बढे आगलागीका घटना

कविलासी नगरपालिका ३, मदनपुरमा आगलागी हुँदा राजकुमार साहको चौपाया बाध्ने गोठसँगै एउटा पाडो, २ खसी र २ हाँस जलेर मरेका छन् । गोठमा लामखुट्टे धपाउन बालिएको आगोबाट साहको २ लाख ५० हजार बराबरको धनमाल जलेर नष्ट भएको प्रहरीले जनाएको छ ।

हरिवन ११, बालगंगाका शेष जवैयरको घरमा आगलागी हुँदा १५ लाख बराबरको क्षति भएको छ । विद्युत् सर्ट भई आगो लाग्दा घरभित्र रहेका सम्पूर्ण सरसामान जलेर नष्ट भएको प्रहरीले जनाएको छ । खाना बनाउने क्रममा बरहथवा नगरपालिका ७, दुधडेरीमा आगलागी हुँदा १ लाख ७४ हजार बराबरको क्षति भएको छ । आगलागीबाट स्थानीय बेचन मुखियाले सञ्चालन गरेको बरफ उद्योगमा बरफ बनाउने क्रिम र केमिकलमा पनि आगो लागेको छ । उद्योगमा आंशिक क्षति पुगेको छ ।

यसैगरी ईश्वरपुर ७, कोठाटोलका रितेश महतोको घरमा आगलागी हुँदा १ लाख बराबरको क्षति भएको छ । हावाहुरीको मौसम सुरु भएसँगै दैनिकजसो आगलागीका घटना भइरहेको छ । घटना हुन नदिन सावधानी अपनाउन स्थानीय प्रशासनले सचेत गराए पनि न्यूनीकरण हुन सकेको छैन ।