वीपी प्रतिष्ठानका पूर्वउपकुलपति बलभद्रप्रसाद दाससहित ८ जनाविरुद्ध भ्रष्टाचार मुद्दा

कान्तिपुर संबाददाता

काठमाडौँ — अख्तियार दुरुपयोग अनुसन्धान आयोगले सामान खरिदमा अनियमितता गरेको आरोपमा धरानको बीपी कोइराला स्वास्थ्य विज्ञान प्रतिष्ठानका पूर्वउपकुलपति बलभद्रप्रसाद दासलगायत ८ जनाविरुद्ध भ्रष्टाचार मुद्दा दायर गरेको छ । 


अख्तियारले अस्पताल निर्देशक अरविन्दकुमार सिन्हा, तत्कालीन रजिस्ट्रार नन्दकुमार थापा, रजिस्ट्रार तुलबहादुर श्रेष्ठ, लेखा प्रमुख दिनेशराज दाहाल, डेपुटी म्यानेजर अमिल श्रीवास्तव, उपकरण सप्लायरहरू चेतन अग्रवाल र उमेश अग्रवालविरुद्ध समेत भ्रष्टाचार मुद्दा दायर गरेको छ।

बीपी दासमाथि ४ करोड ८ लाख, अस्पताल निर्देशक सिन्हामाथि ३ करोड ७५ लाख, तत्कालीन रजिस्ट्रार थापाविरुद्ध एक करोड ९६ लाख, रजिस्ट्रार श्रेष्ठविरुद्ध ५६ लाख रुपैयाँ बिगो मागदाबी गरिएको छ।

यस्तै, लेखा प्रमुख दाहालमाथि २ करोड ३४ लाख र डेपुटी म्यानेजर श्रीवास्तवमाथि १ करोड ७४ लाख रुपैयाँ अख्तियारले बिगो मागदाबी गरेको छ। सप्लायर्सहरू चेतन अग्रवालविरुद्ध एक करोड ४ लाख र उमेश अग्रवालविरुद्ध ६० लाख रुपैयाँ बिगो मागदाबी गरिएको छ।

अख्तियारले अभियोगपत्रमा प्रतिष्ठानका पदाधिकारीमाथि कम रकम कबोल गर्ने बोलपत्रका आधार र तथ्य विश्लेषण नगरी बढी कबोल्ने पक्षलाई ठेक्का दिएको उल्लेख गरेको छ। लेखा प्रमुख दाहाल र डेपुटी म्यानेजर श्रीवास्तवमाथि विभिन्न मितिमा बढी मूल्यमा सामान खरिद गरेको आरोप छ। सप्लायरहरूलाई खरिदका क्रममा मिलेमतो गरी भ्रष्टाचार गरेको आरोप लगाइएको छ।

प्रकाशित : असार ३०, २०७६ १९:२०
ADVERTISEMENT
प्रतिक्रिया
पठाउनुहोस्
ADVERTISEMENT

बाढीबाट प्रदेश १ मा मात्रै साढे ८१ करोडको क्षति

राजु चौधरी

काठमाडौँ — वर्षाका कारण प्रदेश १ मा कृषि तथा पशुपन्छीतर्फ साढे ८१ करोड रुपैयाँको क्षति भएको छ । कृषि तथा पशुपन्छी विकास मन्त्रालयका अनुसार पशुपन्छी तर्फ २५ लाख ८० हजार र बालीतर्फ ८१ करोड २८ लाख  ९२ हजार रुपैयाँको क्षति भएको हो । 

‘मकै, तरकारी,चैते धान, वर्षे धान र अलैंची गरी करिब ८१ करोड २८ लाख ९२ हजार र कुखुराका चल्ला, कुखुरा, गाई,बंगुर गरेर २५ लाख ८० हजार क्षति भएको छ,’ मन्त्रालयले तयार पारेको विवरणमा भनिएको छ । मन्त्रालयको तथ्याङक अनुसार प्रदेश १ मा २४ हजार ४६ घरधुरी प्रभावित भए ।

वर्षाले सबैभन्दा बढी प्रदेश २ प्रभावित भएको छ । प्रदेश २, ३ र ५ को विवरण संकलन भइ नसकेको मन्त्रात्रलयले जनाएको छ । प्रदेश ४ मा वर्षातका कारण क्षति भएको विवरण प्राप्त नभएको तर अन्य हावाहुरी र असिनाका कारण क्षति भएको विवरणमा उल्लेख छ । विवरण अनुसार प्रदेश ६ र ७ मा भने वर्षाले कृषि र पशुपन्छीतर्फ क्षति भएको छैन ।

प्रकाशित : असार ३०, २०७६ १९:१२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT