‘बजेट नदिए कचौरा देऊ’

कान्तिपुर संवाददाता

(विराटनगर) — प्रदेश सरकारले पेस गरेको नीति तथा कार्यक्रमको छलफलमा समानुपातिक सांसदले समान हैसियतमा बजेट विनियोजन गर्न माग गरेका छन् । प्रदेश सरकारले बजेट नदिएर संवैधानिक व्यवस्थाको खिलापमा गएको आरोप कांग्रेसका समानुपातिक सांसद लोकप्रसाद संग्रौलाले लगाए ।

समानुपातिक सांसदलाई बजेट नदिएर सरकारले संविधानमा भएको व्यवस्थाको खिल्ली उडाएको छ,’ उनले भने, ‘निर्वाचित जनप्रतिनिधि सरह समान राजनीतिक हैसियत र समान योगदान रहे पनि निर्वाचन क्षेत्रमा वडा अध्यक्षको जति इज्जत पनि पाएनौं ।’

उनले आफूहरूलाई बजेट नदिने हो भने कचौरा दिन सभामुखसँग माग गरे । ‘धेरै सांसदलाई खुलेर कुरा गर्न डर लाग्ला, तर सभामुख महोदय हामीलाई अब एउटा कचौरा दिनुहोस्,’ उनले भने, ‘हामीसँग जनतालाई दिएका वचन पूरा गर्ने कुनै आधार छैन, बजेट नदिने हो भने हामीलाई एक–एक ओटा कचौरा दिनोस् त्यही कचौरा व्यापारीलाई देखाउँछौं र पैसा माग्छौं ।’

सत्तारुढ दल नेकपाका सांसद अर्जुन राईले निर्वाचन क्षेत्र विकाससम्बन्धी बजेट वृद्धि गर्न माग गरे । सांसद विकासकोषको रकम सांसदहरूले गोजीमा हालेर लगे जस्तो गरी अनावश्यक प्रचार गरिएको उनले बताए । ‘प्रदेश सरकारको अनुभुति गराउन हाम्रो पनि भूमिका छ, हामीले खेलेको भूमिका बिर्सनु हुँदैन,’ उनले भने, ‘सांसद विकास कोषको रकम दुरुपयोग भएको छ भने छानबिन होस् तर बजेट बढाइयोस् ।’

यता सांसद अम्बिरबाबु गुरुङले सांसदले प्रदेश सरकारले सक्ने र क्षमता अनुसारको योजना मात्रै माग गर्नुपर्ने बताए । एउटै सांसदले ४० अर्बको योजना पेस गरेको उदाहरण दिँदै उनले भने, ‘हामीले पनि हाम्रो कर्तव्य, मर्यादा र सीमा बुझ्नु पर्छ ।’ सांसद इन्दिरा राई र लीला सुब्बाले पनि समानुपातिक सांसदले १ करोड बजेट पाउनु पर्ने माग गरिन् । यस्तै सांसद जयराम यादवले सरकारले प्रस्तुत गरेको नीति तथा कार्यक्रमले मधेस आन्दोलन र जनजाति आन्दोलन बिर्सिएको बताए । नीति तथा कार्यक्रममा जनयुद्ध र जनआन्दोलनका सहिदलाई सम्झिए पनि मधेस आन्दोलनका योद्धामाथि अन्याय गरिएको उनले बताए ।

संसदबाट यसअघि पारित भएको राजधानी विराटनगर रहने र कार्यपालिका व्यवस्थापिका र अन्य संरचना वृहत विराट क्षेत्र अन्तर्गत विराटनगर, इटहरी र सुन्दरहरैंचा आसपासमा रहने भन्ने विषयलाई बिर्सिएर विराटनगर केन्द्र रहने भन्ने विषय नीति तथा कार्यक्रममा उल्लेख गरेको सांसद राजन राईले आपत्ति जनाए । यस्तै सांसद शेखरचन्द्र थापाले प्रदेश सरकारले जति गर्ने हो त्यति विषय मात्रै ल्याउनुपर्ने सुझाव दिए । प्रदेश सरकारले गत वर्ष तय गरेको नारालाई फेरेको भन्दै नारामै विचलित हुने सरकारले मूल लक्ष्य र नीति निर्माण गर्न नसक्ने उनले बताए ।

प्रकाशित : जेष्ठ २७, २०७६ १०:०८
ADVERTISEMENT
प्रतिक्रिया
पठाउनुहोस्
ADVERTISEMENT

सिम खेतमा रोपाइँ

आनन्द गौतम

(ताप्लेजुङ) — फुङलिङ नगरपालिका ३ साउनेका पदम निरौला सोमबारदेखि धान रोपाइँमा व्यस्त छन् । बोझेमा रहेको सिम खेतमा धान रोप्न भाइ योगेश्वरको परिवार र छरछिमेकको सहयोगमा उनी खेतमा निस्किएका हुन् ।

ताप्लेजुङको फुङलिङ नगरपालिका ३ बोझेमा धान रोप्तै किसानहरू । जेठ १५ देखि साउन १५ सम्ममा बाली लगाउने ताप्लेजुङका धेरै किसानले आकासेपानीको भरमा खेती गर्नुपर्ने भएकाले मौसम अनकुलताअनुसार बाली लगाउन थालेका छन् । तस्बिर : आनन्द/कान्तिपुर

एक हल गोरु र छरछिमेकको सहयोगमा निरौला रोपाइँमा व्यस्त छन् । ठूला गरा भए पनि सिम खेतमा गोरु भासिने भएकाले मान्छेले धेरै खन्नुपर्छ । त्यसैले जनशक्तिको परिचालन ठूलै छ । मेरिङदेन ४ लिंतेपको लुबुवा बेंसीमा पनि रोपाइँ सुरु भएको छ । २१ सय मिटर उचाइको यो ठाउँमा प्रत्येक घरका मूलीले रोपाइँ थालेका हुन् । यसअघि लगाइएको गहुँबाली उठाएका यहाँका बासिन्दा रोपाइँमा व्यस्त भएको बताउँछन् ।

यो वर्ष दिनहुँजसो पानी परिरहेकाले किसानले यसलाई अनुकूल समयका रूपमा लिएका छन् । त्यही अनुकूलतालाई उपयोग गर्दै रोपाइँ थालेका हुन् । ‘हाम्रामा सिँचाइ हुने कुलो छैन, पानी परेको मौका छोप्नुपर्छ,’ निरौलाले भने, ‘सिमखेत भएकाले पानीको समस्या त हुँदैन तैपनि अलिअलि परेको बेला रोपाइँ गर्दा सहज भएको छ ।’ चैते र वर्षे गरी दुई सिजनमा धान फल्ने जिल्लामा जेठ १५ देखि सुरु गरी साउन १५ सम्ममा बाली लगाइसकिने कृषि ज्ञान केन्द्र ताप्लेजुङले जनाएको छ । दुई बाली मात्रै फल्ने लेकाली क्षेत्रमा जेठदेखि असार १५ सम्ममा रोपाइँ सकिन्छ भने तीन बाली लाग्ने औल क्षेत्रमा साउन १५ सम्म रोपाइँ हुन्छ ।

जिल्लामा ९ हजार हेक्टर क्षेत्रफलमा वर्षे धान खेती गरिन्छ । एक सय हेक्टरसम्म चैते धान लाग्छ । उत्पादन भने २० हजार टनसम्म हुने गरेको छ । जिल्लाका सिनाम, थुम्बेदिन, निगुरादिन, फुलबारी, खोक्लिङ, लिंखिमलगायत क्षेत्र धानखेतीका चर्चित बेंसी हुन् । फक्तालुङ गाउँपालिका ७ ओलाङचुङगोलाबाहेक जिल्लाका सबै वडामा थोर, धेर धान उत्पादन हुने गरेको छ । खेतीयोग्य जमिन २८ हजार हेक्टरमध्ये ७ हजार हेक्टरमा मात्रै वर्षभरि सिँचाइ हुन्छ । ६ हजार हेक्टर आंशिक सिञ्चित हुने क्षेत्रफल भएकाले धेरै किसानले आकासे–पानीको भर पर्नुपर्छ । जिल्लाका २२ हजार हेक्टरमा विभिन्न बाली लगाइएको छ । जिल्लाका दर्माली, मासी मान्सुली, अट्टे, बेलगुटी, टाइचुङलगायतका जातको धानखेती हुने गरेको छ ।

प्रकाशित : जेष्ठ २७, २०७६ १०:०७
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT