काठमाडौँ — कांग्रेसले नयाँ वर्षको आरम्भसँगै पार्टी संगठन सुधारका लागि जागरण अभियान चलाउने भएको छ । कांग्रेस सहमहामन्त्री प्रकाशरण महतले पहिलो चरणको अभियान वैशाख ११ गते सुरु हुने बताए । 'कार्यक्रम र समयतालिकाको औपचारिक घोषणाको तयारीमा छौं,' उनले भने, 'तीन चरणको कार्यक्रम वैशाखबाट मंसिरसम्म चल्नेछ ।'
पार्टी प्रवक्ता विश्वप्रकाश शर्माले जागरण अभियानका लागि सचिवालयले कार्यक्रम तयार पारिरहेको जानकारी दिए । पार्टी केन्द्रीय कार्यालयले गर्ने कार्यक्रमका अतिरिक्त केन्द्रीय नीति तथा प्रशिक्षण प्रतिष्ठानले प्रशिक्षणका कार्यक्रम लैजाने भएको छ । उपसभापति विमलेन्द्र निधि प्रमुख रहेको प्रतिष्ठानले युवा मतदातालाई पार्टीप्रति आकषिर्त गर्ने खालका कार्यक्रम र प्रशिक्षण सञ्चालन गर्ने तयारी गरिरहेको छ । जिल्ला र क्षेत्रीय कार्यसमितिले पनि आआफ्नो अभियान चलाउने छन् ।
प्रवक्ता शर्माका अनुसार कांग्रेसले २०७६ साललाई जागरण अभियानसँग जोड्ने तयारी गरेको छ । अभियान पहिलो चरणमा ७७ जिल्ला, दोस्रो चरणमा ३ सय ३० निर्वाचन क्षेत्र र तेस्रो चरणमा ७ सय ५१ स्थानीय तहमा पुर्याउने लक्ष्य छ । अभियानलाई समन्वय गर्न सबै केन्द्रीय सदस्यलाई जिल्ला खटाउने तयारी कांग्रेस सभापति शेरबहादुर देउवाले गरिरहेका छन् । पार्टीका सबै भ्रातृसंस्था तथा शुभेच्छुक संस्थाहरूलाई फरक जिम्मेवारीका साथ अभियानमा परिचालन गराइने छ ।
सहमहामन्त्री महतले अभियानको मुख्य लक्ष्य सरकारका गलत कामकारबाहीलाई आम जनतामाझ लैजाने हुने बताए । पार्टीका नीति, सिद्धान्त, कांग्रेस नेतृत्वमा रहेका बेला भएका उपलब्धिलाई समेत आम जनताको घरदैलोमा पुर्याउने लक्ष्य कांग्रेसले लिएको उनले बताए । 'महासमिति बैठकबाट पारित पार्टीको आर्थिक तथा राजनीतिक प्रस्ताव र पार्टीको विधानलाई समेत कार्यकर्तामाझ बुझाउने प्रयास हुनेछ,' महतले भने, 'स्थानीय तहमा पार्टीका समस्या र विवाद सुल्झाउने कामसमेत हुनेछ ।'
पहिलो चरणको कार्यक्रम एक महिनासम्म चल्नेछ । त्यसपछि दोस्रो र तेस्रो चरणका कार्यक्रम सुरु हुनेछ । केन्द्रले आयोजना गरेका कार्यक्रम मंसिरसम्म चल्नेछन् । प्रतिष्ठान र तल्ला तहका निकायले कार्यक्रम जारी राख्ने छन् ।
अभियानलाई प्रभावकारी बनाउन पार्टीका केन्द्रीय विभाग गठनको तयारीमा सभापति देउवा लागेका छन् । महाधिवेशन सम्पन्न भएको दुई महिनाभित्र गठन हुनुपर्ने विभाग तीन वर्ष बित्दासमेत गठन गरिएको छैन । पार्टीभित्रको आन्तरिक किचलो नदेखिने गरी विभाग गठन गर्न देउवाले वरिष्ठ नेता रामचन्द्र पौडेल र पूर्वमहामन्त्री कृष्णप्रसाद सिटौलासँग परामर्श थालेका छन् ।
विधानमा २८ विभागको व्यवस्था छ । केन्द्रीय कार्यसमितिले आवश्यकताबोध गरे बढाउन सक्ने व्यवस्था विधानमा छ । यसअघि केन्द्रीय कार्यसमितिले फुटाएर ४२ विभाग बनाएको थियो । 'बढाउने या विधानकै व्यवस्थाअनुसार २८ वटा मात्रै गठन गर्ने भन्नेबारे छलफल भइरहेको छ,' सहमहामन्त्री महतले भने, 'एक/दुई दिनमै विभाग गठन हुन्छ ।'
