विप्लव समूहमाथि लगाइएको प्रतिबन्ध फिर्ता लेऊ : वैद्य

कान्तिपुर संवाददाता

काठमाडौँ — मोहन वैद्य नेतृत्वको नेकपा (क्रान्तिकारी माओवादी) ले विप्लव समूहका गतिविधिमाथि लगाइएको प्रतिबन्ध फिर्ता लिन सरकारसित माग गरेको छ । स्थायी समिति बैठकको निर्णय सार्वजनिक गर्दै महासचिव वैद्यले नेकपा विप्लव समूहका नेता, कार्यकर्ताहरुलाई धरपकड तथा यातना दिने काम अबिलम्ब रोक्नसमेत माग गरेका छन् ।

'राजनीतिक समस्याको समाधान राजनीतिक रुपमा गर्न, धरपकड गर्ने तथा यातना दिने कामलाई अविलम्ब रोक्न र सो प्रतिबन्ध फिर्ता लिन सरकारसित विशेष माग गर्दछ' विज्ञप्तिमा छ ।

सरकारको गतिविधिलाई फासिवादी भन्दै क्रान्तिकारी माओवादीले विरोध तथा भर्त्सना गरेको छ । 'आफूलाई कम्युनिस्ट भनाउने सरकारद्वारा एउटा कम्युनिस्ट समूहमाथि गरिएको फासीवादी व्यवहार निन्दनीय छ', वैद्यले विज्ञप्तिमा उल्लेख गरेका छन् । देशमा लुटपाट मच्चाउने र आपराधिक गतिविधि गरेको भन्दै मंगलबार बसेको मन्त्रिपरिषद् बैठकले विप्लव समूहमाथि प्रतिबन्ध लगाउने निर्णय गरेको थियो ।

यस्तै, सरकार र सीके राउतबीच प्रधानमन्त्रीको उपस्थितिमा भएको ११ बुादेमा अमूर्त भाषा प्रयोग गरिएको भन्दै सच्याउन माग गरेको छ । सहमतिको दोस्रो बुादामा तराई-मधेसलगायत देशका कतिपय स्थानमा रहेका असन्तुष्टिहरुलाई जनअभिमतमा आधारित लोकतान्त्रिक विधिबाट समाधान गर्न सहमत भएको विषयमा सरकारले जनमत संग्रहमा सहमति जनाएको भन्दै आलोचना भइरहेको छ । स्वतन्त्र मधेस गठबन्धनका तर्फबाट समेत जनमत संग्रहमा जान सहमत भएको भन्ने अथ्र्याइएको भन्दै क्रान्तिकारी माओवादीले राष्ट्रिय अखण्डता तथा सार्वभौमिकताजस्तो सम्वेदनशील विषयमा सरकारका तर्फबाट गल्ती भएकोमा त्यसलाई अविलम्ब सच्याउन आग्रह गरेको छ ।

प्रकाशित : फाल्गुन २९, २०७५ १७:०८
प्रतिक्रिया
पठाउनुहोस्
ADVERTISEMENT
ADVERTISEMENT

राजदूत आचार्यले भारतीय राष्ट्रपतिलाई बुझाए ओहदाको प्रमाणपत्र 

सुरेशराज न्यौपाने

नयाँदिल्ली — भारतका लागि नवनियुक्त राजदूत निलाम्बर आचार्यले बुधबार बिहान भारतका राष्ट्रपति रामनाथ कोविन्दसमक्ष आफ्नो ओहदाको प्रमाणपत्र (क्रिडेन्सिअल) बुझाएका छन् । नयाँदिल्लीस्थित भारतको राष्ट्रपति कार्यालयमा बुधबार बिहान ११ हुने विशेष कार्यक्रमबीच आचार्यले ओहदाको प्रमाणपत्र बुझाएका हुन् । 

त्यसपछि राजदूत आचार्यले राष्ट्रपति कोविन्दसँग शिष्टाचार भेट गरेका थिए । भेटमा नेपाल-भारतबीचको सदियौं पुरानो र बहुआयामिक सम्बन्धलाई थप सुदृढ पार्ने विषयमा चर्चा भएको नवनियुक्त राजदूत आचार्यले कान्तिपुरलाई जानकारी गराए । त्यसैगरी आचार्यले संविधान सफल कार्यान्वयनपछि नेपालले आर्थिक विकासलाई प्राथमिकता राखेको समेत भेटमा चर्चा गरेका थिए । 'नेपालमा अहिले राजनीतिक एजेण्डामा कुनै विवाद छैन, अब नेपाल सरकार समृद्ध नेपाल, सुखी नेपालको लक्ष्य कार्यान्वयनमा लागेको जानकारी गराएँ' उनले भने । राजदूत आचार्यका अनुसार नेपाल-भारत सम्बन्धको थप सुदृढीकारणको आवश्यकता पनि औंल्याइएको छ ।

भेटमा भारतीय राष्ट्रपति कोविन्दले दुई देशबीचको सम्बन्धका बारेमा चासो राखेका थिए ।

ओहदाको प्रमाणपत्र बुझाएसँगै राजदूत आचार्यले आजैदेखि औपचारिक रुपमा दूतावासको जिम्मेवारी सम्हालेका छन् । जिम्मेवारी सम्हालेलगत्तै कान्तिपुरसँगको कुराकानीमा राजदूत आचार्यले आफूले दुई देशबीचको आपसी विश्वासलाई थप बढाउन र असमझदारीलाई पनि द्विपक्षीय संवाद र छलफलबाट टुंग्याउनमा जोड दिने बताए ।

करिब दुई महिनाअघि नेपाल सरकारले ७५ वर्षीय आचार्यलाई भारतका लागि राजदूत नियुक्त गरेको थियो । करिब डेढ वर्षअघि तत्कालीन राजदूत दीपकुमार उपाध्यायले राजीनामा दिएयता नयाँदिल्लीस्थित नेपाली दूतावास नेतृत्वविहीन रहँदै आएको थियो ।

प्रकाशित : फाल्गुन २९, २०७५ १६:३९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT