इलामको मतगणना आजै राति, बझाङको आइतबार : आयोग

आयोगका प्रवक्ता रामदत्त पाण्डेयका अनुसार इलामको मतगणनाको तयारी भइरहेको छ । मतदानको विवरण आयोगको सूचना प्रणालीमा प्रविष्टी हुनेक्रम जारी रहेको उनले जानकारी दिए । हालसम्मको विवरणअनुसार इलाम जिल्ला प्रतिनिधिसभा सदस्य निर्वाचन क्षेत्र २ मा करिब ५८ प्रतिशत मतदान भएको आयोगले जानकारी दिएको छ । उपनिर्वाचनका लागि इलाम जिल्ला प्रतिनिधिसभा सदस्य निर्वाचन क्षेत्र नम्बर २ मा १ लाख १५ हजार ८ सय ८९ मतदाता थिए ।

इलाम निर्वाचन क्षेत्र नम्बर २ को मतगणनाबारे आयोगले भनेको छ, 'मतदान सम्पन्न भएका सबै मतदानस्थलबाट मतपेटिका मुख्य निर्वाचन अधिकृतको कार्यालयमा ढुवानीको कार्य भइरहेको छ । मुख्य निर्वाचन अधिकृतको कार्यालय र स्थानीय प्रशासनबाट प्राप्त जानकारीअनुसार इलाम जिल्ला प्रतिनिधिसभा सदस्य निर्वाचन क्षेत्र नम्बर २ का मतपेटिका मतगणनास्थल इलाम नगरपालिका वार्ड नम्बर ७ स्थित गौतम बुद्ध सभागृहमा राति ११:०० बजेभित्र आइपुग्नेगरी व्यवस्था मिलाइएको छ ।' मतपेटिका मतगणनास्थलमा ल्याइसकेपछि लगत्तै मतगणना थालिने आयोगले जनाएको छ ।

बझाङको प्रदेशसभा उपनिर्वाचनको मतगणना भने आइतबारमात्रै हुने आयोगले जनाएको छ । करिब ५० प्रतिशत मतदान भएको बझाङ प्रदेशसभा उपनिर्वाचनमा ६१ हजार ७ सय ४८ मतदाता रहेका थिए ।

'बझाङका मतपेटिका मतगणनास्थल बझाङ जिल्ला अदालत चैनपुरमा हवाईमार्गबाट समेत ढुवानी गर्नुपर्ने भएकोले मिति २०८१/१/१६ गते बिहान १० बजेभित्र ढुवानी भइसक्ने गरी आवश्यक व्यवस्था मिलाइएको छ ।

बझाङ जिल्ला साइपाल गाउँपालिकाको ३ स्थानका मतपेटिका नेपाली सेनाको हेलिकप्टरबाट जिल्ला सदरमुकामसम्म ल्याउने व्यवस्था गरिएको छ,' आयोगले भनेको छ । मतपेटिका ल्याइसकेपछि आइतबार मतगणना सुरु गरिने आयोगले जनाएको छ ।

आयोगले बझाङ र इलाममा शान्तिपूर्ण एवं उत्साहजनकरूपमा उपनिर्वाचन सम्पन्न भएको जनाएको छ ।