जाजरकोटमा दीर्घरोगी बढे

कान्तिपुर संवाददाता

(जाजरकोट) — गुणस्तरीय उपचार नपाउँदा जिल्लामा दीर्घरोगीको संख्या बढ्दै गएको छ । खलंगामा आयोजना गरिएको तीनदिने शिविरमा सुगर, प्रेसर, कलेजोमा बोसो जम्ने, दम, टिबी, महिलाको आङ खस्ने, पाठेघरमा मासु पलाउनेलगायत दीर्घरोगीको संख्या बढी देखिएको हो ।

कर्णाली प्रदेशका अन्य जिल्लाभन्दा जाजरकोटमा विभिन्न रोगका बिरामी धेरै पाइएको वीर अस्पतालका डा. सुधांशु केसीले बताए । कलेजोरोग विशेषज्ञ डा. केसीका अनुसार शिविरमा विभिन्न दीर्घरोगीको संख्या बढ्दै गएको पाइएको हो ।

Citizen

उनले कुपोषण भएका बालबालिकाको संख्यासमेत बढ्दै गएको जनाए । अखाद्य वस्तु प्रयोग, धूमपान, सन्तुलित भोजनको अभाव, शारीरिक व्यायामको कमी, स्वास्थ्यसम्बन्धी जनचेतनाको कमीलगायत कारण रोगीको संख्या बढेको उनले बताए । ‘जिल्लामै गुणस्तरीय उपचार सेवा नहुँदा पनि रोगीको संख्या बढेको हो,’ उनले भने, ‘अधिकांश बिरामीमा अस्पतालप्रति अविश्वास भएको पाइयो ।’ जाजरकोटभन्दा विकट ठाउँमा गुणस्तरीय स्वास्थ्य सेवा प्रवाह भइरहे पनि सदरमुकाममा विशेषज्ञ डाक्टर नबस्दा बिरामीले रोग पालेर बस्नुपर्ने बाध्यता भएको केसीको भनाइ छ । शिविरमा आएका धेरै बिरामीले पुरानो पर्चा देखाउँदै मृगौलामा पत्थरी भएको बताए पनि उनीहरूमा जाँच गर्दा पत्थरी नपाइएको उनले बताए । ‘गलत पहिचानले बिरामीलाई भ्रम पैदा भएको रहेछ,’ उनले भने, ‘बिरामीको रोग पहिचान गर्न सम्बन्धित चिकित्सकले लापरबाही गरेको पाइयो ।’

निःशुल्क शिविरमा ६ हजार २ सयले उपचार सेवा पाएका छन् । एक–एक पाइला काठमाडौंको मुख्य आयोजना तथा भेरी नगरपालिका, पहाडी क्षेत्र विकास अभियान, सुर्खेत आँखा अस्पताल, नेफाल रेडक्रस सोसाइटीलगायत संघ संसस्थाको सहयोगमा शिविर सञ्चालन गरिएको हो ।

शिविरमा आँखा, कान, दाँत, घाँटी, स्त्रीरोग, छाला, बालरोग, हाडजोर्नी, दम, जनरल मेडिसिन, सामान्य शल्यत्रिया, प्याथोलोजीलगायत सेवा प्रदान गरेको आयोजक संस्थाका अध्यक्ष डा. सुमनशमशेर थापाले बताए । शिविरमा जाजरकोटका साथै रुकुम पश्चिम, सल्यान र सुर्खेतका बिरामीले समेत सेवा पाएका छन् । संस्थाले विपतमा परेका र दुर्गमका जनतालाई सहयोग गरिरहेको उनले बताए ।

शिविरमा २ हजार
बिरामीलाई ब्रस र मन्जन निःशुल्क वितरण गरिएको छ । शिविर सञ्चालनका लागि २० विशेषज्ञसहित ४५ जनाको टोली जाजरकोट आएको पहाडी क्षेत्र विकास अभियानका अध्यक्ष प्रदीपजंग शाहले बताए । शिविरमा उपचार हुन नसकेका गम्भीर प्रकृतिका बिरामीलाई काठमाडौं रिफर गरिएको छ ।

प्रकाशित : चैत्र १, २०७५ ११:२८
ADVERTISEMENT
प्रतिक्रिया
पठाउनुहोस्

म्याराथनको पुरस्कार अमेरिकाबाट

कान्तिपुर संवाददाता

रुकुम पश्चिम — जिल्लामा पहिलोपल्ट आयोजना गरिएको खुला सिस्ने–चाखुरे अल्ट्रा रेस म्याराथनको पुरस्कार रकम अमेरिकाबाट आएको छ । कामको सिलसिलामा अमेरिका रहेका युवाहरूले अल्ट्रा रेस म्याराथन पुरुषतर्फको पुरस्कार पठाइदिएका हुन् । 

सिस्ने गाउँपालिका–७, नाथीगार रुकुम पूर्व घर भएका १० युवाले पुरुषतर्फको सबै पुरस्कारको राशि आयोजकलाई पठाइदिएका छन् । अमेरिका रहेका प्रेमबहादुर रावतको पहलमा पुरुषतर्फको लागि खर्च हुने झन्डै १ लाख १० हजार नगद आयोजकलाई पठाइएको हो । नाथीगार घर भएका १० युवाले एकमुष्ट पुरस्कार रकम पठाइदिएका हुन् । ‘म्याराथन हुने भएपछि हामीले पनि केही गर्नुपर्छ भनेर सहयोगस्वरूप पुरस्कार रकम व्यहोरेका हौं, रावतले भने ।

सिस्ने अल्ट्रा रेस म्याराथनमा पुरुषतर्फ प्रथम हुनेले ४०, दोस्रो हुनेले २५, तेस्रो हुनेले १५ र सान्त्वना हुने ५ जनाले ५/५ हजार रुपैयाँ नगद पुरस्कार पाउनेछन् । यो सबै पुग्ने गरी अमेरिका रहेका युवाले पुरस्कारको सौजन्य गरेको आयोजक डाँफे मुनाल युवा क्लवका अध्यक्ष नरेश पुन मगरले बताए । क्लबले चैत १२ गते पहिलोपटक खुला सिस्ने अल्ट्रा रेस म्याराथन गर्दै छ ।

जसमा पुरुषतर्फ ४२ किमि र महिलातर्फ १० किमि दौड गराइने आयोजकले जनाएको छ । मुसीकोट नगरपालिकाबाट बाँफिकोट गाउँपालिका हुँदै आठबीसकोट नगरपालिकाको राडीसम्म पुरुष म्याराथन हुनेछ । रिम्ना हुँदै आठबीसकोटको राडी जाने सडकअन्तर्गत बाँके ज्युलादेखि चिसापानी हुँदै राडीसम्मको रुट महिला धावकका लागि तय गरिएको छ । महिलातर्फ प्रथम आउनेलाई १५, दोस्रोलाई १०, तेस्रोलाई ५ र सान्त्वना ५ जनालाई २/२ हजारका दरले पुरस्कार प्रदान गरिने आयोजकले जनाएको छ ।

जिल्लाका आठबीसकोट नगरपालिका, मुसीकोट नगरपालिका, बाँफिकोट गाउँपालिका र नेपाल पर्यटन बोर्डले प्रतियोगितामा सहयोग गरेका छन् । सिस्ने र चाखुरे हिमाल प्रचारको उद्देश्यले प्रतियोगिता आयोजना
गरिएको हो ।

प्रकाशित : चैत्र १, २०७५ ११:२७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT