बनाइ नसक्दै नाला भत्कियो

कान्तिपुर संवाददाता

इनरुवा — इनरुवा नगरपालिकाबाट बोलपत्र आहान भएर टेन्डर ठेक्का लागेको पक्की नाला मंगलबार राति आएको आकाशे पानीले भत्काएको छ । इनरुवा ३ र ४ नम्बर वडाको सीमाक्षेत्रमा रहेको खानेपानी ट्याङकीदेखि महानन्द शालिक सम्मको उत्तर दक्षिण सडकको पूर्व तर्फ बनेको पक्की ढल नाला आकाशे पानी परे लगतै भत्किएको हो ।

पण्डित वहाव जेभी निमार्ण सेवाले ठेक्का सम्झौता गरी तीन साता अगाडि निमार्ण सम्पन्न गरेको साढे तीन फिट गहिराइको पक्की नाला पानी परे लगतै भत्किएको हो ।

स्थानीय विनोद दाहालका अनुसार कमसल सामग्री प्रयोग गरी कम गुणस्तरको इँटा प्रयोग भएकाले ३ नं वडा कार्यालयलाई जानकारी गराई काम रोक्क स्थानीयले आग्रह गरेका थिए । स्थानीयका अनुसार ठेकेदारले लापरबाही गरि निमार्ण गरेको हुँदा बनेको तिन साता नपुग्दै आकासे पानीले नाला भत्किएको बताए ।

इनरुवा ३ का प्रकाश बरालले ठेकेदारले लेवर मिस्त्रीको भरमा कमसल सामग्री प्रयोग गरी लापरबाही पूर्ण तरिकाले काम गरेको जानकारी समयमा सबैलाई गराउँदा समेत ध्यान नदिएकाले पानी पर्ने बितिकै नाला लडेको बताए ।

वडाअध्यक्ष कालुराम गुरुङले स्थानीयको गुनासो आएपछि वडा कार्यालयबाट स्थलगत अनुगमन गरी कमसल काम भइरहेको बारे सम्बन्धित निकाय र ठेकेदारलाई जानकारी गराउँदा पनि अटेर गरेकाले नाला सामान्य पानी पर्दा नै लडेको बताए । गुरुङले भने, ‘ठेकेदारको ठेक्का रद्ध गरी निजलाई कारबाही गरिनु पर्छ ।’

इनरुवा नगरपालिका योजना शाखाका जीवन भट्टराईले ठेक्का सम्झौताअनुसार पण्डित वहाव जेभी निर्माण सेवाले कामको जिम्मेवारी पाएकाले भत्किएको नाला पुनःर्निमाण गरे मात्र रकम भुक्तानी पाउने भएकाले हाल रकम निकासा नगरिएकाले क्षतीको जिम्मेवार ठेकेदार आफै हुन पर्ने बताए ।

प्रकाशित : जेष्ठ ३०, २०७६ ०९:५२
ADVERTISEMENT
प्रतिक्रिया
पठाउनुहोस्
ADVERTISEMENT

२ सय ८७ जनाले पाए रोजगारी

कान्तिपुर संवाददाता

खोटाङ — जिल्लाका दुई पालिकामा प्रधानमन्त्री रोजगार कार्यक्रम सुरु भएको छ । दिक्तेल रुपाकोट मझुवागढी नगरपालिका र रावाबेसी गाउँपालिकामा उक्त कार्यक्रम सुरु भएको हो ।

दिक्तेल रूपाकोट मझुवागढी नगरपालिकाको १५ वटाका १ सय ८० युवाले रोजगार पाएका छन् । बेरोजगार र अति विपन्न परिवारका नागरिकलाई रोजगारको अवसर दिइएको दिक्तेल रुपाकोट मझुवागढी नगरपालिकाका प्रमुख दीपनारायण रिजालले बताए । रिजालका अनुसार प्रधानमन्त्री रोजगार कार्यक्रम अन्तरगत दैनिक जनही छ सय दशका दरले मासिक १८ हजार तीन सय रुपैयाँ पारिश्रमिक पाउने छन् ।

गरिबीको रेखामुनि रहेका र बेरोजगार नगरबासीमध्येबाट छनोट गरेर वर्षमा कम्तीमा सय दिनको रोजगारीको अवसर दिइएको रिजालले बताए ।

उनीहरूले सम्बन्धित वडाभित्रको कच्ची सडकको नाली निर्माण, वडा कार्यालय, स्वास्थ्यचौकी, विद्यालय रङ्गरोगन, विद्यालय वरपर बगैंचा निर्माण, फलफूलका बिरुवा रोप्ने लगायतका काममा खटाइएको रिजालले जनाए ।

रावाबेसी गाउँपालिकामा पनि प्रधानमन्त्री रोजगार कार्यक्रम सुरु भएको छ । यहाँका १ सय सात जनाले रोजगार पाएका छन् । उनीहरूले दैनिक ५ सय १७ रुपैयाँका दरले पारिश्रमिक पाउने उक्त गाउँपालिका अध्यक्ष लीलानाथ निरौलाले बताए ।

रोजगार पाउने युवालाई कुभिण्डेमा, नुनथला–कुभिण्डे सडकको नाली काट्ने, खार्पा–महुरे–झिगटीघर सडकको नाली काट्ने, बिजुले–लामिडाडाँ भन्ज्याङसम्म सडकको नाली काट्ने, खाल्डाखुल्डी सोलिङ गर्ने, छोटो दूरीका पुराना पैदल हिड्ने बाटोमा सिढी लगाउने लगायतका काममा खटाइएको अध्यक्ष निरौलाले सुनाए ।

प्रकाशित : जेष्ठ ३०, २०७६ ०९:५२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT