अस्पताल बनाउन जसले गरे तीन करोड दान

नारायणगढ निवासी ९० वर्षीय उदयकुमार पियाले रकम दिन राजी भएपछि स्पाइनल इन्जुरी अस्पताल तथा पुनर्स्थापना केन्द्रको सोमबार शिलान्यास 
रमेशकुमार पौडेल

चितवन — मेरुदण्डमा चोटपटक लागे पक्षाघात भएर जीवन कष्टप्रद हुने जोखिम रहन्छ । यस्तो चोटपटकको उचित उपचार हुने अस्पताल दुर्लभ छन् । उपचार भए पनि पक्षाघात भएकाहरूले हृवीलचियरको साहरा लिँदा दिनचर्या सहज हुन सकेको छैन ।

मेरुदण्ड चोटपटक (स्पाइनल इन्जुरी) को उपचार र पक्षाघात भएकाहरूको पुनर्स्थापनाका लागि अस्पताल बनाउन नारायणगढमा एक दानवीरले तीन करोड रुपैयाँ दान दिने भएका छन् ।

नारायणगढ निवासी ९० वर्षीय उदयकुमार पिया सोमबार निकै खुसी देखिन्थे । उनले तीन करोड रुपैयाँ दिने पक्का भएपछि दिउँसो भरतपुर–३ बाह्रघरे सानो मझुवामा स्पाइनल इन्जुरी अस्पताल तथा पुनर्स्थापना केन्द्रको शिलान्यास भयो । भरतपुर महानगरले एक बिघा जग्गा उपलब्ध गराएपछि भवन बनाउने दाताको खोजीमा भौंतारिएका चितवन रोटरी क्लबलाई पियाले ठूलो साहरा दिए ।

चितवन रोटरी क्लबले ६ वर्षदेखि भरतपुर अस्पतालभित्र स्पाइनल इन्जुरी युनिट सुरु गरेको थियो । व्यवस्थित उपचार केन्द्र बनाउने योजनामा जुटेको रोटरीलाई महानगरले जग्गा र पियाले रुपैयाँ दिए । ‘हिजो सपनाजस्तै लाग्ने विषय अब साकार हुँदै छ,’ रोटरी क्लब चितवनका अध्यक्ष कपिलबाबु खनालले भने । क्लबका पूर्व अध्यक्ष चन्द्रमान श्रेष्ठको पहलमा पियाले तीन करोड दान गर्ने घोषणा गरेका हुन् ।

‘सुरुमा एक करोड रुपैयाँ दिन तयार हुनुभएको थियो । त्यस्तै चार/पाँच कट्ठा जग्गामा स–सानो उपचार केन्द्र बनाउने सोँच थियो । जग्गा खोज्दै जाँदा महानगरले एक बिघा दिने भयो । त्यसपछि अस्पताल पनि ठूलै बनाऊँ भन्ने लाग्यो । उदयकुमारजीले पैसा आवश्यक परेको हो भने भन है भन्नुभयो,’ पूर्व अध्यक्ष श्रेष्ठले भने । भवन बनाउन मात्रै पाँच करोड रुपैयाँ लाग्ने अनुमान छ ।

‘पियाजीले ल ल बनाउनहोस्, म अरू दुई करोड थपिदिन्छु भन्नुभयो,’ श्रेष्ठले भने । महत्त्वपूर्ण सहयोग गरेका कारण अस्पतालको नाम नै श्री उदयकुमार चमेलीदेवी पिया चितवन स्पाइनल इन्जुरी हस्पिटल तथा पुनर्स्थापना केन्द्र राखिने भएको छ । चमेली उदयकुमारकी श्रीमती हुन् । ९० वर्षको उमेरमा पनि तन्दुरुस्त देखिन्छन् उदयकुमार । तर श्रीमती चमेलीदेविको १५वर्षअघि निधन भयो ।

बन्दिपुरमा जन्मेका उदयकुमार विसं. २००५ सालमा चितवन आएका हुन् । ‘हामीले बन्दीपुरमा पनि कपडाको व्यापार गर्दथ्यौं । नारायणगढमा पनि व्यपारलाई नै निरन्तरता दियौं । व्यापारबाट राम्रै भयो,’ पियाले भने । सामान्य साक्षर पियाले आफ्ना सन्तान दुई भाइ छोरा र ६ जना छोरीलाई राम्रैसँग शिक्षादीक्षा दिए । जेठा छोरा मदन पिया क्यान्सर उपचारका क्षेत्रका नामी चिकित्सक हुन् ।

