हुलाकी सडक निर्माणमा एसएसबीको अवरोध
कञ्चनपुर — कञ्चनपुरको दक्षिणी क्षेत्रमा हुलाकी सडक निर्माणमा भारतीय सीमा सुरक्षा बल (एसएसबी) ले पुन: अवरोध गरेको छ । बेलौरी नगरपालिका–८ पचुई क्षेत्रमा निर्माणाधीन सडक आफ्नो भूभागमा पर्ने भन्दै भारतको केन्द्रीय अर्धसैनिक बल (एसएसबी) ले अवरोध गरेको हो । आइतबार भारत उत्तरप्रदेशको पिलिभित जिल्लाका एसडीएम र एसएसबीका डीआईजीसहितको टोलीले निर्माणस्थलमै पुगेर काममा अवरोध गरेको हो ।
३८ नम्बर सीमा पिलरनजिकैको उक्त क्षेत्र नयाँ नापीअनुसार भारतमा पर्ने दाबी गर्दै एसडीएम र डीआईजीले काम रोक्न भनेको स्थानीयले बताए ।
यसअघि पनि एसएसबीले उक्त क्षेत्र भारतमा पर्ने भन्दै लामो समय हुलाकी सडक निर्माणको काममा अवरोध गरेको थियो । ‘यो क्षेत्र हाम्रोमा पर्छ भन्दै काम रोक्न भनेका छन्,’ बेलौरी नगरपालिकाका प्रमुख पोतीलाल चौधरीले भने, ‘३८ नम्बर पिलरको पूर्वी र दक्षिणी क्षेत्र भारतमा पर्ने उनीहरुको दाबी छ ।’
उनले आइतबार ठूलो संख्यामा सुरक्षाकर्मीसहित आएका दुवै जनालाई तत्काल काम नरोकिने भन्दै फिर्ता पठाइए पनि विवाद माथिल्लो तहबाटै समाधान हुनुपर्ने बताए । यसबारे प्रमुख जिल्ला अधिकारीसँंग पनि तत्काल छलफल गरेर समाधान गर्न आग्रह गरिएको उनले बताए ।
उक्त क्षेत्रमा अहिले ग्राभेलिङको काम चलिरहेको छ । यसअघि पनि एसएसबीकै अवरोधका कारण लामो समय काम हुन नसक्दा निर्माणले गति लिन सकेको छैन । सशस्त्र प्रहरीको ३५ नम्बर गणका एसपी वीरसिंह साहूले सडक निर्माणका क्रममा सामान्य विवाद देखिएको र समाधानका लागि छलफल चलिरहेको बताए । उनका अनुसार ३८ र ३९ नम्बर पिलरको बीचको भूभाग भारतीय पक्षले आफ्नो क्षेत्रमा पर्ने दाबी गरेको छ । यही कारण निर्माण रोक्न एसएसबीको टोली आएको उनले बताए ।
फागुनमा बेलौरी नगरपालिकाको भुडा क्षेत्रमा नेपाल–भारत संयुक्त सर्वे टोलीले काम सुरु गरेको थियो । तर उक्त क्षेत्रमा महाकाली सिँचाइ आयोजनासहित थुप्रै नेपालीको जमिन भारततर्फ जान थालेपछि स्थानीयले विरोध गरेपछि टोलीले काम स्थगित गरेको थियो ।
उक्त क्षेत्रमा नेपालतर्फ दर्ता रहेका जमिनसमेत भारतमा पर्ने देखिएपछि स्थानीयले विरोध गरेका हुन् । भारतीय पक्षले निर्माण गरेका पिलरहरुसमेत स्थानीयले भत्काएका थिए । कञ्चनपुरका प्रमुख जिल्ला अधिकारी नूरहरि खतिवडाले भारतीय पक्षबाट सडक निर्माणको अवरोध भएपछि हाललाई उक्त क्षेत्रमा निर्माण कार्यअघि नबढाउने सहमति भएको छ । नेपाल र भारतको संयुक्त टोलीले सीमाको वास्तविक अवस्था बुझ्नका लागि केन्द्रमा पत्राचार गरिने प्रजिअ खतिवडाले बताए ।
निर्माण निकै सुस्त
कञ्चनपुरमा हुलाकी सडक निर्माणको काम तीन चरणमा भइरहेको छ । अहिले एसएसबीले अवरोध गरेको क्षेत्र बेलौरीको बुटाबारीदेखि बेलडाडी गाउँपालिकासम्म २० किलोमिटर सडक निर्माणका लागि बाबाहंस निर्माण कम्पनीसँग ४१ करोड ७६ लाखमा २०७३ पुसमा ठेक्का सम्झौता भएको हो । २०७६ असारमा म्याद सकिएपछि ९ महिना थप गरिएको म्याद पनि चैतमा सकिएर साउनसम्म दोस्रोपटक म्याद थप भएको छ ।
यो अवधिमा पनि काम सम्पन्न हुने सम्भावना नरहेको हुलाकी सडक आयोजनाका इन्जिनियर पदम मडैले बताए । उनका अनुसार तीनवटै चरणमा करिब ७० प्रतिशत भौतिक प्रगति भएको छ । पहिलो र तेस्रो चरणमा बढी भए पनि दोस्रो चरणमा कम रहेको उनले बताए ।
प्रकाशित : असार २३, २०७७ ११:३६