समाजवादको नयाँ मोडेल नेपालले विकास गर्नुपर्छ : दाहाल

समाजवादको नयाँ मोडेल निर्माण गर्न नेपाल कम्युनिष्ट पार्टीलाई अवसर प्राप्त भएको अध्यक्ष दाहालको भनाइ छ । ‘पार्टी एकता सुदृढ गरी सरकारको काम प्रभावकारी बनाएर गुणात्मक ढंगले जनताको मन जितेर मात्रै त्यो अवसर पुरा गर्न सकिन्छ’, उनले भने ।

अध्यक्ष दाहालले मानवजातीको भविष्य समाजवादमा मात्रै रहेको दाबी गरे । ‘अहिले संसारमा धनी र गरिबको खाडल झन् फराकिलो भएको छ । गरिबीको दुष्चक्रमा अर्बौ मानिसहरु पिल्सिएका छन् । यो परिस्थितिमा मानवजातीको भविष्य भनेको समाजवादमा मात्रै छ ।’

सामाजिक न्यायबिनाको केही मान्छे धनी हुने र बहुसंख्यक गरिब हुने प्रणालीले मानव जातीको कल्याण गर्नै नसक्ने दाहालको जिकिर छ । ‘सामाजिक न्यायबिना केही मान्छेहरु मात्रै धनी हुने र बहुसंख्यक गरिब हुने सिस्टमले मानव जातीको कल्याण गर्नै सक्दैन ।’

सरल, पारदर्शी, इमानदारिता र स्वभाविकता नरबहादुर कर्माचार्यको विशेषता भएको उल्लेख गर्दै अध्यक्ष दाहालले अहिले राजनीतिक आन्दोलन र कम्युनिष्ट आन्दोलनमा पनि धेरै किसिमका विसंगतीहरु देखा परेको बताए । ‘त्यसका विरुद्ध पनि संघर्ष गर्नुपर्छ’, उनले भने । उनले भदौबाट नेकपाले राष्ट्रिय अभियान थाल्ने पनि बताए ।

दाहालले जनयुद्ध गर्न नरबहादुर कर्माचार्यले प्रेणित गरेको पनि सुनाए । उनले भने, ‘नरबहादुर कर्माचार्यको घरमा बसेर नै जनयुद्धको तयारी गरेका हौं ।’