अतिक्रमण हटाउन नगरपालिका निष्क्रिय

शिव पुरी

रौतहट — चन्द्रपुर नगरपालिकाले मंसिरमा राजमार्गको मुख्य सडक दायाँबायाँको अतिक्रमण हटाउने र बस रोक्ने स्थानलाई व्यवस्थित गर्ने निर्णय गर्‍यो । जिल्ला ट्राफिक, इलाका प्रहरी कार्यालयलगायताका सरोकारवालालाई साक्षी राखेर निर्णय गरिएको थियो ।

कार्यान्वयन अहिलेसम्म भएको छैन । मेयर आफैं निर्णय गर्दै लत्याउँदै भनेर सरोरकावालाले असन्तुष्टि जनाएका छन् । जथाभाबी गाडी रोक्ने र सडक अतिक्रमणले चन्द्रपुरको मुख्य चोक कुरूप बनाएको छ । यसको सर्वक्र विरोध हुँदै आएको छ ।

Citizen


चोकको दुवै क्षेत्रमा अतित्रमण बढ्दो छ । सडकमै पसल थाप्ने क्रम बढेको छ । जथाभाबी सवारी रोक्न छाडिएको छैन । पुरानो स्थानबाट हटाएर नयाँ पश्चिम क्षेत्रमा बस रोक्ने योजना बनाइए पनि अहिलेसम्म लथालिंग पाराले जहाँ पायो त्यहीं रोक्ने गरिएको छ । यसका बाबजुद नगरपालिकाले अतिक्रमण हटाउने र बस रोक्ने स्थानलाई व्यवस्थित गर्ने भनेर निर्णय गरेको थियो । निर्णय चाँडै नै कार्यान्वयन गर्ने मेयर रामचन्द्र चौधरीले बताए ।

‘सडक नालाको टेण्डर निस्कदै छ । नाला बने पछि दुबै तिरको क्षेत्र हटाउँछौं,’ उनले भने, ‘नाला बनेपछि सबै समस्या समाधान हुन्छ । यस विषयमा पछि कुरा गरुँला ।’ उनले जथाभावी बस रोकेर बजारक्षेत्र कुरुप बनाएको विषयमा केही बोलेनन् । पूर्वपश्चिम राजमार्ग स्थित चन्द्रनिगाहपुरको मुख्य चोकमा सबैको नजर पुग्ने र देशभरिका यात्रुहरू आहोरदोहोर गर्ने हुँदा यसलाई सफा र व्यवस्थित गर्नुपर्ने भनेर मेयर चौधरीलाई सबैले सल्लाह र सुझाव दिएका छन् । तर उनले बेवास्ता गर्दै आएका छन् ।

यहाँ सधैंजसो बिहान सडकमै गाडीको लाइन लाग्छ । अधिकांश गाडी सडकमै रोक्छन् । त्यही बेला इरिक्सार टेम्पो यात्रु बोक्न तँछाडमछाड गर्छन् । यहाँ ईरिक्सा र टेम्पो पनि ट्राफिकको टाउको दुखाइ बनेको छ । बस रोक्ने ठाउँ व्यवस्थित नभएकाले यस्तो समस्या देखा परेको हो । पूर्व जाने गाडी रोक्ने स्थान पनि त्यस्तै छ ।

राजधानीलगायत पश्चिम जाने बसहरूले चोक क्षेत्र अस्तव्यस्त पार्ने गरेको छ । बिहान सवारी व्यवस्थापन गर्न ट्राफिकलाई हम्मेहम्मे पर्छ । उनीहरू कराउँछन् । सम्झाउने गर्छन् तर बस चालकले टेर्दैनन् । ठाउँ नै नभएपछि सडकमा रोक्नुको विकल्प नभएको चालक बताउँछन् ।

नगरपालिकाले चासो नदिँदा समस्या बढेको ट्राफिक प्रहरीको भनाइ छ । ‘कतै व्यवस्थित गरौं भनेका हौं,’ ट्राफिक प्रहरी निरीक्षक विजय श्रेठ भन्छन्, ‘हामी एक्लैले कति गर्नु । गाडी चालकलाई सम्झाउनु र जरिवाना काट्नु बाहेक विकल्प छैन् ।’ ट्राफिकले जतिसुकै कडाइ गरे पनि बसचालक मान्नेवाला छैनन् ।

नो पार्किङको बेवास्ता
पूर्वपश्चिम राजमार्गस्थित चन्द्रनिगाहपुर चोकमा केही समय यता अव्यवस्थित पार्किङ बढेको छ । नगरपालिकाले बस स्ट्यान्ड हटाएर केही पर सार्ने भनिएको थियो तर व्यवस्थित गर्न नसकेपछि सडकलाई बसस्ट्यान्डका रुपमा प्रयोग गरिन थालियो । भनेको स्थानलाई व्यवस्थित गर्न नसक्दा समस्या बढेको हो ।

यहाँ चोकका बिभिन्न स्थानमा जथाभाबी बस, ट्रक रोकेर राख्छन् । बस, ट्रक, ईरिक्सा, जिप व्यस्त सडकमै पार्किङ गर्छन् । ट्राफिकले राखेको नोपार्किङ बोर्डमै लगेर सवारी रोक्छन् । उनीहरू नो पार्किङको बेवास्ता गर्छन् ।

कहिलेकाहीं चालकहरू ट्राफिकसित मुखामुख लाग्छन् । रोक्ने स्थान नभए पछि कहाँ जाने भनेर सबाल जवाफ फर्काउँछन् । चोकबाट पूर्व चाँदी र पश्चिम जंगलटोल जाने बाटोको सडक दाँयाबाँयातर्फ लहरै सवारी पार्किङ गरेर राखिएका हुन्छन् ।

ट्राफिक नियमअनुसार सडकमा सवारीसाधन पार्किङ गर्न पाइँदैन । राष्ट्रिय राजमार्ग भनिएको सडकलाई पार्किङस्थल बनाइएको छ । नियमविपरीत गरिएको पार्किङले सवारीसाधन गुडाउन मात्र होइन, पैदलयात्रुलाई हिंड्न समेत बाधा पुगेको छ ।

प्रकाशित : चैत्र ७, २०७५ ०९:२१
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

संसदीय दलले सत्तासपक्षलाई भने– ‘स्वेच्छाचारी नबन’

कान्तिपुर संवाददाता

विराटनगर — प्रदेश १ कांग्रेस संसदीय दलले सत्तासपक्षलाई स्वेच्छाचारी नबन्न आग्रह गरेको छ । सरकार र सदनमा सत्तापक्षबाट भइरहेका काम कारबाहीको समीक्षा गर्न मंगलबार बसेको कांग्रेस प्रदेश संसदीय दलको बैठकले यस्तो आग्रह गरेको हो ।

सरकार स्वेच्छाचारी बन्दै गएको र त्यस प्रभाव सदनमा समेत देखीन थालेकाले प्रतिपक्षी दलको भूमिकालाई सदनमा सशक्त र बाहिर प्रभावकारी बनाउने निर्णय गरेको दलका नेता राजीव कोइरालाले बताए ।

‘सरकारले देखाउनका लागि मात्र विपक्षीको समेत सहमति लिएजस्तो गर्ने तर भित्री रूपमा भने एक्लौटी ढंगबाट अघि बढिरहेको छ,’ कोइरालाले भने, ‘प्रतिपक्षीले सदनमा उठाएका कुनै पनि विषयको सम्बोधन भएको हामीले महसुस गर्न सकेका छैनौं ।’

लोकतान्त्रिक नियमअनुसार सभामुख सत्तासीन दलको भए उपसभामुख विपक्ष दलका हुनुपर्ने संविधानमै उल्लेख भए पनि त्यसको समेत पालना नभएको बताए । बैठकमा प्रदेशको स्थायी राजधानी र नामकरणबारे समेत छलफल भएको थियो । बैठकले हरेक महिना कम्तीमा २ वटा संसदीय दलका बैठक अनिवार्य बस्ने निर्णय भएको प्रमुख सचेतक केदार कार्कीले बताए ।

बैठकपछि कांग्रेस संसदीय दलले सरकारका एक वर्षका कामकारबाहीको मूल्यांकन गर्दै त्यसबारे जानकारी दिन पत्रकार सम्मेलनसमेत गरिएको थियो । एक वर्षमा सरकारले सामान्य बाटोसमेत तय गर्न नसकेको कांग्रेसको आरोप छ । हचुवाका भरमा घोषण गरिएका सय दिने कार्यक्रम पूर्ण रूपमा असल भएको विकास बजेट आर्थिक वर्षको अन्तिम चौमासिकसम्म आइपुग्दा ५ प्रतिशत पनि गर्न नसकेको सचेतक कार्कीले बताए ।

एक वर्षसम्म मन्त्रिमण्डल विस्तार हुन नसकेको र संसदीय समिति नेतृत्वविहीन बनेको, मन्त्रीहरूले आफ्नो निर्वाचन क्षेत्रमा मात्र विकास बजेट थुपारेको तथा विकास निर्माणका ठेक्कापट्टामा समेत पार्टीकै कार्यकर्ता भर्ना गर्नेदेखि आफन्त पोस्ने काम गरेको कांग्रेसको आरोप छ ।

‘प्रदेश सरकारको गतिविधि हेर्दा लाग्छ, उसको खासै केही काम छैन । जनतामा प्रदेश सरकारको उपस्थितिको महसुससम्म हुन सकेको छैन,’ कार्कीले भने, ‘यही तरिकाले अघि बढ्ने हो भने जनमासमा प्रदेशप्रतिको धारणा नै नकारात्मक बन्छ ।’

प्रकाशित : चैत्र ७, २०७५ ०९:२०
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT