राप्रपा-सरकार वार्ता : संविधानको दायराभित्र बसेर मात्र माग सम्बोधन गर्न सकिने

कान्तिपुर संवाददाता

काठमाडौँ — हिन्दु राज्य स्थापना र धर्मनिरपेक्षता खारेजीको माग गर्दै आन्दोलनरत राप्रपासँग सरकारले मंगलबार वार्ता गरेको छ । सरकारका तर्फबाट कानुन न्याय तथा संसदीय मामिलामन्त्री भानुभक्त ढकालले संविधानको दायराभित्र बसेर मात्र माग सम्बोधन गर्न सकिने जवाफ राप्रपालाई दिएका छन् ।

राप्रपाका तर्फबाट वार्ता समितिका संयोजक दीपक बोहरा र केन्द्रीय सदस्य निरञ्जन थापा मन्त्रीसँगको वार्तामा गएका थिए ।

राप्रपा नेताहरूले पार्टीले उठाएका २२ बुँदे माग पेस गरेको प्रचार विभाग प्रमुख मोहन श्रेष्ठले जानकारी दिए । दुई पक्षबीच छिट्टै अर्को वार्तामा बस्ने सहमति भएको छ ।

प्रकाशित : वैशाख १०, २०७६ २१:२२
प्रतिक्रिया
पठाउनुहोस्

कांग्रेस नेता ताम्राकारको निधन

कान्तिपुर संवाददाता

भैरहवा — पूर्वमन्त्री एवं नेपाली कांग्रेसका नेता रामकृष्ण ताम्राकारको ७६ वर्षको उमेरमा मंगलबार निधन भएको छ । उनी लामो समयदेखि बोनम्यारो क्यान्सरबाट पीडित थिए ।

२००० सालमा भोजपुरमा जन्मिएका उनी लामो समयसम्म भैरहवामा रहेर कांग्रेसबाट राजनीति गर्दै आएका थिए । पञ्चायतकालमा भूमिगत रहनुका साथै जेलनेलसमेत भोगेका थिए । पछिल्लो समय उनी कांग्रेसको केन्द्रीय सदस्य र कार्यवाहक कोषाध्यक्ष थिए ।

०४८ सालको निर्वाचनबाट उनी सांसद बनेका थिए । उनी उद्योग वाणिज्य तथा आपूर्ति र स्वास्थ्यमन्त्रीसमेत भए । ०५१ को मध्यावधि र ०५३ को रूपन्देही २ को उपनिर्वाचनमा पराजित ताम्राकार ०५६ मा भने विजयी भएका थिए । संविधानसभाको निर्वाचन ०६४ र ०७० मा उनी पराजित भएका थिए ।

उनीनिकट महेन्द्रकुमार श्रेष्ठका अनुसार झन्डै एक वर्षअघि ताम्राकारलाई क्यान्सर भएको पत्ता लागेको थियो । सुरुमा भारतको कोलकातामा उपचार गरेपछि फर्केर काठमाडौंमै उपचार जारी थियो । उपचारकै क्रममा काठमाडौंको ललितपुरस्थित अल्का अस्पतालमा मंगलबार अपराहन ४ बजे उनको निधन भएको थियो । अन्तिम श्रद्धाञ्जलीका लागि ताम्रकारको पार्थिव शरीरलाई बुधबार पार्टी केन्द्रीय कार्यालयमा विहान १० बजेदेखि दिउसो १ बजेसम्म राखिने छ । बुधबारनै पशुपति आर्यघाटमा दाहसंस्कार गरिनेछ । ताम्राकारका श्रीमती, एक छोरा र एक छोरी छन् ।

कांग्रेस केन्द्रीय कार्यसमितिको आकस्मिक बैठकले दिवंगत ताम्रकारप्रति उच्चसम्मान प्रकट गर्दै बुधबार देशभरका पार्टी केन्द्रीय कार्यालय बन्द गर्ने निर्णय गरेको छ । कांग्रेसले बुधबार, विहीबार र शुक्रबार पार्टी केन्द्रीय कार्यालय र मातहतका कार्यालयमा पार्टीको झन्डा आधा झुकाउने र १३ दिनसम्म शोक श्रद्धाञ्जली बाहेक पार्टीका सवै कार्यक्रम स्थगित गर्ने निर्णय पनि गरेको छ ।

जागरण अभियानको मिति परिवर्तन

लोकतन्त्र दिवसका अवसर पारेर कांग्रेसले बुधबार ७७ जिल्लामै सुरु गर्न लागेको पार्टीको जागरण अभियान बैशाख २५ गते सुरु हुने भएको छ । कांग्रेस केन्द्र्रीय कार्यालयद्धारा जारी विज्ञप्ति अनुसार १३ दिनसम्म पार्टीको औपचारिक कार्यक्रम नगर्ने निर्णय भएकाले जागरण अभियानको मिति सारिएको हो ।

प्रकाशित : वैशाख १०, २०७६ २१:१९
पूरा पढ्नुहोस्
प्रतिक्रिया
पठाउनुहोस्