बिहान बालुवाटारमा भएको भेलाबारे बुझ्न ललितपुरमा भेला : रावल

उनले भोलि बिहान पनि अरु नेताहरुसँग छलफल र भेला हुने बताए । 'विधि र नियमअनुसार पार्टी चलोस् भन्ने हाम्रो भनाई हो । तर, स्थायी समिति चलिरहेका बेला प्रधानमन्त्री तथा अध्यक्षले नै छुट्टै भेला गरेपछि त्यहाँ के भएको हो ? त्यसको आशय के हो भन्ने बुझ्नका लागि यो भेला भएको हो,' ललितपुरको एक होटलमा भएको भेलाबाट बाहिर निस्केर रावलले भने । उनले प्रणालीलाई पछ्याउनु पर्ने र कमिटीका निर्णय दुवै अध्यक्षले मान्नुपर्ने भेलाको निष्कर्ष भएको पनि बताए ।

'पार्टी पद्दतिमा चल्नु पर्‍यो । कसैले पनि यस्ता अभिव्यक्ति दिनु भएन जसले पार्टीको छवि नष्ट हुन्छ, पार्टी कमजोर हुन्छ, जनता र कार्यकर्तामा निराशा छाउँछ भन्नेमा हामी सबैको जोड हो,' उनले भने । उनले यसअघि पनि पार्टीको विधि र विधानअनुसार चल्ने सहमति भएको तर त्यसको पालना नभएको तथा २० जना स्थायी कमिटीका सदस्यले लिखित रुपमा बैठक बोलाउन माग गर्दा बैठकसमेत नबोलाइएको भन्दै असन्तुष्टि प्रकट गरे ।

रावलले अध्यक्ष र प्रधानमन्त्रीबाट केपी शर्मा ओलीले राजीनामा दिनुपर्ने विषय स्थायी कमिटी बैठकमै उठेको र छलफलमा रहेकाले त्यसबारे ललितपुर भेलामा खासै कुरा नभएको बताए । 'उहाँले जुन किसिमले हाम्रो स्वतन्त्रता, आत्मनिर्णयको अधिकार तथा नेपाल र नेपाली जनताका विषयमा नेपाल आफैंले र जनताले बहुमत दिएको पार्टी नेकपाले निर्णय गर्नसक्छ भन्ने कुरामा समेत आघात पुग्नेगरी अभिव्यक्ति दिनुभयो त्यो पनि छलफलकै क्रममा छ,' उनले भने । प्रधानमन्त्री ओलीले आइतबार मदन भण्डारी फाउन्डेसनको कार्यक्रममा नेपालको नयाँ नक्सा जारी गरेपछि आफ्नो सरकार ढलाउन नेकपाकै केही नेता तथा भारतीय राज्यसंयन्त्रले लागेको बताएका थिए । उनले यसका लागि भारतीय दूतवासाले काठमाडौंका होटेलहरुमा बैठक गरिरहेको पनि बताएका थिए ।

उनले भेला पार्टी फुटाउनका लागि नभइ एकजुट गर्नका लागि भएको पनि बताए । 'कतिपय मानिसहरुले पार्टी निर्णय मान्नुपर्ने अवस्था आएमा किन मान्ने ? बरु पार्टी फुट्न सक्छ भनेर बाहिर जुन किसिमले हल्लाहरु चलाइयो त्यो गलत हो । जसरी नेकपा एमाले भन्ने पार्टी नै दर्ता भएको कुरा आयो,' रावलले भने, 'यस्तो अवस्थालाई रोक्न र पार्टीलाई बलियो बनाउन हामी चाहन्छौं । पहिले पनि पार्टी फुटाउन सजिलो हुने विधेयक ल्याउँदा हामीले कदम चालेका थियौं ।'

रावलले यो भेलालाई गुट भेला मान्न पनि इन्कार गरे । 'यो गुट भेला होइन । बालुवाटारमा छलफल भएपछि यहाँ पनि भएको हो । त्यस भेलामा सहभागि साथीहरु र मन्त्रीहरु पनि यहाँ हुनुहुन्थ्यो,' उनले भने । भेलाले कसरी अघि बढ्ने निर्णय गर्‍यो त भन्ने प्रश्नमा उनले भने, 'कसरी अघि बढ्ने भन्नेबारे त स्थायी समितिले निर्णय गर्छ । स्थायी समिति चलिरहेका बेला निर्णय स्थायी समितिले नै गर्छ ।'

उनका अनुसार यो भेलामा मन्त्रीहरुसहित ३० जना नेकपा नेताहरु सहभागि थिए । अध्यक्ष दाहालले बोलाएको भेलामा प्रधानमन्त्री ओलीसँग रुष्ट सचिवालय सदस्यहरु माधवकुमार नेपाल, झलनाथ खनाल, बामदेव गौतम, नारायणकाजी श्रेष्ठ र रामबहादुर थापालगायत स्थायी समिति सदस्यहरु उपस्थित थिए ।