घलेगाउँको हिउँमा पर्यटक मख्ख [फोटोफिचर]

शब्द/तस्बिर : आश गुरुङ

(घलेगाउँ, लमजुङ) — स्मार्ट भिलेजको रुपमा अघि सारिएको पर्यटकीय घलेगाउँ । शुक्रबार राति र शनिबार बिहान परेको हिमपातले गाउँ पुरै सेताम्ये थियो । बेंसीसहरबाट जीप र मोटरसाइकलको हुल पर्यटक बोक्दै घलेगाउँ पुग्यो । स्थानीयसँगै घलेगाउँको हिउँले पर्यटकको स्वागत गरिरहेको थियो । शनिबार साँझसम्म घलेगाउँमा हिउँ सेताम्ये थियो ।

प्रकाशित : माघ २६, २०७५ २१:०६

बिहानदेखि अबेरसम्म घलेगाउँ जानेको लर्को लागेको थियो । जनप्रतिनिधि, कर्मचारी, सरकारी तथा गैसरकारी संस्थाका प्रमुखलगायत विभिन्न पेसामा आवद्ध घलेगाउँ पुगे । उनीहरुले दिनभरी हिउँ खेले । बालबालिकादेखि वृद्धवृद्धासम्मले हिउँ खेलेर आनन्द लिए ।

करिब १ दशकपछिको हिमपातले स्थानीयको दैनिक प्रभावित भएको थियो नै । पर्यटक ओइरिएपछि घलेगाउँवासी स्वागतमा आतुर थिए । गुरुङ फिल्मका कलाकार खेमराज घले उनका साथीभाइलाई लिएर घलेगाउँ पुगे । ‘घलेगाउँमा पहिलोपटक हिउँ खेल्दैछु’ उनले भने । उनले घलेगाउँबाटै फोटो र भिडियो साथीभाइलाई पठाए । साथीभाइ साँझसम्म घलेगाउँ आइपुगे । कलाकार भारती घलेले गाउँलाई फन्को मारेर फोटो खिचिन् । फेसबुकलगायत सामाजिक सञ्जालमा अपलोड गरिन् । ‘साँच्चिकै स्वर्गजस्तै हो घलेगाउँ’ घलेगाउँको पर्यटन प्रवर्द्धनका लागि तयार पारिएको गीत उनले सम्झिइन् ।

बेंसीसहर नगरपालिका ७, हाइस्कुलचोकका बलराम खत्रीले परिवारसँग घलेगाउँ आएको बताए । साथमा उनका टोलका सबै घलेगाउँ आएका थिए । घलेगाउँलाई हिउँले घेरिएको देखेर उनी मख्ख परे । भारतीय सेनामा रहँदा उनले भारतका विभिन्न ठाउँको हिउँमा राइफल लिएर हिँडे । घलेगाउँमा हिउँ परेको सुनेपछि उनी हिउँ खेल्न आए । ‘पहिले ड्युटीको चिन्ता हुन्थ्यो । अहिले त केहीको छैन । मज्जैले हिउँ खेलियो’ उनले भने ।

पर्यटकसँगै अन्नपूर्ण संरक्षण क्षेत्र आयोजना (एक्याप) इलाका संरक्षण कार्यालय भुजुङअन्तर्गतको बेंसीसहरस्थित पर्यटक सूचना केन्द्र तथा प्रवेश शुल्क काउन्टरका पर्यटन सहायक बालकृष्ण घलेले घलेगाउँ पुगे । एकैदिन १ हजार ५ सय पर्यटक घलेगाउँ आएको उनले बताए । साथीसंगीसंगै उनले हिउँ खेले । ‘हिउँ खेल्न पाउनु हाम्रो लागि सौभाग्यको कुरा हो । यो मौका सित्तिमित्ति आउँदैन’ उनले भने । उनका अनुसार पर्यटकीय गाउँहरु घलेगाउँ, सिउरुङ, घनपोखरा लगायत ठाउँमा एक दशकपछि हिमपात भयो । स्थानीय जनजीवन कष्टकर बन्यो । तर, पर्यटकले निकै आनन्द लिए ।

क्व्होलासोंथर गाउँपालिका ४, भुजुङमा करिब २० जर्षपछि हिमपात भएको स्थानीयले बताएका छन् । हिमपातपछि आन्तरिक पर्यटक बढेको उनीहरुको भनाइ छ । वडाअध्यक्ष खिमबहादुर गुरुङका अनुसार यसअघि करिब १ हजार ७ सय मिटरको पिढिन्हेंसम्म हिमपात हुन्थ्यो । अहिले १ हजार ६ सय मिटरको गाउँमै बाक्लो हिमपात भयो । हिमपातपछि गाउँका जग्गाजमीन सिञ्चित भएको र खेतीबाली राम्रो हुने उनले बताए ।

ADVERTISEMENT
प्रतिक्रिया
पठाउनुहोस्
ADVERTISEMENT

भारतमा स्वाइन फ्लुको प्रकोप फैलियो, दिल्ली र आसपासका राज्य निकै प्रभावित

सन् २०१८ मा स्वाईन फ्लूले मृत्यु हुने २२६ पुगे
सुरेशराज न्यौपाने

नयाँदिल्ली — भारतको राजधानी नयाँदिल्ली र नजिकैका राज्यहरूमा स्वाइन फ्लुको प्रकोप फैलिएको छ । खासगरी नयाँदिल्ली र नजिकैका राजस्थान, पन्जाब र हरियाणामा यसको प्रकोप बढी देखिएको हो । स्वाईन फ्लू एच–१ एन–१ भाइरसको संक्रमणले हुन्छ । यी क्षेत्रमा दिनहुँ जसो सयौंको संख्यामा स्वाइन फ्लु संक्रमितको थपिँदै गएका छन् ।

संक्रमणकै कारण हालसम्म २२६ जनाको मृत्यु भइसकेको भारतीय सन्चारमाध्यमहरुले जनाएका छन् ।

गत वर्षको तुलनामा स्वाइन फ्लुको संक्रमणमा चिन्ताजनक ढंगले बृद्धि भएको हो । राजधानी दिल्लीमा बिहिबार एकै दिनमा १०३ नयाँ स्वाइन फ्लु संक्रमितको पहिचान भएको स्वास्थ्य सेवा निर्देशनालयको कार्यालयले जनाएको छ । योसँगै दिल्लीमा मात्र पछिल्लो डेढ महिनामा १ हजार १ सय ९६ भन्दा बढीमा संक्रमणको पुष्टि भएको छ । संक्रमणकै कारण दिल्लीमा मात्र यसवर्ष १३ जनाको मृत्युसमेत भइसकेको स्थानीय सन्चारमाध्यमले जनाएका छन् । यद्यपि, सरकारी निकायले भने हालसम्म त्यस्को पुष्टि गरेको छैन ।

दिल्लीसँग जोडिएको राजस्थानमा स्वाइन फ्लुको प्रकोप थप भयावाह छ । राजस्थानमा अहिलेसम्म २ हजार ३ सय ६३ मा यस्तो संक्रमण देखिएको छ । राज्यमा मात्रै स्वाइन फ्लुकै कारण १ सय १७ को मृत्यु भएको सरकारी निकायलाई उद्धृत गर्दै सन्चारमाध्यमले उल्लेख गरेका छन् ।

सन् २०१८ मा भारतभर स्वाइन फ्लु संक्रमणका १४ हजार ९ सय ९२ घटना पुष्टि भएकोमा सन् २०१९ को पहिलो महिनाभित्रै ६ हजार ७ सय १ जनामा स्वाइन फ्लुको संक्रमण देखिएको छ । पुसको दोस्रो सातादेखि माघको तेस्रो सातासम्ममा भारतभर ६ हजार ७ सय १ जनामा संक्रमण पुष्टि भएकोमा त्यसको आधाभन्दा बढी अर्थात् ४ हजार १ सय १४ घटना चार राज्यमा देखिएको छ । अघिल्लो वर्ष सोही अवधिमा २ हजार १ सय १ मा मात्र त्यस्तो संक्रमण देखिएको थियो । यसवर्ष सबैभन्दा बढी संक्रमण राजस्थान र दिल्लीमा देखिएको हो । सन् २००९ मा स्वाइन फ्लुले ठूलै महामारीको रुप लिएको थियो ।

राजधानी दिल्लीमा स्वाइन फ्लुको संक्रमण कारण मृत्यु भएकाको संख्या उल्लेख गरिएको छैन । गत महिना सत्तारुढ दल भारतीय जनता पार्टी (भाजपा) अध्यक्ष अमित शाहमा समेत संक्रमण देखिएको थियो । शाहको स्वास्थ्य परीक्षण रिपोर्टमा स्वाइन फ्लु पुष्टि भएपछि उनलाई नयाँदिल्लीस्थित अल इण्डिया इन्स्टियुट अफ मेडिकल साइन्स (एम्स्) को भर्ना गरिएको थियो ।

सामान्यतया: हरेक हिउँद र वर्षामा स्वाइन फ्लु संक्रमण देखा पर्ने गरेको छ । चिकित्सकले संक्रमणका हिसाबले स्वाइन फ्लुलाई सामान्य जोखिम र उच्च जोखिममा वर्गीकरण गर्ने गरेका छन् । बच्चा, गर्भवती महिला, ६५ वर्षमाथिका व्यक्ति, फोक्सो, मुटु, कलेजो र मिर्गौलाका विरामी उच्च जोखिमको वर्गमा पर्छन् । उनीहरुमा भएको संक्रमण समयमा पहिचान नभए मृत्यु हुने गर्छ । सामान्य जोखिमको वर्गमा रहेका विरामीले घरमा आराम गर्ने, भिडभाडमा नजाने र झोलपदार्थ खान चिकित्सकहरुको सुझाव छ ।

प्रकाशित : माघ २६, २०७५ १९:५९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT