मेडिकल कलेजमाथि छानविन गर्न संसदीय उपसमिति
काठमाडौँ — संघीय संसदको शिक्षा तथा स्वास्थ्य समितिले मेडिकल कलेजहरुले बढी शुल्क लिएबारे छानविन गर्न उपसमिति गठन गरेको छ । सांसद सुरेशकुमार राईको संयोजकत्वमा ९ सदस्यीय उपसमिति गठन गरिएको समितिले जनाएको छ ।
उपसमितिमा सांसदहरु चित्रलेखा यादव, खराराज अधिकारी, योगेश भट्टराई, उमेश श्रेष्ठ, एकवाल मियाँ, जीवनराम श्रेष्ठ, मनकुमारी जिसी र सन्तबहादुर थारु सदस्य रहेका छन् । समितिको बैठकमा सांसदहरुले मेडिकल कलेजहरुले विद्यार्थी, अभिभावकसँग अवैध शुल्क असुलेको भन्दै छानविनको माग गरेका थिए ।
उनीहरुले छानविनका लागि टोली गठन गर्न सभापति जयपुरी घर्तीलाई जिम्मेवारी दिएका थिए । घर्तीले उपसमितिको बैठक बसेको एक महिनाभित्र प्रतिवेदन बुझाउने गरी उपसमिति गठन गरेकी हुन् ।
‘मेडिकल कलेजहरुमा समस्या आएको छ,’ उनले भनिन, ‘सत्यतथ्य अध्ययन गरी प्रतिवेदन बुझाउन उपसमिति गठन गरिएको हो ।’ उपसमितिको रिपोर्टपछि समस्या समाधान गर्न सरकारलाई निर्देशन दिने समितिको तयारी छ ।
प्रकाशित : चैत्र १४, २०७५ १८:४३