‘जेठो छोरोले डाक्टर पढ्दै गर्दा एउटा अस्पताल त बनाउनुपर्‍यो भन्ने लाग्दथ्यो । छोरो राम्रै डाक्टर पनि भयो । मनको धोको मनमै थियो । स्पाइनल इन्जुरीको अस्पताल बनाउन सहयोग चाहियो भन्दै आएपछि हुन्छ भनेँ,’ पियाले भने । उनी चितवन आएका बेलामा औलोको महामारी थियो । एक रात बसे ज्वरोले सताउँथ्यो । पियालाई भने केही भएन । व्यापार पनि मौलायो । ‘कमाइ राम्रो भएपछि दान दिन किन मन बाँध्ने । एक पटक मैले ट्रक बेचेर तीन लाख समातेको थिएँ । स्कुलले भवन बनाउनुपर्‍यो भन्दै आए । मैले सरक्कै दिएँ । मान्छे छक्क परे । स्कुललाई त बेलाबेलामा सानोतिनो सहयोग गरेको थिएँ । अस्पताललाई भने लौ न त राम्रै सहयोग गरौं भन्ने लाग्यो,’ पियाले भने । आफूले पढ्न नपाएको हुँदा उनले स्कुललाईसहयोग गरे ।

अक्षर मात्रै चिने पनि होमियोप्याथिक उपचारका किताबहरू पढेर सेवा गर्न सक्ने भएका थिए । अस्पताललाई दान दिन उनलाई यसले पनि उत्प्रेरित गर्‍यो । ‘बाबाको इच्छामा हामी खुसी छौं । सबै सन्तानले उहाँको चाहनालाई सम्मान गर्दै आएका थियौं । स्कुल बनाउन बेलाबेलामा सहयोग गर्दै आउनुभएको थियो । अस्पताललाई पनि दिनुभएको छ । उहाँको कमाइको राम्रो सदुपयोग भयो,’ जेठा छोरा डा. पियाले भने ।

चितवन रोटरी क्लबको अगुवाइमा नारायणगढ रोटरी, रत्ननगर रोटरी, नारायणी मिड टाउन रोटरी, भरतपुर रोटरी र जावलाखेल रोटरीले अस्पताल बनाउन हातेमालो गर्नेछन् । स्पाइनल इन्जुरी संघ नेपालसँग सबै क्लबहरूले सहकार्य गरेका छन् । ‘शिलान्यास भएको छ । अब दुई वर्षभित्र हामी अस्पताल सञ्चालन गर्नेछौं,’ परियोजना संयोजक उत्तमलाल चुकेले भने ।

निर्माणमा खर्च हुने तीन करोडबाहेकको थप दुई करोड रुपैयाँ रोटरी क्लबहरूले जुटाउनेछन् । उपकरणका लागि रोटरी क्लब अन्तर्राष्ट्रियको कोषले सघाउने पूर्व अध्यक्ष श्रेष्ठले बताए । उपचार र पुनर्स्थापनामा खट्ने चिकित्सक र प्राविधिकहरू स्पाइनल इन्जुरी संघसँग सहकार्य गरेर व्यवस्थापना गर्ने अध्यक्ष खनालले बताए ।

अध्यक्ष खनालका अनुसार तत्काल अस्पताल२५ शय्याको हुनेछ । त्यसपछि दोस्रोचरणमा ५० शय्याको हुने उनले बताए । ‘मेरुदण्डको चोटपटक लागेपछि उचित उपचार दिएर उनीहरूको जीवन सहज बनाउन हामी तालिमहरू दिनेछौं । आयआर्जनमूलक तालिमहरू पनि चलाउने योजना छ । उदयकुमारजीको सहयोगले धेरैको जीवन सहज हुने अवस्था बन्दै छ,’ अध्यक्ष खनालले भने ।

प्रकाशित : वैशाख १०, २०७६ ०८:२४
ADVERTISEMENT
प्रतिक्रिया
पठाउनुहोस्

वृद्धवृद्धा भत्ता घरदैलोमै

कान्तिपुर संवाददाता

हेटौंडा — मकवानपुरको विकट कैलाश गाउँपालिकाले सामाजिक सुरक्षा भत्ता घरदैलोमा पुगेर वितरण गर्न थालेको छ । भत्ता वितरण कार्यको दोस्रो दिन सोमवार कैलाश गाउँपालिका—९ नामटारमा एक सय २० जनालाई भत्ता वितरण गरेको गाउँपालिका अध्यक्ष टंकबहादुर मोक्तानले बताए ।

मकवानपुरको कैलाश गाउँपालिकाले आइतबारदेखि घरदैलोमा पुगेर सामाजिक सुरक्षा भत्ता वितरण गर्दै । प्रताप विष्ट/कान्तिपुर 

उनका अनुसार ९० जना वृद्धवृद्धा, २० जना एकल महिला र १० जना अपांगतालाई भत्ता वितरण गरेको छ । उक्त गाउँपालिका— ३ स्थित घुमाउनेबाट सामाजिक सुरक्षा भत्ता वितरण कार्य आइतबारबाट सुरु गरिएको थियो । उक्त स्थानबाट ३ र ४ नम्बरका वडाका वृद्धवृद्धा अपांग र एकल महिलालाई भत्ता वितरण गरेको थियो ।

पहिलो दिन १ सय ७० जनालाई भत्ता वितरण गरिएको थियो । ७० जना एकल महिला र १ सय जना जेष्ठ नागरिकलाई सानिमा बैंकको गाउँपालिकामा रहेको शाखामार्फत भत्ता प्रदान गरेको वडाध्यक्ष देवलाल थिङले बताए ।‘चालु आवको दोस्रो चौमासिकको भत्ता घरदैलोमा गएर पहिलो पटक वितरण गरेको हो,’ उनले भने । बैंक र गाउँपालिकाको कर्मचारी र सम्बन्धित वडाका जनप्रतिनिधि भत्ता वितरण गर्न घरदैलोमा पुग्ने गरेका छन् ।

सरकारी सेवा घरदैलोमै दिने उद्देश्यसहित भक्ता वितरण गर्न थालिएको मोत्तानले बताए । ‘कम्तीमा जनप्रतिनिधि आएपछि नागरिकले केही सहज महसुस गरून् भनेर घरआँगनमा नै सामाजिक सुरक्षाभत्ता वितरण अभियान थालेका हौं,’ उनले भने ।
घरदैलोमा नै भत्ता पाउँदा वृद्धवृद्धा र अपांगता भएकाहरू खुसी भएका छन् ।

नामटार—९ का ८४ वर्षीय दिलबहादुर जिम्बा घरआँगनमा नै वृद्धभत्ता पाउँदा दंग परेका थिए । पहिलो चौमासिकको वृद्धभत्ता लिन उनी लौरोको सहारामा कैलाश गाउँपालिकाको केन्द्र कालिकाटारस्थित सानिमा बैंकमा पुगेका थिए । नामटारबाट बैंक भएको स्थानमा पुग्न मात्र चार घन्टा लागेको थियो ।

१० वटा वडामा विभाजित उक्त गाउँपालिकाले २ दिनमा ३ वटा वडामा भत्ता वितरण गरिसकेको छ । पालैपालोसँगै १० वटा वडामा नै पुगेर भत्ता वितरण गर्ने गापाले जनाएको छ । ज्येष्ठ नागरिक र अपांगता भएका व्यक्तिहरूलाई सहज किसिमबाट भत्ता उपलब्ध गराउन घरदैलोमै बैंकका प्रतिनिधिलगेर बैंकिङ प्रणालीअनुसार सामाजिक सुरक्षा भत्ता वितरण गरिएको छ ।

सानिमा बैंकको शाखा एक वर्ष अघिनै गाउँपालिकाको केन्द्रमा स्थापना भएको थियो । भत्ता उक्त वैकबाट नै दिने गरिएको थियो । भत्ता लिनका वृद्धवृद्धा, अपांगता र एकल महिला डाँडापाखाबाट ४,५ घन्टा पैदल हिँडेर आउनुपर्थ्यो । गाउँपालिका र बैंकको कारणले वृद्ध भत्ता लिन घन्टौ हिँड्नुपर्ने दुःख अन्त्य भएको नामटारका ७७ वर्षीय सोमलाल वलले बतााए ।

प्रकाशित : वैशाख १०, २०७६ ०८:२३
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT