मध्यपहाडी सडकमा धमाधम कालोपत्रे
खोटाङ — मध्यपहाडी लोकमार्गअन्तर्गत बाझेच्यानडाँडा–दिक्तेल सडक खण्डमा कालोपत्रे गर्ने काम तीव्र पारिएको छ । अवधि सकिए पनि काम अपूरै भएको चौतर्फी दबाबपछि कामले तिब्रता पाएको हो ।
राष्ट्रिय गौरवको आयोजनाअन्तर्गत पर्ने यो सडक खण्डको (८८ किलोमिटर) मध्ये दारुलाडाँडा–दिक्तेलसम्मको १८ किलोमिटर सडक यो असारसम्ममा पिच गर्ने लक्ष्यका साथ काम बढाइएको निर्माण कम्पनी सम्बद्ध साङ्गे सेर्पाले बताए । अन्य भने अर्को वर्षसम्ममा मात्र सकिने सेर्पाले सुनाए ।
यो सडकको चार वटा प्याकेजमा ठेक्का लागेको थियो । एक नम्बर र दुई नम्बर प्याकेजको २०७२ वैशाख २ गते, तीन नम्बर प्याकेज असार १६ गते र चार नम्बर प्याकेजको चैत १६ गते दुई वर्षभित्र सक्ने गरी रमण गोल्डेन गुड जेबी कम्पनीले सडक विभागसंग संझौता गरेको थियो । यसमध्ये एक र दुई नम्बरको प्याकेजको अवधि थपेर आगामी असारसम्म पुर्याइएको छ ।
तीन र चार नम्बर प्याकेजको अवधि आगामी चैतसम्मका लागि थपिएको छ । सेर्पाका अनुसार एक नम्बर च्यानडाडा–पेलुङसम्मको (१० किलोमिटर) ५० प्रतिशत, दुई नम्बर प्याकेज पेलुङ–दारुलासम्म (८ किलोमिटर) ५० प्रतिशत, तीन नम्बर प्याकेज दारुला–कालिखोला (९ किलोमिटर) ८० प्रतिशत र चार नम्बर प्याकेज कालिखोला–दिक्तेल (९ किलोमिटर) ९० प्रतिशत काम सकिएको छ ।
करिब एक अर्ब, नौ करोड, १९ लाख रुपैयाको लागतमा सम्पन्न हुनु पर्ने यो सडक बेलामा नसक्दा अब यसको लागत करिब सवा अर्ब पुग्ने भएको छ । पेटी ठेक्का, बेलामा सडक पुल नबन्नु लगायतका कारण ढिलाइ भएको सेर्पाले बताए । यस सडक खण्डमा आठवटा पुलमध्ये दुई वटा मात्र सकिएको छ । आठमध्ये चार वटा पुलको ठेक्का रमण गोल्डेन गुड जेबी कम्पनीले लिएको थियो । चारमध्ये कालिखोला र लप्से खोलाको सकिएको छ । दाम्दे र साप्सुखोलाको पुल पनि अन्तिम चरण पुगेको सेर्पा सुनाए । ‘दुईवटै पुल अन्तिम चरणमा पुगेको छ ।’
सेर्पाले भने–‘अब एक हप्ताभित्र सकेर बुझाउँने तयारीमा छौं ।’ यो सडक खण्डमै पर्ने भुल्के खोलाको पुल भने निर्माण सुरु मात्र भएको छ । यहाँ रहेको धार्मिक तथा पर्यटकीय भुलभुलेलाई असर पर्ने भएकाले उक्त पुल सार्नु पर्ने हुदाँ निर्माणमा ढिलाई भएको हो । यद्यपि अर्को वर्ष भने सकिने निर्माणमा संलग्न सगरमाथा घिमिरे निर्माण सेवा सम्बद्ध कृष्णप्रसाद घिमिरेले बताए । भालुखोला, छेपेखोला र मेवा खोलाको सडक पुलको भने ठेक्कै लागेको छैन ।
प्रकाशित : वैशाख २५, २०७६ १२:३३