युवाले खुलाए थोराङ्ला

आश गुरुङ

लमजुङ — हिमपात केही मत्थर भएको थियो । फेब्रुअरी २४ तारिख (फागुन १२) मा एक हुल युवा थोराङला भञ्ज्याङ (५,४१६ मिटर उचाई) खुलाउन माथिल्लो मनाङबाट त्यसतर्फ हिँडे ।

मनाङबाट याकखर्क हुँदै बेसक्याम्प पुगेका उनीहरु हाइक्याम्पबाट उकालो लाग्दै थिए । एक्कासी हिमपात भएपछि उनीहरु थोराङला भञ्ज्याङ पुग्न सकेनन् । हिमपात भइरहकै समय ५ दिनपछि गाउँ फर्किए । त्यही टोली २ सातापछि आइतबार मनाङबाट निस्किए । १४ जना युवासँगै ११ जना पर्यटक र एकजना पथ प्रदर्शक पनि गए । युवाहरु अघिअघि, पर्यटक पछिपछि गए ।

Citizen


आइतबार उनीहरु याकखर्क पुगे । दोस्रो दिन थोराङला फेदी । तेस्रो दिन हाइक्याम्प पुगे । तेस्रो दिन नै उनीहरु हाइक्याम्पबाट माथिल्लो क्षेत्रसम्म पुगे । पुनः फर्केर हायक्याम्पमै बसे । चौथो दिन मंगलबार उनीहरु थोराङला पास गरेर मुक्तिनाथ पुगेको कर्म दोर्जे गुरुङले बताए । उनीहरुले सावेल लिएर गएका थिए । केहीले लट्ठी लिएर गएका थिए । 'बाटोमा हिउँ छेंड्न नसक्नु थियो । कति ठाउँमा साबेलले फाल्यौं । कति ठाउँमा हातखुट्टैले हिउँ फाल्यौं,' उनले भने । हिँड्ने बाटो रेकी गर्दै गएपछि पर्यटक पनि त्यही बाटो पछ्याउँदै आएको उनले बताए । कर्मसँगै गएका ढोक्पा गुरुङ, लन्डुप गुरुङ, बीसबहादुर गुरुङ लगायत युवा जोमसोमबाट पोखरा भएर बेंसीसहर हुँदै मनाङ फर्किने क्रममा छन् ।

गत माघ ९ गतेदेखि चक्रीय अन्नपूर्ण पदमार्गको थोराङला भञ्ज्याङ बन्द भएको थियो । सयौं पर्यटक फर्किएका थिए । हिमपातका कारण पदमार्ग बन्दका समय माघ २१ र २२ गतेबाहेक अरु समय पर्यटकले थोराङला पास गर्न सकेनन् । उनीहरु बीचबाटोबाटै फर्किन बाध्य भएका थिए । डेढमहिनापछि खुलेको थोराङला पास हुँदै सोमबारदेखि पर्यटक मुस्ताङतर्फ जान थालेको अन्नपूर्ण संरक्षण क्षेत्र आयोजना -एक्याप) इलाका संरक्षण कार्यालय मनाङका प्रमुख बाबुलाल तिरुवाले बताए ।












सबै तस्बिर सौजन्यः कर्म दोर्जे गुरुङ

प्रकाशित : फाल्गुन २९, २०७५ १३:३५
प्रतिक्रिया
पठाउनुहोस्

सिके राउतसँगको सम्झौतामा सरकार अपरिपक्व : पौडेल

वीरेन्द्र केसी

अर्घाखाँची — नेपाली कांग्रेसका वरिष्ठ नेता रामचन्द्र पौडेलले सिके राउतसँग जुन सम्झौता सरकारले गर्‍यो, त्यो अपरिपक्क खेल जस्तै भएको र सम्झौतामा उल्लेख गरिएका बुँदा हस्ताक्षर गर्ने खालको नै नभएको बताए । 'राष्ट्रिय स्वतन्त्रता र अखण्डाताको सवालमा आपत्तिजनक छ, यसमा सरकारले स्पष्ट जवाफ दिनुपर्छ,' प्रेस युनियनले सन्धिखर्कमा आयोजना गरेको पत्रकार सम्मेलनमा उनले भने ।  

फाइल तस्बिर ।

'राउतले राष्ट्रिय अखण्डतामा माथि आँच आउने काम अब मैले कुनैपनि गर्दिनँ भन्ने हुनुपर्थ्यो, त्यो भएन, सरकारले अपरिपक्क र राष्ट्रियप्रति गम्भीर देखाएन,' उनले भने । सत्ताधारीको नियत माथि आशंका भएको छ । जनकपुरमा स्वागत गर्दा जुन प्रकारको नाराबाजी भयो, त्यो आपत्तिजनक भएको उनले बताए ।

प्रधानमन्त्री केपी ओली सरकारले काम गर्ने सुनौलो अवसर र मौका पाएपनि एक वर्ष खेर फालेको बताए । जनताले कम्युनिस्टलाई पत्याएर भोट दिएको तर, कम्युनिष्टले जनतालाई झुक्याएर सबै गफ मात्रै गरेको आरोप लगाए ।

'जे गर्न सम्भव छैन, प्रधानमन्त्री ओली फ्याट्टै त्यही बोलिहाल्ने र जनतालाई गुमराहमा राख्ने काम बाहेक केही भएन,' उनले भने, 'विकास र समृद्धिका काम केही भएनन् । गाउँमा बाटो, विजुली, स्वास्थ्य, शिक्षा, सञ्चार कांग्रेसले ल्याएको हो । कम्युनिष्टले थोरै काम पनि गरेन ।' सरकार भ्रष्टाचारै भ्रष्टाचारमा चुलुम्म डुबेको उनले बताए ।

ओलीले प्रधानमन्त्री भएपछि भ्रष्टाचार गर्दिनँ, गर्न पनि दिन्नँ, शुन्य सहनशीलताको कुरा गरेको तर, अहिले जताततै भ्रष्टाचारै भ्रष्टाचार काण्डैकाण्डमा फसेको उनले बताए । 'शान्त, सहज परिस्थिति भएपनि काम गर्न सकेन । भ्रष्टाचारले विकास रोक्छ, सरकाले शान्ति दिन सकेन, काम गर्ने शैली नै जानेन,' उनले भने ।

तराइका जिल्लामा सिचाइँ पुर्‍याएर उत्पादन बढाउनुको सट्टा पानी जहाजको कुरा ठीक नभएको उनले बताए । 'ओलीले गफैगफमा एक वर्ष बिताए, उनको जीवनै गफमै बित्ने भो,' उनले भने । जहाँसम्म विप्लवको कुरा छ, सर्पको खुट्टा सर्पले नै देख्छ, पुष्पकमल दाहालले गरेको दस वर्षे द्वन्द्व र ओलीले झापा काण्ड गरेर आएकाले विप्लवलाई पनि आफैं समाधान गर्नुपर्ने उनको तर्क छ । विप्लवलाई शान्ति प्रक्रियामा ल्याउन छाडेर देशलाई अशान्ति र द्वन्द्वमा फसाएको पौडेलले बताए ।

उनले पार्टीको महाधिवेशन समयमै गर्न पार्टी सभापति शेरबहादुर देउवालाई आग्रह गरेको बताए । महाधिवेशनमा नेतृत्वमा सर्वसम्मत हुने पनि सक्ने पौडेलले बताए । उनले कांग्रेस र जनताले विकास र समृद्धिको काममा आवाज उठाएर अघि बढनुपर्ने पनि बताए ।

प्रकाशित : फाल्गुन २९, २०७५ १२:४८
पूरा पढ्नुहोस्
प्रतिक्रिया
पठाउनुहोस्