हुलाकी सडक आयोजना : म्याद गुज्रँदै, काम आधामात्रै

भवानी भट्ट

(कञ्चनपुर) — सम्झौता अवधिभित्र काम भएको भए कञ्चनपुरमा हुलाकी सडक आयोजना चालु आवभित्रै सकिनुपर्ने हो । तर तोकिएको समयभित्र आधा पनि पूरा नहुने देखिएको छ । कञ्चनपुरमा ३ चरणमा ठेक्का सम्झौता गरेर हुलाकी सडकको काम भइरहेको छ ।

डोकेबजारदेखि बेलौरीको बुटाबारीसम्म २० किलोमिटर, बुटाबारीदेखि बेलडाँडीसम्म २० र बेलडाँडीदेखि दैजीसम्म २२ किलोमिटरको फरकफरक निर्माण कम्पनीले काम गरिरहेका हुन् । ‘निर्धारित समयमा कुनै पनि काम सकिँदैन,’ हुलाकी सडक आयोजनाका इन्जिनियर पदम मडैले भने, ‘चालु वर्षभित्र ३ वटै खण्डको काम सकिनुपर्ने हो, तर आधा पनि काम सकिने देखिँदैन ।’ उनका अनुसार हालसम्म समग्रमा सडक निर्माण ४० प्रतिशत मात्रै भएको छ ।

Citizen


डोकेबजारदेखि बुटाबारीसम्म १३ नं. ठेक्काको हालसम्मको प्रगति करिब ४० प्रतिशत छ । केही ठाउँमा ग्राभेल हाल्ने काम भइरहेको छ । केही ठाउँमा माटो भरान हुँदै छ । डोकेबजारदेखि दोदा पुलसम्म ४ किलोमिटरमा कालोपत्रेका लागि अन्तिम तयारी भइरहेको इन्जिनियर मडैले बताए । ‘चालु वर्षभित्र उक्त कालोपत्रे सकिन्छ,’ उनले भने । उक्त खण्ड निर्माणका लागि राजेन्द्र शर्मा जेभी निर्माण कम्पनीसँग ०७३ फागुन १ गते साढे ३६ करोडमा ठेक्का सम्झौता भएको थियो ।

बुटाबारीदेखि बेलाडाँडीसम्म १४ नम्बर ठेक्काअन्तर्गत निर्माण भइरहेको सडकको प्रगति ५० प्रतिशत पुगेको छ । चालु वर्षमा १० किलोमिटर कालोपत्रे गर्ने लक्ष्य राखिएको इन्जिनियर मडैले बताए । ‘यो खण्डमा त कालोपत्रेका लागि निर्माण भएको बेस पनि बिग्रिइसक्यो,’ इन्जिनियर भन्छन्, ‘फेरि मर्मत गर्नुपर्ने भएको छ ।’ उक्त सडक निर्माणका लागि ०७३ पुसमा बाबा हंससिद्ध निर्माण कम्पनीसँग ४१ करोड ७६ लाखमा ठेक्का सम्झौता भएको हो । बेलडाँडीदेखि दैजीसम्मको २२ किलोमिटर सडकमा सबैभन्दा कम काम भएको छ । कहिले निकुञ्जको विवाद त कहिले निर्माण कम्पनीकै लापरबाहीले यहाँ ढिलो गरी काम सुरु भएको हो । यो सडकमा अहिले पनि माटो भरान तथा ग्राभेलिङको काम सकिएको छैन ।

हुलाकी सडक आयोजनाको कार्यालय धनगढीका अनुसार यहाँ ३०/३५ प्रतिशतमात्रै काम भएको छ । बेलडाँडी–दैजी खण्ड निर्माणका लागि राजेन्द्र शर्मा जेभी निर्माण कम्पनीसँग ०७३ फागुनमा ३८ करोड ५७ लाखमा ठेक्का सम्झौता भएको हो । चालु वर्षमा ३ वटै ठेक्काको काम सकिनुपर्ने हो । तर उक्त समयावधिमा आधा पनि पूरा नहुने देखिएको छ । ‘अहिलेकै अवस्थामा काम भए आधा पनि पूरा हुँदैन,’ मडैले भने, ‘केही ठाउँमा निर्माण सामग्री नपाउँदा र केहीमा निकुञ्जको विवादका कारण ढिलाइ भएको हो ।’ निर्माण कम्पनीले पनि लापरबाही गरेका कारण समयमा नसकिने अवस्था आएको उनले बताए । उनले चालु वर्षभित्र ६२ किलोमिटरमध्ये १६ किलोमिटर कालोपत्रे हुन सक्ने बताए ।

स्थानीयद्वारा विरोधराजनीतिक पहुँचका आधारमा हुलाकी सडक मोडिएको भन्दै भीमदत्त नगरपालिका १९ बाग्फाँटावासीले विरोध जनाएका छन् । उनीहरूले २०१५ देखिको हुलाकी सडक बेलडाँडीदेखि सोझै निकुञ्ज भएर बाग्फाँटा हुँदै महेन्द्रनगर जोड्ने भए पनि राजनीतिक पहुँचका आधारमा दैजी पुर्‍याइएको आरोप लगाएका छन् ।

प्रकाशित : चैत्र १, २०७५ ०९:००
प्रतिक्रिया
पठाउनुहोस्

सुकुम्बासी आवास कार्यक्रम : घरबारविहीनलाई घर दिइने

घनश्याम खडका

(म्याग्दी) — जिल्लास्थित एक गाउँपालिकाले मुलुकमै पहिलो ‘गाउँपालिका अध्यक्ष’ जोडेर सबैका लागि आधारभूत आवास कार्यक्रम सार्वजनिक गरेको छ । 

रघुगंगा गाउँपालिकाले सबै ८ वटा वडाका सुकुम्बासी तथा विपन्नका लागि आवास कार्यक्रम सञ्चालन गर्न ‘गाउँपालिका अध्यक्ष सुकुम्बासी व्यवस्थापन तथा आवास सुधार कार्यक्रम’ लागू गरेको हो ।

संविधानले आधारभूत आवासलाई मौलिक हकका रूपमा राखेको तथा स्थानीय सरकार सञ्चालन ऐन ०७४ दफा ११ (४) को कानुनी व्यवस्थाअनुसार सुकुम्बासी आवास कार्यक्रम गर्न लागिएको रघुगंगा गाउँपालिकाले जनाएको छ ।
‘गाउँपालिकाभित्र केही आफन्त नभएका वृद्धवृद्धा, अपांगता भएका व्यक्तिको घर चुहिने र भत्कने खालका छन् । अति प्रभावित परिवारको घरमा छाना हाल्ने लक्ष्य हो,’ गाउँपालिका अध्यक्ष भवबहादुर भण्डारीले भने, ‘सुरक्षित आवासमा बस्न पाउने नागरिकको मौलिक अधिकार पनि हो । त्यसैले पहिलो चरणमा सुकुम्बासी र घरबारविहीनसमेतको लगत योजनामा छौं ।’

प्रस्तावित कार्यक्रमअन्तर्गत पालिकाभित्रका सबै वटाका सुकुम्बासी, घरबारविहीन, खरको छाना भएका, टिनको कच्ची छाना भएका र शौचालय नभएका घरधुरीको पहिचान गरी रघुगंगालाई खरको छानामुक्त आधारभूत आवास सबैलाई पुर्‍याउने लक्ष्य लिएको छ । आवास भए पनि शौचालय नभएका परिवारका लागि पक्की शौचालय बनाइदिने योजना छ । ‘सबै सुकुम्बासी, घरबारविहीनलाई आधारभूत तहको आवास व्यवस्था गर्न यसखाले कार्यक्रम ल्याएका हौं,’ रघुगंगाका प्रमुख प्रशासकीय अधिकृत रमेश थापाले भने, ‘यस वर्ष माफदण्डका आधारमा लगत संकलन गरी आगामी आवबाट कार्यक्रम कार्यान्वयन हुनेछ ।’

कार्यत्रम कार्यान्वयन गर्न गाउँपालिका कार्यपालिका सदस्य तोरणबहादुर दर्जीको अध्यक्षतामा ४ सदस्यीय लगत संकलन समिति गठन गरिएको छ । समितिलाई एक महिनाभित्र लगत संकलन गरी कार्यपालिकामा पेस गर्ने समयावधि तोकिएको छ । यसका लागि चालु बजेटमा १० लाख विनियोजन गरेको छ । सुकुम्बासी, घरबारविहीन तथा विपन्न परिवारको लगत संकलन गर्दा मासिक आय, पैत्रिक सम्पत्तिलाई आधार मान्ने तथा वडाध्यक्षको रोहबरमा टोलसुधार समितिको मुचुल्का अनिवार्य गरिएको समिति सदस्यसचिव पदमबहादुर भण्डारीले बताए ।

‘हामीले गाउँपालिकाभित्रका सबै सुकुम्बासी, घरबारविहीन र अति विपन्न परिवारको शुक्रबारदेखि लगत लिन सुरु गरेका छौं,’ सदस्यसचिव भण्डारीले भने, ‘निर्धारित अनुसूची लिएर कर्मचारी सबै वडाका घरघर पुगेर लगत संकलन गर्ने छन् ।’

प्रकाशित : चैत्र १, २०७५ ०८:५४
पूरा पढ्नुहोस्
प्रतिक्रिया
पठाउनुहोस्