काठमाडौं-दिल्लीको हवाई भाडा ह्वात्तै बढेपछि बिरामीलाई मार

दुवै देशको उड्डयन प्राधिकरणले जथाभावी भाडा नबढाउन दिएको निर्देशन विमान कम्पनीले मानेनन्
सुरेश न्यौपाने

नयाँदिल्ली — नयाँदिल्लीस्थित राजीव गान्धी क्यान्सर अस्पतालमा उपचाररत भक्तपुरका डिल्ली भट्टराई दिल्ली–काठमाडौं सिधा उडानबाटै घर फिर्ने योजनामा थिए । हवाई भाडामा अचाक्ली बढेपछि उनी अहिले विकल्प खोज्दै छन् ।

फाइल तस्बिर ।


६ महिना लामो उपचारपछि तगिंँदै गरेका उनमा काठमाडौं–दिल्ली बसबाट यात्रा गर्ने आँट छैन । ‘भाडा चर्को रहिरह्यो भने ट्रेनमा गोरखपुरसम्म जान्छु । त्यसपछि भैरहवाबाट जहाजमा जान्छु,’ उनले भने, ‘क्यान्सर रोगीहरूलाई भारतीय रेल्वेले पुरै भाडा छुट दिँदो रहेछ ।’

भक्तपुर कमलविनायकका पुण्य राम पनि त्यस्तै दोधारमा छन् । श्रीमती राधाको उपचारका लागि दिल्ली आएका उनले यही साता काठमाडौं जाने योजना बनाएका थिए । जब हवाई भाडा बढेर एकतर्फी नै १८ हजार भारुभन्दा बढी भएको थाहा पाए, उनी के गर्ने भनेर द्विविधामा छन् । ‘केही दिनका लागि भए पनि जानैपर्ने थियो । तर अहिलेको भाडामा कसरी जाने ?’ रामले भने । बसमा जान सकिन्छ कि भनेर सोधपुछ गरिरहेको उनले बताए । ‘म त बसमा जान सकूँला, बिरामीलाई त्यति लामो बाटो कसरी लाने !’ रामले चिन्ता व्यक्त गरे ।

हवाई भाडा महँगिएपछि भट्टराई र रामजस्ता उपचारका लागि दिल्ली आएका थुप्रै नेपाली समस्यामा परेका छन् । क्यान्सर, कलेजो र मिर्गौलासम्बन्धी रोगको उपचारका लागि बर्सेनि हजारौं नेपाली दिल्ली धाउने गर्छन् । हरियाणाको मेदान्त र दिल्लीका राजीव गान्धी, अपोलो, म्याक्स, गंगाराम, एम्स, बीएलके अस्पतालमा नेपाली बिरामीको भीड हुन्छ ।

हवाई टिकटमा भएको अत्यधिक वृद्धिले विशेषगरी काठमाडौं र आसपासका क्षेत्रबाट दिल्ली आउनेहरूलाई बढी समस्या परेको छ । पोखराका एक युवा विगत एक महिनादेखि आमाको पित्तथैलीको क्यान्सरको उपचारका लागि दिल्लीमा थिए । चिकित्सकले पन्ध्र दिनपछि आउन भनेकाले उनले दिल्लीमा बस्नुभन्दा घर पुग्ने निधो गरे । हवाई टिकट खोज्न थाले ।

‘हवाई भाडा सुन्दा सुरुमा पत्यारै लागेन,’ उनले भने, ‘दिल्ली आउँदा आमा र मेरा लागि २४ हजार रुपैयाँ मात्र तिरेको थिएँ । अहिले ३३ हजार भारु (करिब ५३ हजार) पर्ने रहेछ ।’ उनले आमाको स्वास्थ्यका कारण दोब्बर महँगो भए पनि प्लेनबाट जाने निधो गरेको सुनाए ।

हवाई भाडा एकाएक वृद्धि हुनुमा भारतीय निजी विमान सेवा कम्पनी जेट एयरवेजको उडान स्थगितलाई ठानिएको छ । वित्तीय संकटका कारण भारतको सबैभन्दा ठूलो निजी वायुसेवा कम्पनी जेट एयरवेजका सबै उडान गत सातादेखि स्थगित भएका छन् । त्यसअघि कम्पनीले दिल्ली–काठमाडौं दैनिक चारवटा उडान गर्दै आएको थियो ।

जेटको उडान स्थगितपछि हवाई टिकटको माग र आपूर्तिबीच असन्तुलन सिर्जना भएकाले पर्यटकीय सिजनले महँगिँदै गएको दिल्ली–काठमाडौं हवाई भाडामाथि थप चाप परेको हो । एक महिनाअघिसम्म दिल्ली–काठमाडौं न्यूनतम हवाई भाडा करिब पाँच हजार भारु रहेकामा अहिले बढेर १८ हजार भारु नाघेको छ । कतिपय कम्पनीहरूको भाडा ३० हजारभन्दा बढी छ । अन्य विमानको तुलनामा नेपाल वायुसेवा निगमको भाडा कम छ । आगामी बुधबार निगमको दिल्ली–काडमाडौंको भाडा १८ हजार ७ सय रुपैयाँ रहेकोमा इन्डिगोको २५ हजार र एयर इन्डियाको ३२ हजार छ ।

मार्चदेखि जुन महिना नेपालमा पर्यटकीय सिजन मानिन्छ । यो समयमा पदयात्रादेखि पर्वतारोहणका लागि पश्चिमा मात्र होइन, भारतीय पर्यटकको समेत रोजाइमा नेपाल पर्ने गरेको छ । ‘विगतमा पनि यो अवधिमा हवाई भाडा चर्को हुने गर्थ्यो,’ नेपाल वायुसेवा निगमका दिल्ली प्रमुख टंक भण्डारीले भने, ‘त्यसमाथि जेटको दैनिक चारवटा उडान स्थगित भएपछि प्रभाव देखिनु स्वाभाविक हो ।’ राजीव गान्धी क्यान्सर अस्पताल छेउको सोमबजारस्थित एनबी टुर्स एन्ड सञ्चालक विष्णु शाहीले चर्को हवाई भाडाका कारण आफूले बिरामीको अवस्था हेरेर ट्रेनलगायतका विकल्प सुझाउन थालेको बताए ।

‘बिरामीको अवस्था ठीक छ भने काठमाडौं सिधा नगएर नजिकका सहरसम्म ट्रेन वा प्लेनबाट जान सुझाव दिने गरेको छु,’ शाहीले भने । निगमले हाल न्यारो र वाइडबडीबाट काठमाडौं–दिल्ली उडान गर्दै आएको छ । निगमले यो रुटमा बढदो चापकै कारण मे १ देखि दैनिक दुइटा उडान गर्ने निर्णय गरिसकेको छ । त्यसपछि हवाई भाडा केही कम हुने अपेक्षा गरिएको छ ।

त्यसो त भारतको नागरिक उड्डयन प्राधिकरण र नेपाल नागरिक उड्डयन प्राधिकरण (क्यान) दुवैले अस्वाभाविक रूपमा हवाई भाडा नबढाउन चेतावनी दिइसकेका छन् । वायु सेवा कम्पनीहरूले त्यसको अटेर गर्दै आएका छन् ।

प्रकाशित : वैशाख १०, २०७६ १०:३९
प्रतिक्रिया
पठाउनुहोस्

बन्दीपुर सडक फराकिलो पारिँदै

साँघुरा घुम्तीहरूले आवागमनमा अप्ठ्यारो
सडक विस्तारले पर्यटक थपिने विश्वास
कान्तिपुर संवाददाता

तनहुँ — ग्रामीण पर्यटनको उत्कृष्ट गन्तव्य तनहुँको बन्दीपुर जाने सडक खण्डलाई चौडा बनाउने कार्यअन्तर्गत घुम्ती सुधारको काम थालिएको छ  । बन्दीपुर आउने पर्यटनको चाप बढेसंगै सडक साघुरो भएकाले दुर्घटनाको खतरा बढ्दै गएपछि गाउँपालिकाले सडकमा रहेका घुम्तीलाई फराकिलो बनाउने कार्य अगाडि बढाएको हो  ।

बन्दीपुरमा आउने जाने पर्यटनको संख्या बढेसंगै सडकमा रहेका घुम्तीलाई फराकिलो बनाउन लागिएको गाउँपालिकाका अध्यक्ष पूर्णसिंह थापाले बताए ।

पृथ्वीराजमार्गको डुम्रेबजारबाट करिब ८ किलोमिटरको दूरीमा अवस्थित बन्दीपुर पुग्न उकालो अनि घुम्ती सडक पार गर्दै जानुपर्छ । डुम्रे–बन्दीपुर सडकखण्डको साँघुरो सडकलाई फराकिलो बनाउने तथा घुम्तीहरूलाई केही हटाएर सहज बनाउन लागिएको अध्यक्ष थापाले बताए ।

उनले भने, ‘रोड कालोपत्रे भए तापनि साँघुरो भएकाले पर्यटकलाई असहज भइरहेको छ, यही असहजताको कमी गराउन र आउदा दिनमा धेरैभन्दा धेरै पर्यटकलाई सहज र सुरक्षित रूपमा बन्दीपुर भिœयाउनका लागि गाउँपालिकाले सडकलाई सुधार गर्ने कार्यलाई प्राथमिकतामा राखेको छ ।'

बन्दीपुरमा आउने पर्यटकहरूले साँघुरो सडकका साथै व्यवस्थित पार्किङको समस्या झेल्दै आउनुपरेको छ । यो समस्यालाई समाधान गर्न गाउँपालिकाले सडक सुधार तथा व्यवस्थित पार्किङ निर्माणका कामलाई प्राथमिकता दिएको छ ।


गाउँपालिकाले पार्किङस्थल निर्माणका लागि चालु आर्थिक वर्षमा ६५ लाख रुपैयाँ विनियोजन गरेको छ । उक्त रकमबाट यस वर्ष बन्दीपुरमा दुईवटा बसपार्क निर्माण कार्य अगाडि बढाएको छ भने थप एउटा बसपार्क निर्माण गर्न योजना बनाउदै गरेको अध्यक्ष थापाले जानकारी गराए ।


डुम्रे–बन्दीपुर सडक खण्डको घुम्ती सुधार तथा साँघुरो सडकलाई व्यवस्थित गर्न सांसद विकास कोषबाट प्राप्त ३० लाख रुपैयाँ र नपुग रकम गाउँपालिकाले व्यवस्थापन गर्ने गरी काम अगाडि बढाइएको छ । गण्डकी प्रदेश सरकारले ग्रामीण पर्यटनको पहिलो गन्तव्यका रूपमा सूचीकृत गरेसँगै बन्दीपुर आउने पर्यटकको संख्या पनि बढ्दै गएको बन्दीपुरका पर्यटन व्यवसायीहरू बताउँछन् ।


समुद्री सतहबाट करिब १०३० मिटर उचाइमा अवस्थित बन्दीपुर ऐतिहासिक, धार्मिक, प्राकृतिक एवं सांस्कृतिक सम्पदाले भरिपूर्ण छ । नेवारी कला र संस्कृति, दोहोरो लाइनमा मिलाई बनाइएका प्यागोडा शैलीका कलात्मक घरहरू, ढुंगा ओछ्याइएका बाटाहरू, अठारौं शताब्दीमा निर्मित खडदेवी, विन्ध्यवासिनी, थानी देवी, महालक्ष्मी, नारायण मन्दिर, तीनधारा महादेव, मुकुन्देश्वरी, फराकिलो टु“डिखेल, रानी वन सहिद पार्क लगायतका गन्तव्यले पर्यटकलाई लोभ्याउने गर्दछन् ।


त्यस्तै, पश्चिममा रहेका धौलागिरी, अन्नपूर्ण, माछापुच्छ्रे , मनास्लु, बुद्ध हिमालदेखि पूर्वमा रहेका गणेश हिमाल र लाङटाङ हिमशृंखलाका सयौं चुचुराहरू यहाबाट सहजै अवलोकन गर्न सकिन्छ । यिनै दृश्यावलोकन र बन्दीपुरको प्राकृतिक सौन्दर्यताको भरपूर मनोरञ्जन लिनका लागि बर्सेनि हजाराैंको संख्यामा पर्यटक बन्दीपुर भित्रिने गर्दछन् ।

-सम्झना रसाइली

प्रकाशित : वैशाख १०, २०७६ १०:३६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT