपश्चिम प्रदेशले ५ लाख र संघीय सरकारले १० लाख राहत दिने घोषणा गरेका थिए । पीडित परिवारले न्याय नपाएसम्म उक्त राहत नबुझ्ने अडान लिँदै आएका थिए ।

निर्मलाकी कान्छी आमा लक्ष्मीले फागुनसम्म राहत नबुझ्न भन्दै श्रीमानले आग्रह गरेको बताइन् । उनले निर्मलाको न्यायका लागि २ महिनादेखि धर्ना जारी रहेकै बेला डा. गोविन्द केसीले पनि अनशन सुरु गरेकाले तत्काल राहत बुझे ठीक नहुने बताइन् । ‘फागुनसम्म केही न केही निकास आउँछ भन्ने हाम्रो आशा हो,’ लक्ष्मीले भनिन्, ‘त्यतिबेलासम्म केही नभए त्यसपछि बुझौंला ।’

दुर्गादेवीले पनि आफूमाथि आक्रमण नभए फागुनमै राहत बुझ्न तयार रहेको बताइन् । उनले रगत दिएको भन्दै यातना दिने काम भएकाले अब त्यस्तो हुन नहुने बताइन् । यज्ञराजले आँगनमै झुन्डिएर आत्महत्या गर्ने धम्कीसमेत दिएको उनले बताइन् । स्थानीयका अनुसार दुर्गादेवी र लक्ष्मीबीच राहत रकम बाँडफाँटका विषयमा पनि मतभेद बढदै गएको देखिन्छ ।

प्रकाशित : पुस २७, २०७५ २१:१७
ADVERTISEMENT
प्रतिक्रिया
पठाउनुहोस्

‘नेपाली सबैभन्दा मिहिनेती’

घनश्याम खडका, नारायण खड्का

(अस्ट्रेलिया) — अस्ट्रेलियाको नेपाल मामिलासम्बन्धी जानकार एक मन्त्रीले आप्रवासीमध्ये नेपाली सबैभन्दा मिहिनेती रहेको बताएकी छन् ।

‘मिहिनेत र मिजासका हिसाबले नेपाली आदर्श आप्रवासी हुन्,’ दक्षिण अस्ट्रेलियाको प्रिमियरका लागि सहायकमन्त्री जिङ लीले कान्तिपुरसँगको कुराकानीमा भनिन्, ‘रोजगारीको प्रतिशत र अंग्रेजी भाषामाथिको पकड पनि अन्य देशका आप्रवासीको तुलनामा नेपालीको उच्च छ ।’

हालैको तथ्यांकअनुसार आप्रवासीमध्ये अस्ट्रेलियामा चिनियाँ र भारतीयपछि ठूलो संख्यामा नेपाली छन् । आँकडाअनुसार नेपालीले सामाजिक सुरक्षा भत्ताको कम उपयोग गरेको लीले बताइन् । मुख्य मन्त्रीपछिको शक्तिशाली पदमा पुगेकी ली दक्षिण अस्ट्रेलिया राज्यको प्रभावशाली नेत्री हुन् । आप्रवासीमा उनको राम्रो पकड छ । नेपाली समुदायप्रति उनको विशेष झुकाव देखिन्छ ।

‘मलाई नेपालीहरू मन पर्छन्, नेपालको सुन्दरताको म कदर गर्छु,’ दक्षिण अस्ट्रेलियाको संसद् भवनस्थित बैठक कक्षमा उनले भनिन्, ‘पछिल्लो समय क्रिकेटसँग पनि दुई देश जोडिन पुगेकामा खुसी लागेको छ ।’ सार्वजनिक रूपमा आफ्नो कलासंस्कृति मनाउने नेपाली शैलीको समेत उनी प्रशंसक हुन् । ‘हामी अस्ट्रेलियालाई बहुसांस्कृतिक देश भनेर संसारमा चिनाउन चाहन्छौं,’ उनी भन्छिन्, ‘यो अभियानमा हामीलाई नेपाली मित्रहरूले राम्रोसँग सघाउनुभएको छ ।’

पछिल्लो समय उनी अस्ट्रेलियाका व्यवसायीलाई नेपालमा लगानी गर्ने वातावरण मिलाउन लागिपरेकी छन् । उनी डेढ वर्षअघि व्यापारी र राजनीतिज्ञको १५ सदस्यीय टोलीको नेतृत्व गर्दै काठमाडौं आएकी थिइन् । त्यतिबेला प्रधानमन्त्री पुष्पकमल दाहालसँग औपचारिक भेट वार्ता गरी अस्ट्रेलिया र नेपालका दुई सहरबीच भगिनी सम्बन्ध स्थापित गर्ने सहमति भएको थियो । ‘म त्यही प्रयासमा छु,’ उनले भनिन्, ‘हामी दुई सहरको पहिचान गर्न र एकअर्काबीच प्राविधिक, सांस्कृतिक, पर्यटकीय सम्बन्धको आदानप्रदान गर्न सक्छौं ।’

उनी अस्ट्रेलियास्थित नेपाली क्रिकेट एसोसिएसन (एन्का) को सदभावना दूत बनेकी छन् । उक्त संस्थाले आयोजना गर्ने हरेक कार्यक्रममा पुग्छिन् । त्यति मात्र नभएर नेपालबाट आएका अभिभावकलाई समय निकालेर भेटछिन्, संसद् भवनको भ्रमण गराउँछिन् र यहाँको राजनीतिक पद्धतिबारे जानकारीसमेत दिन्छिन् ।

प्रकाशित : पुस २७, २०७५ २१:१६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT