क्यानडाली बाल यौन दुराचारी दोषी ठहर

कान्तिपुर संवाददाता

काठमाडौँ — बाल यौन दुराचार आरोपमा २०७४ चैत २४ मा काभ्रेको मण्डन देउपुर–६ बाट पक्राउ परेका क्यानडाली नागरिक पिटर डग्लसलाई जिल्ला अदालतले दोषी ठहर गरेको छ । केन्द्रीय अनुसन्धान ब्युरोको टोलीले झन्डै १५ दिन लामो निगरानीपछि डग्लसको घरमा छापा मारेर १२ र १४ वर्षका बालकको उद्धार गरेको छ । 

स्ट्रिट किड्स इन्टरनेसनल नामक अन्तर्राष्ट्रिय गैरसरकारी संस्था स्थापना गरेर विश्वव्यापी रूपमा काम गरिरहेका पिटर सन् २००२ मा संयुक्त राष्ट्रसंघको चाइल्ड लेबर कार्यक्रमअन्तर्गत नेपालमा चिफ टेक्निकल एडभाइजरका रूपमा खटिएका थिए । त्यसयता डग्लसका निम्ति नेपाल नियमित गन्तव्य बनेको थियो । अनुसन्धानमा संलग्न ब्युरोका एक अधिकारीका अनुसार उनी बाल यौन दुराचारकै निम्ति बारम्बार नेपाल आउने गरेको देखिन्छ । पिटरले मण्डन देउपुरमा आफ्नै लगानीमा घरसमेत बनाएका थिए । उनले नेपालका विभिन्न बालबालिकासम्बन्धी काम गर्ने संस्थासँग औपचारिक–अनौपचारिक सम्बन्धसमेत बनाएका थिए ।

यूएन ह्याबिट्याटका निम्ति अफगानिस्तान प्रतिनिधिका रूपमा समेत काम गरेका पिटरले आफ्नै घरमा काम गर्न बस्नेका छोरा र उनका आफन्तका छोरामाथि यौन शोषण गरेको आरोपमा ब्युरोले मुद्दा अगाडि बढाएको थियो । काभ्रे जिल्ला अदालतका स्रेस्तेदार ठाकुर त्रितालका अनुसार न्यायाधीश अर्जुन अधिकारीको एकल इजलासले पिटरलाई दोषी ठहर गरेको हो । उनका अनुसार अदालतले असार २३ गते सजाय सुनाउनेछ ।

प्रकाशित : जेष्ठ २९, २०७६ २०:३३
प्रतिक्रिया
पठाउनुहोस्
ADVERTISEMENT

हज समितिको टिकट खरिदमा ३८ लाख भ्रष्टाचार

१० जनाविरुद्ध मुद्दा, जनही ३८ लाख बिगो मागदाबी
कान्तिपुर संवाददाता

काठमाडौँ — अख्तियार दुरुपयोग अनुसन्धान आयोगले हज कार्यसम्पादन उपसमिति (२०७४) का अध्यक्ष मोहम्मद शोएबसहित १० जनाविरुद्ध बुधबार विशेष अदालतमा भ्रष्टाचार मुद्दा दायर गरेको छ । २०७४ सालमा उपसमितिका अध्यक्ष शोएबसहितले सार्वजनिक खरिद ऐनविपरीत हजयात्रीका लागि मक्कामदिना जाने–आउने हवाई टिकटका लागि दोस्रो कम अंक कबोल गर्ने हिना ट्राभल्स एन्ड टुर्सको बोलपत्र स्वीकृत गरी ३८ लाख रुपैयाँ अनियमितता गरेकाले उनीहरूविरुद्ध मुद्दा दायर गरिएको अख्तियारले जनाएको छ ।

युनिभर्सल टुर्स एन्ड ट्राभल्सले ८८ हजार ९९५, हिना ट्राभल्स एन्ड टुर्सले ९० हजार र सिलिंक्स ट्राभल्स एन्ड टुर्सले ९५ हजार ३ सय रुपैयाँमा प्रतियात्रु हवाई टिकट उपलब्ध गराउने बोलपत्र पेस गरेकामा हज कार्यसम्पादन उपसमितिका पदाधिकारी र हज समितिको सचिवालयका सदस्यसचिवले कानुनविपरीत दोस्रो बढी रकम कबोल गरेको हिना ट्राभल्स एन्ड टुर्सको प्रस्ताव स्वीकृत गरी ३८ लाख रुपैयाँ हिनामिना गरेको अख्तियारले अभियोगपत्रमा उल्लेख गरेको छ ।

सार्वजनिक खरिद ऐनमा सबैभन्दा कम रकम कबोल गरेको कम्पनीको प्रस्ताव स्वीकृत गर्नुपर्ने प्रावधान छ । ‘२०७४ सालमा हजयात्रीका लागि हिना ट्राभल्स एन्ड टुर्सको सट्टा कम रकम कबोल गरेको युनिभर्सल टुर्स एन्ड ट्राभल्सको हवाई टिकट खरिद गरेको भए ३८ लाख रुपैयाँ कम पर्थ्यो’, अख्तियार स्रोतले भन्यो, ‘हज कार्यसम्पादन उपसमितिका पदाधिकारी, सचिवालयका सदस्यसचिव र लेखापालले मिलेमतोमा दोस्रो बढी रकम कबोल गरेको हिना ट्राभल्स एन्ड टुर्सको हवाई टिकट खरिद गरेर ३८ लाख रुपैयाँ भ्रष्टाचार गरेको देखियो ।’

मुद्दा दायर गरिएकामा हज कार्यसम्पादन उपसमितिका अध्यक्ष शोएब, उपसमितिका सदस्यहरू अताबुल अन्सारी, मोहम्मद इब्राहिम राइन, मोहम्मद जबारदिन मियाँ, जमिला मियाँ, मोमिना बानु मुस्लिम, मजिबुल शेष, हज समितिका सदस्यसचिव एवं गृह मन्त्रालयका सहसचिव भीमराज पोखरेल, लेखापाल तिलकराज पन्त र हिना ट्राभल्स एन्ड टुर्सका सञ्चालक दाउद हुसैन छन् । उनीहरूलाई जनही ३८ लाख रुपैयाँ बिगो कायम गरी जरिवाना र जेल सजाय गर्न अख्तियारले मागदाबी गरेको छ ।

प्रकाशित : जेष्ठ २९, २०७६ २०:३०
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT