स्थानीय तह प्रदेश मातहत ल्याउनुपर्छ : मन्त्री यादव

‘स्थानीय तह प्रादेशिक क्षत्राधिकारभित्र रहनुपर्छ,’ उनले भने, ‘स्थानीय तहलाई प्रदेश सरकारको इकाईको रूपमा राख्नुपर्छ । तर अहिले प्रदेश हुँदाहुँदै पनि स्थानीय तहलाई संघीय सरकार मातहत राखेको छ ।’

स्थानीय तह संघीय सरकार मातहत राख्नाले एक दिन मुलुकमा विपद् निम्तिने मन्त्री यादवको भनाइ थियो । सरकारले संघीयतालाई बलियो बनाएर अघि बढ्न नसकेको उनले बताए । ‘संघीयतालाई बलियो बनाएर अघि बढ्नका लागि सरकारले पहिलो स्टेपमा संविधान संशोधन गरेर अघि बढ्नुपर्छ,’ उनले भने, ‘संविधान संशोधन गरेर अधिकार सम्पन्न प्रदेश निर्माण गर्न स्रोत साधनमाथिको अधिकार, प्रशासनिक अङ्ग र निकाय ल्याउनुपर्छ अनि मात्रै सङ्घीयता बलियो हुन्छ ।’

यादवले स्थानीय तहको निर्वाचन गैरदलीय आधारमा हुनुपर्ने बताए । राजनीतिक दलको आधारमा प्रादेशिक र सङ्घीय तहको निर्वाचन मात्रै हुनुपर्ने उनको भनाई थियो ।

यादवले सरकारबाट अहिले नै हटिसक्ने अवस्था नआएको प्रस्ट पारे । ‘सरकारबाट अहिले नै हटिसक्ने स्थितिमा पुगिसकेका छैनौँ,’ उनले भने, ‘हाम्रो २/३ वटा कन्सर्न छ । नेकपासँग भएको सहमति संविधान संशोधन र राष्ट्रिय मुद्दाहरूलाई सम्बोधन हुने भनेपछि हामी सरकारमा सहभागी भएका हौँ । त्यो हुन्छ की हुँदैन भन्ने कुरामा अहिले शंका उपशंका र द्वविधाहरु उत्पन्न भएको छ ।’

उनले नेत्रविक्रम चन्द नेतृत्वको नेकपा माओवादीले विस्फोट र प्रहरीसँग दोहोरो भिडन्त गरेर प्रचार भइसकेकाले अब मूलधारको राजनीतिमा आइसक्नु पर्ने बताए ।