बाढीको प्रभाव : सुनसरी–मोरङ औद्योगिक करिडोर ४ दिनदेखि ठप्प

जोगवनी नाकाबाट आयात निर्यात घट्यो
विनोद भण्डारीे

विराटनगर — अविरल वर्षा पछि मोरङको लोहन्द्रा, जुडी र सुनसरीको बुढी तथा टयाङग्रा खोलामा आएको बाढीले सुनसरी मोरङ औद्योगिक करिडोरमा करोडौंको क्षति पुर्‍याएको छ । करिडोरमा रहेका पाँच सय बढी उद्योग डुबानका कारण बिहीबारदेखि बन्द छन् ।

करिडोरका प्रायः उद्योगमा पानी पस्दा गोदाममा रहेका उत्पादित वस्तु र कच्चा पदार्थ नष्ट भएको छ । मोरङ व्यापार संघका अध्यक्ष प्रकाश मुन्दडाले उत्पादित वस्तु र कच्चा पदार्थ पानीमा डुब्दा सुनसरी मोरङ करिडोरका उद्योगमा करोडौंको क्षति भएको बताए ।

मोरङको लोहन्द्रा र जुडी खोलाको बाढी पस्दा कटहरीमा रहेका दर्जन बढी उद्योग जलमग्न भएका छन् । त्यहाँ रहेका क्वालिटी समूहका साबुन, चाउचाउ, घ्यूसहित सेलो तेल, पेन्टिङ उद्योग, जुट मिलको गोदाममा पानी पसेर क्षति पुगेको सम्बद्ध उद्योगीको दाबी छ ।

त्यसैगरी सुनसरीको टुयाङग्रा खोलाको बाढीले इटहरी र खनार क्षेत्रका उद्योग डुबानमा परेका छन् । सुनसरीकै बुढी खोलाको बाढीले दुहबी क्षेत्रका उद्योग डुबानमा परेका छन् । अवव्यवस्थित वस्ती, पानीको निकास नहुनु र नदी नियन्त्रण नहुँदा सुनसरी मोरङ करिडोरका उद्योगले हरेक वर्ष करोडौको क्षति व्यहोर्नु परेको उद्योग वाणिज्य महासंघका केन्द्र्रीय सदस्य अविनाश बोहोराले बताए ।

‘करिडोरका कुनै पनि उद्योग डुबानबाट जोगिएका छैनन् । अधिकांश उद्योगको भौतिक संरचनामा क्षति पुगेको छ । हरेक उद्योगका उत्पादित वस्तु र कच्चा पदार्थ नष्ट भएका छन्,’ बोहोराले भने, ‘तीनदिन देखि सबै उद्योग बन्द छन । मजदुर बेरोजगार बनेका छन् ।’ करिडोरमा प्रत्यक्ष अप्रत्यक्ष झण्डै दुईलाख मजदुर कार्यरत रहेको बोहोराको भनाई छ ।
उद्योग र गोदाम डुबानमा परेपछि जोगबनी नाकाबाट हुने आयात–निर्यात पनि तीनदिनयता घटेको विराटनगर भन्सारको तथ्यांक छ । भन्सारका सूचना अधिकृत मणिराम पौडेलका अनुसार तीनदिन अघिसम्म दैनिक सरदर ६० ट्रक औद्योगिक उत्पादन निकासी हुने गरेकोमा तीनदिन देखि दैनिक १५–२० ट्रकमात्र उत्पादन निकासी भएको छ । आयात भएको कच्चा पदार्थ पनि उद्योगीले भन्सारबाट ल्याउन सकेका छैनन् ।

प्रकाशित : असार २९, २०७६ १४:५१
ADVERTISEMENT
ADVERTISEMENT
प्रतिक्रिया
पठाउनुहोस्

प्रदेश २ मा बाढी र डुबानमा १० को मृत्यु

सन्तोष सिंह

जनकपुर — प्रदेश २ मा बाढी र डुवानमा १० जनाको मृत्यु भएको छ  । लगातारको अविरल वर्षाका कारण आएको बाढीमा धनुषा, रौतहट, बारा र पार्सामा २/२ जना र महोत्तरी, सिरहामा १/१ जना गरी १० जनाको मृत्यु भएको प्रदेश २ प्रहरी कार्यालयका प्रहरी नायव उपरीक्षक ज्ञानकुमार महतोले बताए । प्रदेशको ८ जिल्लामा १० जनाको मृत्यु र ४ जना बेपत्ता भएको प्रहरीले जनाएको छ ।

धनुषाको जनकनन्दनी गाउँपालिकामा डुबेर मृत्यु भएको अवस्थामा पहिचान नखुलेको करिब ६५ वर्षीय पुरुषको शव फेला परेको छ । धनुषाकै गणेशमान चारनाथ नगरपालिकाको चारनाथ खोलामा डुबेर मृत्यु भएको ५५ वर्षीय पुरुषको शव फेला परेको प्रहरीले जनाएको छ । वीरगञ्ज महानगरपालिका-१३ का १४ वर्षीय अनुप पटेलको शव सबैठा खोलामा फेला परेको छ । पर्साको पर्सागढी नगरपालिका-१ का १० वर्षीय निखिल पटेलको सिंयाही खोलामा बगेर मृत्यु भएको छ ।

बारा, परवानीपुर गाउँपालिक-१ का अरबिन्द्र यादवको १८ महिने छोरा बिकी यादवको घर पछाडी जमेको पानीमा डुबेर मृत्यु भएको छ । बारा, कलैया-१३ मा बाटो बनाउन खनिएको खाल्डोमा जमेको पानीमा डुबेर स्थानीय १३ वर्षीय अजित साहको मृत्यु भएको छ । रौतहट, गौर-३ का ४० वर्षीया शिवमंगल पटेलको टिकुलिया नदीमा डुबेर मृत्यु भएको छ । गौरकै उमेश राउतको समेत डुबेर मृत्यु भएको छ ।

बाख्रा चराउन गएकी सिरहा मिर्चैया नगरपालिका-४ की १० वर्षीया रागनी कुमारी महतोको खाल्डोमा जमेको पानीमा डुबेर मृत्यु भएको छ । महोतरी, भंगहा नगरपालिका–४ रातु खोलामा पहिचान नखुलेको करिब १५ वर्षीय युवकको शव फेला परेको छ ।

प्रकाशित : असार २९, २०७६ १४:३०
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT