सदरखोरदेखि संसद सचिवालयसम्म रेशम चौधरीको यात्रा [फोटोफिचर]

मकर श्रेष्ठ

काठमाडौँ — डिल्लीबजार सदरखोरबाट बा १ झ ७७०७ नम्बरको टाटा मोबाइलको बीच सिटमा राखेर ल्याइएको थियो, रेशम चौधरीलाई । गलाभरी खादासहित पूर्वेली ढाकाको कुर्था, टोपी, गलबन्दी र सेतो सुरुवाल लगाएर संसद् भवन प्रवेश गरेका थिए उनी । प्रहरीको गाडीमा अघि-अघि उनी थिए भने उनका श्रीमती र छोरा पछि पछि अर्को गाडीमा ।


प्रकाशित : पुस १९, २०७५ १६:२७

संसद्को कृषि समितिको हलमा शपथ कार्यक्रम राखिएको थियो । शपथभन्दा उनी २० मिनेटअघि पुगेका थिए । उनी भित्र छिरे पनि उनका परिवारलाई भने परिचय पत्र नभएकोले भित्र छिर्न केही समय लाग्यो । २ बजेर ५० मिनेटतिर महन्थ ठाकुर, राजेन्द्र महतोलगायत राजपाका अन्य सांसदहरु संसद् भवन बानेश्वरबाट बैठक सकाएर सीधै शपथ कार्यक्रममा पुगेका थिए । त्यसपछि उनका श्रीमती र छोरा शपथ कक्षमा छिरे । उनले छोरालाई अंगालो हाल्दै चुम्बन गरे, टाउको सुमसुमाए ।

Citizen

३ बजेर २ मिनेटमा सभामुख कृष्णबहादुर महराले चौधरीलाई शपथ गराए । उनले थारु भाषामै शपथ लिए । शपथ गराइरहँदा उनकी श्रीमती रन्जिता श्रेष्ठ उभिएर हेरिरहेकी थिइन् । जब शपथ सकिएपछि महराले माला लगाइदिए । राजपाका नेताहरुले माला, खादा र टीका लाइदिए, एकापसमा खुसी साटासाट गरे । नेताहरुबीच तस्बिर खिचे । चौधरीले सञ्चारकर्मीसँग छोटो धारणा राख्दै भने, 'न्यायालयले पनि मलाई न्याय दिनेछ ।' शपथपछि चौधरीलाई प्रहरीकै गाडीमा डिल्लीबजार कारागार लगिएको छ ।

तस्बिरहरु: इलिट जोशी, बिजु महर्जन/कान्तिपुर

प्रतिक्रिया
पठाउनुहोस्

शपथ लिएपछि जेल जाने पहिलो व्यक्ति मै हुँ : चौधरी

कान्तिपुर संवाददाता

काठमाडौँ — टीकापुर घटनाका मुख्य अभियुक्तका रुपमा पुर्पक्षका लागि थुनामा रहेका रेशम चौधरीले सांसद पदको शपथ ग्रहण गर्न पाउँदा खुसी लागेको बताएका छन् ।

संसद् सचिवालय सिंहदरबारमा सभामुख कृष्णबहादुर महराबाट शपथ लिएपछि चौधरीले खुसी व्यक्त गरेका हुन्। उनले शपथ ग्रहणपछि जेल जाने पहिलो व्यक्ति भएको समेत दाबी गरे। भने, ‘शपथ लिएपछि जेल जाने पहिलो व्यक्ति मै हुँ।’

राजपाको सांसद चौधरी गत निर्वाचनमा कैलाली क्षेत्र नं १ बाट निर्वाचित भएका थिए। शपथ ग्रहणका लागि डिल्लीबजार कारागारबाट कडा सुरक्षाबीच उनलाई संसद् सचिवालय पुर्‍याइएको थियो। शपथग्रहण गराइसकेपछि उनलाई सुरक्षाकर्मीले बाक्लो घेरा हाली गाडीमा चढाएर डिल्ली बजार कारागार लगिएको छ।

प्रकाशित : पुस १९, २०७५ १५:५१
पूरा पढ्नुहोस्
प्रतिक्रिया
पठाउनुहोस्