एसपी दानबहादुर मल्ललाई १२ घण्टाभित्र चितवन छोड्न प्रदेश प्रहरी कार्यालयको आदेश

३ नम्बर प्रदेश प्रहरी प्रमुख शेरबहादुर बस्नेतका अनुसार ४ गते नै सरुवा भए पनि हालसम्म रवाना लिएर नगएकोले तुरुन्त सरुवा गरिएको स्थानमा जान पत्र पठाइएको हो । 'सरुवा भएपछि भनेको स्थानमा जानलाई केही दिन लाग्छ । तर उहाँले किन बढी समय लिनुभयो त्यो थाह भएन । तर हामीले उहाँलाई रवाना लिन भने पत्र पठाएका छौं,' उनले भने ।

प्रहरी प्रधान कार्यालयले यूएन जगेडा, नक्सालमा कार्यरत गंगा पन्तलाई चितवन पठाउँदै त्यहाँ कार्यरत दानबहादुर मल्ललाई महानगरीय विमानस्थल सुरक्षा प्रहरी कार्यालय, गौचरमा सरुवा गरेको थियो । सरुवामा असन्तुष्टि जनाउँदै मल्लले सरुवा गरिएको स्थानमा जान मानेका छैनन् ।