खोप लगाएपछि बालकको मृत्यु

कान्तिपुर संवाददाता

टीकापुर — कैलालीको लम्कीचुहा नगरपालिका १, भुरुवाका ६ महिनाका विनोद आलेमगरको खोप लगाएकै दिन मृत्यु भएको छ । आइतबार दिउँसो १२ बजेतिर खोप लगाएको र राति मृत्यु भएको बालकका जेठाबुबा प्रेमबहादुर आलेमगरले बताए ।

स्वास्थ्य चौकीको नियमित खोप कार्यक्रमअन्तर्गत उनलाई खोप लगाइएको हो ।

उनले भने, ‘खोप लगाउनुअघि बालक केही समस्या थिएन । दिउँसो १२ बजेतिर खोप लगायौँ । राति बालक रोएको रोयै गर्‍यो । खोप लगाएको दुखेर होला भन्ने भयो । राति नै मृत्यु भयो । मृतकको टीकापुर अस्पतालमा पोस्टमार्टम गरिएको छ ।

टीकापुर अस्पतालका डा. नवराज शर्माले बालकको मृत्यु खोप लगाएकै कारण हो भनेर अहिल्यै भन्न नसकिने बताए । उनले पोस्टमार्टम रिपोर्टको अध्ययनपछि मात्र थाहा हुन सक्ने जनाए ।

उनीसँगै खोप लगाएका ३ महिनाकी मिहिका चौधरी र २ महिनाकी दीपिका चौधरी पनि टीकापुर अस्पतालमा भर्ना गरिएका छन् । उनीहरूको शरीरमा राता दाना देखिएका छन् ।

यसअघि गत पुसमा पनि कैलालीकै जानकी गाउँपालिका ४, कञ्चनपुरका १५ महिने चरण चौधरीको दादुरा खोप लगाएको दिन मृत्यु भएको थियो । गाउँमा सञ्चालन भएको नियमित खोप कार्यक्रमअन्तर्गत खोप लगाएको १५ मिनेटमै बालक बेहोस भएका थिए । टीकापुर अस्पतालसम्म ल्याउँदा बच्चाको मृत्यु भइसकेको थियो ।

प्रकाशित : माघ २१, २०७५ १८:२१
ADVERTISEMENT
प्रतिक्रिया
पठाउनुहोस्
ADVERTISEMENT

कथा प्रतियोगितामा प्रथम हुनेलाई १ लाख

कान्तिपुर संवाददाता

काठमाडौँ — बाह्रखरी बुक्सले देशव्यापी आधुनिक कथा लेखन प्रतियोगिताको घोषणा गरेको छ । प्रकाशन संस्थाले सोमबार काठमाडौंमा पत्रकार सम्मेलन आयोजना गरी प्रतियोगिताको विजेतालाई १ लाख रुपैयाँ नगद पुरस्कार दिने बताएको छ ।

स्थापितदेखि नवप्रतिभासम्मले भाग लिन पाउने प्रतियोगितामा दोस्रो हुनेलाई ६० र तेस्रो हुनेले ४० हजार रुपैयाँका साथ प्रमाणपत्र पाउनेछन् ।

बाह्रखरी बुक्सका सम्पादक राजेन्द्र पराजुलीले कथा विधा साहित्यमा निकै महत्वपूर्ण भएपनि यसले धेरै महत्व नपाएको र नवप्रतिभाले पहिचान बनाउने धेरै माध्यमहरु नभएकाले यो प्रतियोगिता आयोजना गर्न लागिएको बताए ।

‘ट्यालेन्ट हन्ट’को शैलीमा गरिने बताइएको प्रतियोगिताको अन्तिम २५ मा पुग्न सफल कथाहरुलाई कथा संग्रहका रुपमा प्रकाशित गरिने बुक्सद्वारा जारी वक्तव्यमा उल्लेख गरिएको छ ।

यो संग्रहमा पहिलो, दोस्रो र तेस्रोबाहेक संग्रहमा प्रकाशित हुने अन्य कथाकारलाई जनही ५ हजार पारिश्रमिक दिइने छ । फागुन २० गतेभित्र कथा पठाउने समय तोकिएको छ भने २०७६ वैशाख ६ गते विजेता घोषणा गरिनेछ ।

प्रकाशित : माघ २१, २०७५ १७:५०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT