किर्ते उपभोक्ता समिति : आरोपीको बयान सुरु

अवधेशकुमार झा

राजविराज — किर्ते गरी उपभोक्ता समिति गठन गरेको तथा सरकारी कागजात किर्ते गरेको मुद्दामा पक्राउ गरिएका आरोपीलाई सरकारी छाप दस्तखत किर्ते मुद्दामा जिल्ला अदालत सप्तरीमा पेश गरिएको छ  ।

सप्तरी जिल्लाको अग्निसाइर कृष्णासवरण गाउँपालिका तथा छिन्नमस्ता गाउपालिकामा प्रदेश सरकारको भौतिक पूर्वाधार बिकास मन्त्रालयद्वारा सञ्चालित सडक निर्माण योजनाका लागि किर्ते गरी उपभोक्ता समिति बनाएको तथा सरकारी कार्यालयको कागजात किर्ते गरेको अभियोगमा एक महिनाअघि सप्तरी प्रहरीले अनुसन्धान सुरु गरेको थियो ।

सो प्रकरणमा पक्राउ गरिएका पूर्व सांसद तथा राजपा नेपालका केन्द्रीय सदस्य बिपी यादव भनिने विश्वनाथप्रसाद यादब,राजपा नेपालका अर्का केन्द्रिय सदस्य हरिनारायण मण्डल, पूर्वाधार विकास डिभिजन कार्यालय सिरहाका सिनियर डिभिजनल इन्जिनयर राजकुमार गोइत, सप्तरीको रुपनी गाउँपालिका वीरेन्द्रवजारका दिलिपकुमार दास र रमाकान्त ठाकुरलाई जिल्ला सरकारी वकिल कार्यालयमार्फत जिल्ला अदालतमा पेश गरिएको हो ।

जिल्ला अदालत सप्तरीका न्यायाधीश उमेश कोइरालाको इजलासमा आरोपीहरूको बयान लिने कार्य मंगलबारबवाट सुरु भएको छ । मंगलबार पूर्व सांसद बिपी यादवको बयान सकिएको थियो भने बुधबार दिलिपकुमार दासको बयान सकिएको छ ।

पाँचैजना प्रतिवादीको वयान सकिएपछि थुनछेकको बहस सुरु हुने जिल्ला अदालत सप्तरीले जनाएको छ । सप्तरी जिल्लाको अग्नीसाइर कृष्णासवरण गाउपालिका वडा नम्बर २ र ३ जोडने सडकमा माटो र ग्राभेलको काम गर्न प्रदेश नम्बर २ को भौतिक पूर्वाधार विकास मन्त्रालयबाट आएको २५ लाख रुपैयाँको योजना सञ्चालन गर्न पूर्व सांसद यादव र राजपा नेता मण्डलसहितकाले मिलेर किर्ते उपभोक्ता समिति गठन गरेको आरोप छ ।

प्रदेशको भौतिक पूर्वाधार बिकास मन्त्रालयको २५ लाख रुपैयाँ बजेट फुत्काउनका लागि उनीहरू दुबै जनासहित अन्यले अग्नि गाउँपालिकाको लेटरप्याड र छाप किर्ते गरेको प्रहरीको दाबी छ ।

यस्तै उक्त गाउँपालिकाका प्रमुख प्रशासकीय अधिकृत धिरेन्द्रकुमार यादव तथा वडाध्यक्षहरूको पनि किर्ते हस्ताक्षर गरी उक्त वडामा हुँदै नभएका किर्ते ब्यक्ती खडा गरि उपभोक्ता समिती गठन गरेको आरोप पनि प्रतिवादीहरूमाथि छ । यसका अतिरिक्त उपभोक्ता समिती गठन गर्दा पेश गरिएका नागरिकताहरूमा पनि छेडछाड गरिएको प्रहरीले जनाएको छ ।

प्रदेशको भौतिक पूर्वाधार विकास मन्त्रालयद्वारा सप्तरीका सञ्चालित छिन्नमस्ता गाउँपालिका ५ लालु दासको घरदेखि पश्चिमको सडकमा माटो तथा ग्राभेलको काम गर्न किर्ते उपभोक्ता समिती गठन गरिएको खुलेको हो ।

यस प्रकरणमा पनि पुर्व सासंद तथा राजपाका केन्द्रिय सदस्य बिपी यादव र राजपा केन्द्रिय सदस्य हरि मण्डलकै हात रहेको प्रहरीको दाबी छ ।

पछिल्लो पटक छिन्नमस्ता गाउँपालिकाको वडा नम्बर ५ मा सञ्चालित लालु दासको घरदेखि पश्चिम तर्फको सडकमा माटो तथा ग्राभेलका लागि १५ लाख रुपैयाँ बराबरको योजनाका लागि पनि किर्ते उपभोक्ता समिती गठन गरिएको खुलेको हो ।

उक्त उपभोक्ता समिती छिन्नमस्ता गाउपालिकाका वडा नम्बर ५ का वडाअध्यक्ष रामानन्द पण्डितको अध्यक्षतामा भएको बैठकले गठन गरेको कागजात पूर्वाधार विकास कार्यालयमा रहेको योजनाको फाइलमा छ । जबकि रामानन्द पण्डित वडा नम्बर ५ का नभई वडा नम्बर ४ का वडाध्यक्ष हुन् ।

उक्त योजनाको फाइलमा छिन्नमस्ता गाउपालिकाकी उपाध्यक्ष उषाकुमारी मण्डलले गरेको सिफारिस समेत संलग्न छ । गत मंसिर २४ गतेको मितीमा चलानी नम्बर ३१० राखी गरिएको सिफारिस पत्र पनि किर्ते नै रहेको छ ।

छिन्नमस्ता गाउँपालिकाका प्रमुख प्रशासकीय अधिकृत अरबिन्द चौधरीले मंसिर २४ गते चलानी नम्बर ३१० को पत्र उपाध्यक्ष उषाकुमारी मण्डलको हस्ताक्षरमा खानेपानी तथा सरसफाइ १ नम्बर डिभिजन कार्यालयलाई पठाईएको पत्र भएको बताए ।

तर उक्त चलानी नम्बरको पत्र पूर्वाधार विकास कार्यालयको नाममा कसरी गयो भन्ने कुरा आफुलाई थाहा नभएको बताए । उपाध्यक्ष मण्डलले आफुले चलानी नम्बर ३१० को पत्र खानेपानी कार्यालयलाई गरिएको सिफारिसमा हस्ताक्षर गरेको र सो पत्र वडा नम्बर ५ का अनिल मिश्रलाई दिएको बताए ।

मिश्रले भने उक्त सिफारिस आफूले पूर्व सांसद बिपी यादबको भनाईमा गाउपालिकावाट लिएको र यादवलाई नै दिएको सुनाए । ‘मैले त खानेपानी डिभिजनको नामको सिफारिस दिएको थिए सोही चलानी नम्बरको सिफारिस पूर्वाधार बिकासमा कसरी गयो मलाई थाहा भएन्’, जिल्ला प्रहरमिा उजुरी दिँदै मिश्रले आफ्नो निवेदनपछि आएको सिफारिस किर्ते गर्ने उपर कारबाहीको माग गरेका छन् ।

प्रकाशित : जेष्ठ २, २०७६ १०:४४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

तरकारी संकलन केन्द्रमा भैंसी

शिव पुरी

रौतहट — यमुनामाई नगरपालिका ४ स्थित सरुअठाको तरकारी संकलन केन्द्र भैंसी राख्ने ठाउँ बनेको छ  । जिल्लाभरका किसानले उत्पादन गरेको तरकारी संकलन गरी बिक्रीका लागि बाहिर लैजाने उद्देश्यले डेढ दशकअघि बनाइएको भवन अहिले भैंसी ओसारपसार स्थलका रूपमा प्रयोग भएको छ  ।

सरुअठाका मंगल सिंहले तरकारी संकलन केन्द्रका लागि १० कठ्ठा जग्गा दिएका थिए । नेपाल सरकारले त्यही बेला दुईवटा भवन र एउटा तरकारी राख्ने टहरा बनाएको थियो । अहिले भवन अलपत्र छ ।

टहरामा व्यापारीले भैंसी बाँध्ने गरेका छन । भारतबाट ल्याइने भैंसी त्यहीं राखेर राजधानी लगायतका सहरमा लैजाने गरिएको छ । कृषि ज्ञान केन्द्रका पूर्व प्रमुख राजनारायण यादवले किसानलाई सहज होस भन्ने उद्देश्यले भवन निर्माण गरिए पनि अहिले भैंसी राख्ने काम भएको बताए ।

‘कसले त्यसरी भैंसी राख्ने गरेको हो थाहा भएन,’ उनले भने, ‘यसलाई सही सदुपयोग गर्नुपर्छ ।’ नगरपालिकाले समेत भवनलाई के गर्ने भन्ने कुनै ठोस निर्णय लिन सकेको छैन । केही दिन अघि पूर्वमन्त्री एवम नेकपाका सांसद प्रभु साहले भवनलाई सदुपयोग गर्नुपर्ने भन्दै स्थलगत अवलोकन गरेका थिए । झण्डै १ करोडको लागतमा बनेको भवनमा भैसी व्यापारीको रजगज छ ।

यहाँको तरकारी राजधानी लगायतको सहरमा बिक्री हुन्छ । किसानले छुट्टाछुट्टै लैजाँदा मूल्य नआउने र एकरूपता नभएपछि तत्कालीन जिल्ला कृषि विकास कार्यालयको पहलमा संकलन केन्द्रको भवन निर्माण गरिएको हो । केही समय व्यापारीले तरकारी राखेर बाहिर जिल्ला पठाए । वरपरका गाउँबाट तरकारी ल्याएर यही राख्थे । संकलन गरी राजधानी लैजान्थे । पछि किसानले तरकारी ल्याउन छाडे पछि भवन अलपत्र परेको थियो ।

भैंसी व्यापारीले कसरी र कहिलेदेखि प्रयोग गरेको भन्ने कसैले बताउन चाहेनन् । सम्बन्धित वडाका अध्यक्ष चेतनारायण राय यादवले भवनलाई फुलफुल तथा कृषि बजारका रूपमा प्रयोग गर्ने बताए । ‘हामी भवनलाई चाँडै नै सदुपयोगमा ल्याउँछौं,’ उनले भने, ‘यसका लागि गाउँपालिकामा ब्यापक छलफल भइरहेको छ ।’

भवनको कम्पाउण्डभित्र भैंसी ल्याउने र लैजाने गरिए पछि फोहोर भएको छ । भैसी लोड गर्न ठुला सबारी त्यही लगीन्छ । त्यहा फोहोरको डंगुर लागेको छ । दुईवठा ठुला भवनमा भैसी ब्यापारी र उनका कर्मचारी सुत्ने गर्छन् । बाहिरबाट हेर्दा तरकारी संकलन केन्द्र जस्तो लागे पनि भित्र भैसीको गोठको रुपमा रहेको छ ।

अव्यवस्थित बजार
जिल्लाका अधिकांश बजारहरूमा तरकारी बाटोमै बेच्ने गरेको पाइन्छ । ठाउँको अभावले बाटोमा राख्न बाध्य भएको ब्यापारी बताउछन् । सडक पेटी र मानिसको आवागमन हुने स्थानमा तरकारीको व्यापार गर्दा आवागमनमा समस्या हुने गरेको छ । यो समस्या जिल्लाभरी रहेको उद्योण बाणिज्य संघ चन्द्रनिगाहपुरका अध्यक्ष सुनिल जैसवालले बताए ।

‘जिल्लाभरिका बजार ब्यवस्थित छैनन्,’ उनले भने, ‘जहाँ पायो त्यही तरकारी लगायतका खाद्यान्न राखेर बिक्री गर्छन् ।’ सबैभन्दा ठुलो समस्या तरकारी ब्यवसायीलाई परेको गुनासो छ ।

उनिहरू ठाउँको अभावमा कहिले बजारमा तरकारी लैजादैनन् । सरुअठाका तरकारी किशान शेख सकिलले तरकारी संकलन केन्द्र हुदा सजिलो भएको बताउँछन् ।

‘सबैले केन्द्रमा तरकारी लैजान्थे । त्यही मोलमोलाइ हुन्थ्यो,’ उनले भने, ‘अहिले समस्या परेको छ । मूल्य पनि आउँदैन। जतिमा मन लाग्यो त्यतिमा बिक्री हुन्छ ।’ उनले तरकारी संकलन केन्द्रलाई ब्यवस्थित गर्नुपर्ने सुनाए ।

प्रकाशित : जेष्ठ २, २०७६ १०:४२
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT