सञ्चार विधेयक पास हुन दिदैनौँ : देउवा

'प्रेस स्वतन्त्रता र मानव अधिकार आयोगलाई कमजोर बनाउने सरकारको खेलको नेपाली कांग्रेसले कडा प्रतिवाद गर्छ,' सभापति देउवाले भने, 'बन्द हडताल गर्ने हैन, हामी सदन घेराउ गर्छौ तर विधेयक पास हुन दिदैनौं ।'

पत्रकारहरू स्वयम् पनि जे पायो त्यही लेख्न नचाहने बताउँदै उनले जे पायो त्यही लेख्ने पत्रकार आफैँ समाजमा कमजोर बन्दै जाने हुँदा संविधान विपरीत गएर प्रेसलाई अंकुश लगाउने कानुन निर्माण गर्नु गलत हुने उनले बताए ।

अदालतमा, मानव अधिकार आयोग, प्रेसमा सरकारले अनावश्यक रूपमा हस्तक्षेपकारी भूमिका खेलिरहेको बताउँदै उनले सरकारको यस्तो हस्तक्षेप नेपाली कांग्रेसलाई मान्य नहुने बताए ।

सभापति देउवाले वर्तमान सरकार गठन भएको डेढ वर्ष बित्न लाग्दासमेत कुनै उपलब्धिमूलक काम गर्न नसकेको आरोप लगाए । उनले भने,'खै त सरकार गठन भएको डेढ वर्ष भयो प्रधानमन्त्रीले सिन्को भाँच्या छैनन् ।'