उत्तरपुस्तिका पाउन संघर्ष

जितेन्द्र साह

विराटनगर — पूर्वाञ्चल विश्वविद्यालयअन्तर्गत जीपी कोइराला कलेज अफ एग्रिकल्चर एन्ड रिसर्च सेन्टर (जीपीसीआर) चौथो सेमेस्टरमा अध्ययनरत विद्यार्थी संघर्षमा उत्रिएका छन्  । जेठ ३० मा भएको दोस्रो सेमेस्टरको रिजल्ट चित्त नबुझेपछि उनीहरूले विरोध जनाएका हुन्  ।

‘प्रिन्सिपल्स एन्ड प्राक्टिस अफ हर्टिकल्चर’ विषयमा फेल भएका ८ विद्यार्थी हिरालाल गेलाल, सपना खड्का, सन्दीपा तिम्सिना, निकिता कार्की, केशवकुमार बुढाथोकी, सुमितकुमार साह, प्रियंका मण्डल र सपत रुक्सारको कपी पुनर्मूल्याङन हुनुपर्ने उनीहरूको माग हो । ‘एउटै पनि प्रश्नको उत्तर छुटाइन्, सबैभन्दा कठिन भनिएको प्रश्नको समेत जवाफ दिएँ, ए प्लस र एभन्दा घटी ग्रेड त सोचेकी थिइन,’ छात्रा निकिता कार्कीले भनिन्, ‘रिजल्टमा फेल भएँ, पुनर्योगमा बी आयो तर उत्तरपुस्तिकाको पुनः परीक्षण गराएर यथार्थ बाहिर आओस् भन्ने म र मेरा साथीहरूको माग हो ।’ परीक्षाफल प्रकाशित भएको भोलिपल्ट ३१ जेठमा अभिभावक समूह कलेजमा पुगी सम्बन्धित विषय शिक्षक र क्याम्पस प्रमुख कृष्ण दाहालसँग बुझे । ‘एक त हर्टिकल्चर विषय उसै पनि सजिलो, अर्कोतिर विद्यार्थीहरू कमजोर नभएकाले फेल हुने सवालै भएन,’ दाहालले भने, ‘अरू सबै विषयमा उनीहरू उत्तीर्ण भएकाले हामी पनि परीक्षाफललाई लिएर सशंकित छौं ।’

सहायक परीक्षा नियन्त्रक धर्मेन्द्र सिंहले भने, ‘पुनर्योग (रिटोटलिङ) का लागि निवेदन दिए हुन्छ, पुनः परीक्षणको प्रावधान छैन ।’ परीक्षा नियन्त्रक सूर्यप्रसाद स‌ंग्रौलाले पुनर्योगका लागि ५ सय रुपैयाँ शुल्क तिरी १५ दिनभित्र निवेदन दिनुपर्ने र उत्तरपुस्तिका प्राप्तिका लागि ५ हजार रुपैयाँ बुझाउनु पर्ने बताए । ‘पुनः मूल्यांकन हुँदैन,’ उनले भने । चित्त नबुझेमा कुनै प्रहरी कार्यालय र अदालतमा उजुरी नगर्ने तथा मिडियालाई जानकारी गराउँदैनौं भन्ने कबुलियतनामा कागज गरेपछि मात्र परीक्षकको नाम र उत्तरपुस्तिकामा दिइएको अंक छोपी प्रतिलिपि दिने प्रावधान रहेको उनले बताए ।

साथै भूलवश नदिएको अंक पनि नजोडिने भन्ने संग्रौलाको अडान रह्यो । उनले भने, ‘उत्तरपुस्तिकाको परीक्षकलाई कालो सूचीमा राख्नबाहेक केही गर्न सक्दिनँ ।’ संग्रौलाकोआलेटाले गफपछि पीडितहरूले सूचनाको हकसम्बन्धी ऐन, २०६४ र संविधानको धारा २७ बमोजिम १६ असारमा सूचना अधिकारीलाई संवोधन गर्दै पूर्वाञ्चल विश्वविद्यालयको केन्द्रीय कार्यालयमा उत्तरपुस्तिकाको प्रतिलिपि माग गरी हुलाकबाट खामबन्दी पत्र पठाए । उक्त पत्र समेत विश्वविद्यालयले बुझेन ।

पुनः कार्यालय प्रमुखलाई सम्बोधन गरी ३१ असारमा पठाएको खामबन्दी पत्र विश्वविद्यालयले २ साउनमा बुझे पनि त्यसमा हालसम्म कुनै सुनुवाई नभएको पीडित पक्षले जनाएको छ । सूचनाको हकसम्बन्धी ऐन, २०६४ र नियमावली, २०६५ एवं यस अनुरूप सर्वोच्च अदालतको फैसलाले परीक्षामा प्राप्ताङमा चित्त नबुझेमा उत्तरपुस्तिका हेर्न पाउने मार्ग खुला गरेको छ । परीक्षकले भूलवश अंक दिन छुटेमा वा बढी अंकको ठाउँमा कम दिएमा सुधार गरी लब्धांक पत्र (मार्कसिट) संशोधन गर्नुपर्ने ऐनमा स्पष्ट प्रावधान छ ।

२०६८ को ४ जेठमा सर्वोच्च अदालतका न्यायाधीशद्वय बलराम केसी र अवधेशकुमार यादवद्वारा जारी परमादेश फैसलामा उत्तरपुस्तिका हेर्न पाउने, पुनर्योग हुनसक्ने, भूलवश अंक प्रदान गरिएको छैन भने विश्वविद्यालयबाट कानुनबमोजिम परीक्षण गर्नुपर्छ भन्ने उल्लेख छ ।

‘सर्वोच्चले पनि अंक गोप्य राख्न भनेको छैन, उत्तरपुस्तिका दिँदा विद्यार्थीहरूलाई कबुलियतनामा कागत गराउने भन्ने कुरा न त सूचनाको हकसम्बन्धी ऐनमा छ, न त पूर्वाञ्चल विश्वविद्यालयको कार्यपरिषदले त्यस्तो कुनै निर्णय गरेको छ,’ सूचना हक अभियन्ता राजु श्रेष्ठले भने, ‘यो त सूचनाको हकसम्बन्धी ऐनले वकालत गर्दै आएको पारदर्शिताको बर्खिलाप हो, ऐनकै अवहेलना हो ।’

तर, विराटनगरस्थित पूर्वाञ्चल विश्वविद्यालयले विभिन्न बहानामा ऐन, नियमावली र सर्वोच्चको फैसला मान्न अस्विकारेकाले पीडित विद्यार्थी एवं अभिभावकले केन्द्रीय कार्यालय तथा परीक्षा नियन्त्रण कार्यालयमा ज्ञापन पत्र बुझाएका छन् । झन्डै सवा सय छात्रछात्राको सहभागितामा ज्ञापनपत्र बुझाइएको थियो ।

‘यो सब रहरले गरेका होइनौं, ऐनअनुरूप न्याय नपाएपछि सडकमा आएका हौं,’ पीडित अभिभावक मोहन कार्कीले भने, ‘यो पहिलो चरणको कार्यक्रम हो, माग सम्बोधन नभएमा दोस्रो चरणको सशक्त आन्दोलनमा जान्छौं ।’

प्रकाशित : श्रावण २९, २०७६ ११:४२
ADVERTISEMENT
प्रतिक्रिया
पठाउनुहोस्
ADVERTISEMENT

होटल व्यवसायमा लगानी बढ्दै

कान्तिपुर संवाददाता

तेह्रथुम — मध्यपहाडी लोकमार्ग वरपर सुविधासम्पन्न होटल र लजमा स्थानीयले लगानी बढाएका छन्  । राष्ट्रिय गौरवको आयोजना भएकाले कालान्तरमा पर्यटक र ग्राहकको चाप बढ्ने सोचेर व्यवसायीले लगानी बढाएका हुन्  ।

लोकमार्गको करिव १ सय ३५ किलोमिटर खण्ड तेह्रथुममा पर्छ । लोकमार्ग निर्माणसँगै दायाँबायाँ साना ठूला होटल, पसल, लज, रिसोर्ट खोल्ने क्रम सुरु भएको मध्यपहाडी लोकमार्ग आयोजना पुर्वी खण्डका इन्जिनियर सुरेश तुम्बाम्फेले बताए । लोकमार्ग निर्माणसँगै ठाउँ ठाउँमा ग्रामीण बजारको विस्तार हुने र व्यवसाय गर्नेको संख्या बढिरहेको छ ।

लोकमार्गले छोएका विभिन्न ठाउँमा साना बजार विस्तार भएर व्यापार गर्नेको भीड बढिरहेको आठराई गाउँपालिका चुहानडाँडाका नरप्रसाद मैनालीले बताए ।

सडकका कारण होटल र पसल खुल्ने क्रम बढेको फेदाप गाउँपालिकाका अध्यक्ष हरीप्रसाद चोङबाङले बताए । जसले दुर्गममा आर्थिक गतिविधिसमेत बढाएको छ । मध्यपहाडी लोकमार्ग आउने भएपछि लालीगुराँस नगरपालिका वसन्तपुरका पेम्बाछिरिीङ भोटियाले ५ करोड रुपैयाँ लगानी गरेर सुविधा सम्पन्न होटल संचालनमा ल्याएका छन् ।

लोकमार्ग सदरमुकाम म्याङलुङ छोएर आउने भएपछि म्याङलुङको ब्लू हेवन होटलका संचालक रोमभगत प्रधानाङघले पहिलेको होटल भत्काएर सुविधा सम्पन्न होटल निर्माण गरीरहेका छन् ।

सडक निर्माणसँगै होटल व्यवसायको भविष्य राम्रो देखेर खोरुङगा खोला किनारमा स्थानीय बमवहादुर र दुर्गा लिम्बू दाजुभाइले १ करोड रुपैंया लगानीमा लजसहितको रिसोर्ट संचालनमा ल्याएका छन् । लालीगुराँस नगरपालिका सुङनामका धर्मराज खडकाले पनि स्थानीय कालापानी क्षेत्रमा ३ करोड रुपैयाँको लगानीमा ब्लक वाटर रिसोर्ट सञ्चालनमा ल्याएका छन् ।

प्रकाशित : श्रावण २९, २०७६ ११:४१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT