३ महिनादेखि ठेकेदार सम्पर्कविहीन

सकारात्मक सोचकासाथ थालिएको काम भए पनि समयमै सम्पन्न नहुँदा जानकी मन्दिरमा आउने श्रद्धालुलाई सास्ती
श्यामसुन्दर शशि,

जनकपुर — जानकी मन्दिर परिसरमा बालुवा–ढुङगाको चाङ थुप्रारिएको छ । ढलका लागि खनिएको खाल्डा पुरिएको छैन । बालुवा–ढुङाको चाङले मन्दिरको सफाइ हुन सकेको छैन । 

मुख्यमन्त्री स्वच्छता अभियानअन्तर्गत सञ्चालित जानकी मन्दिर पुनर्निमाणमा ढिलाई हुँदा मन्दिरमा फोहरको डंगुर थुप्रिएको छ । मन्दिर परिसरमा जताततै राखिएका निर्माण सामग्रीका कारण श्रद्धालुलाई आउजाउ गर्न समस्या परेको छ । ठेकेदार तीन महिनादेखि काम रोकेर सम्पर्कविहीन छन् । जानकी मन्दिरमा थुप्रिएको निर्माण समाग्रीले दिनदिनै आउने हजारौं धर्मालम्बीले गलत सन्देश बोकेर फर्किरहेका छन् । लज्जाकै विषय बने पनि पुनर्निमाणमा प्रदेश सरकारले चासो देखाएको छैन ।

मंसिर तेस्रो साता प्रदेश २ का मुख्यमन्त्री लालबाबु राउत मन्दिर परिसरबाट ‘प्रदेश स्वच्छता अभियान’ सुरु गरेका थिए । अभियानअन्तर्गत जानकी मन्दिरमा मार्बल र टायल्स जडान, तीन मुख्यद्वार पुनर्निर्माण तथा ढल निकासका लागि ८ करोड रुपैयाँ विनियोजन गरिएको थियो । आयोजनाको शिलान्यास भई काम सुरु भए पनि कामको गति सुस्त छ । परिसरका पुराना संरचना भत्काइएकाले मन्दिर परिसर सांगुरो भएको छ । सांगुरो स्थानमा फूल, माला, प्रसादी पसल समेत थापिएकाले श्रद्धालुलाई आउजाउ गर्न कठिन छ ।

‘सुन्दरता बढाउनु सराहनीय काम हो । तर, यत्रतत्र निर्माण सामग्री थुपारिएकाले मन्दिरको सरसफाई प्रभावित भएको छ । श्रद्धालुलाई कठिनाइ भइरहेको छ,’ मन्दिरका उत्तराधिकारी महन्त रामरोशन दासले भने, ‘मन्दिरको सौन्दर्यलाई प्राथमिकतामा राख्नुपर्छ । यहाँ त ३ महिनादेखि ठेकेदारको नाकमुख देखिएको छैन ।

जानकी मन्दिरमा वर्ष भरि नै पूजाअर्चना तथा विशेष पर्व त्यौहारको आयोजन हुन्छ । जसमा हजारौंको सहभागिता हुन्छन् । श्रावणमा दुई सातासम्म चल्ने झुलनोत्सव पर्वको आयोजना हुन अब डेढ महिनामात्र बाँकी छ । असोजसँगै चाडपर्व सुरु हुन्छन् । ‘दैनिक हजारौं श्रद्धालुको आगमन हुने मठमन्दिरको काम छिटो सम्पन्न गर्नु पर्ने हो । ढिलाई हुँदा श्रद्धालुलाई कठिनाई हुन्छ,’ महन्त दास भने । यता, मुख्यमन्त्री स्वच्छता अभियानको सुपरिवेक्षण गर्दै आएका जलस्रोत सिंचाइ विभागका सिनियर डिभिजन इन्जिनियर भगवान् झाले निर्धारित समयमा काम पूरा हुने दाबी गरेका छन् । १ वर्षभित्र पूरा हुने भनिएको उक्त आयोजना अगामी ६ महिनाभित्र सम्पन्न हुने उनले बताए ।

झाका अनुसार मन्दिरको दक्षिण, पश्चिम र उत्तरी भागमा ढल जडान, च्याम्बर निर्माण तथा ढलानको काम सकेको छ । तिनतिरको काम सम्पन्न भएपछि मात्र अगाडिको काममा हात हाल्ने योजना रहेको उनले बताए ।

‘श्रद्धालुलाई मार्का नपरोस भनेरै हामीले चरणबद्ध काम थालेका हौं । अगामी ६ महिनाभित्र काम सम्पन्न हुन्छ,’ झाले भने । ढल निकास र ढलानको काम सम्पन्न भई सकेपछि वर्षाको मौसममा समेत मार्वल र ग्रेनेट जडान काम जारी रहने झाको कथन छ । पुरातत्त्व विभागले पछिल्लो पटक दिएको निर्देशनका कारण मार्वल र ग्रेनेट खरिद गर्न ढिला भएको उनले जानकारी दिए ।
मुख्यमन्त्री स्वच्छता अभियानअन्तर्गत मन्दिर परिसरमा रातो मार्वल र ग्रेनाइटको आकर्षक डिजाइन बनाउने योजना थियो । तर, पुरातत्त्व विभागले मन्दिर परिसरलाई मन्दिरभन्दा आकर्षक बनाउन नहुने बताएपछि पछिल्लो समय सेता मार्वल र ग्रेनाइट खरिद गर्नु परेको थियो ।

लाइटिङबाट तर्किए एनआरएन
जानकी मन्दिरमा लेजरलाइटसहितको आकर्षक लाइटिङ गर्ने सम्झौता गरेर गैरआवासीय नेपाली संघ सम्पर्कविहीन बनेको छ । गतवर्ष असार ९ गते गैर आवासीय नेपाली संघका अध्यक्ष भवन भट्ट र जानकी मन्दिरका महन्त रामरोशन दासबीच ५ करोडको लगानीमा मन्दिरमा विद्युतीकरण गर्ने लिखित सम्झौता भएको थियो ।

गैरआवासीय नेपाली संघका अध्यक्ष भट्ट र जानकी मन्दिर व्यवस्थापनका तर्फबाट महन्थ दासबीच भएको सम्झौतामा विवाह पञ्चमी (२०७५ साल मंसिर) सम्म मन्दिरमा लाइटिङ सिस्टम जडान गरिसक्ने उल्लेख थियो । तर लिखित सम्झौता गरे पनि संघका कुनै पदाधिकारीले योजना बारे खोजखवर नलिएको दासले बताए । ‘सुरुमा सम्बन्धित पदाधिकारीहरूसंग सम्पर्क पनि हुन्थ्यो । अहिले उहाँहरू सम्पर्कमा पनि छैनन्,’ दासले भने ।

प्रकाशित : जेष्ठ ३०, २०७६ ०९:५०
प्रतिक्रिया
पठाउनुहोस्
ADVERTISEMENT

धूमधामसँग मनाइयो गंगा दशहरा

कान्तिपुर संवाददाता

जनकपुर — हिन्दूको पवित्र पर्व गंगा दशहरा बुधबार जनकपुरमा श्रद्धा एवं भक्तिसाथ मनाइएको छ । श्रद्धालुहरू यहाँका दशरथ तलाउ, गंगासागर, धनुषसागर, अंगराजसरलगायतका सरोवरमा पवित्र स्नान गरी जानकी मन्दिर, राम मन्दिर, जनक मन्दिर, दशरथ मन्दिरलगायतका मठमन्दिरमा पूजा गरी च्युरा र आँप खाएर पर्व मनाए ।

यहाँका सरोवरहरूमा बिहानैदेखि पवित्र स्नान गर्नेको घुइँचो लागेको थियो । गंगा दशहराको अवसरमा दशरथ तलाउमा पवित्र स्नान गरी आँप–च्युरा खाने परम्परा छ तर दशरथ तलाउ जीर्णोद्धार जारी रहेका कारण श्रद्धालुलाई स्नान, पूजा गर्न कठिनाइ भएको थियो । मिथिलाञ्चलमा सिजनको आँप गंगा दशहराकै दिनदेखि खाने परम्परा छ ।

पवित्र गंगा नदी जेष्ठ शुक्ल दशमीको दिन पृथ्वीमा अवतरण भएको धार्मिक मान्यताअनुसार यस दिन गंगा दशहरा मनाइँदै आएको धर्मगुरुहरू बताउँछन् । ५ वर्षमा गंगा आरती पाँच वर्षअघि गंगादशहराको दिनदेखि जनकपुरको पवित्र गंगासागरमा सुरु गरिएको महागंगा आरती देशी विदेशी पर्यटकका लागि आकर्षक गन्तव्य बन्न थालेको छ ।

महागंगा आरती आयोजक सेभ द हिस्टोरिकल जनकपुरका अध्यक्ष एवं प्रदेशसभा सदस्य रामाशीष यादवको पहलमा पाँच वर्षअघि सुरु भएको महागंगा आरतीमा हालसम्म नेपालका पहिलो राष्ट्रपति डा. रामवरण यादव, पूर्व प्रधानमन्त्री झलनाथ खनाल, भारत बिहार प्रान्तका उपमुख्यमन्त्री सुशीलकुमार मोदी, भारतीय राजदूत रंजीत रेसहित जापान, श्रीलंकालगायत देशका राजदूत तथा नेपाल भारतका विशिष्ठ पाहुनाहरू सहभागी भइसकेको जानकारी दिए । दैनिक सन्ध्या हुने महागंगा आरतीमा सैयौंका सहभागिता हुने गरेको छ ।

वातावरण सफाईको नारासाथ सुरु सेभ द हिस्टोरिकल जनकपुरले सञ्चालन गरेको स्वक्षता अभियानअन्तर्गत सुरुमा गंगासागर सफाई गरिएको थियो । पछि सफा गंगासागरमा दैनिक आरती सुरु गरिएको थियो । ‘यो वातावरण सफाई अभियान हो । अचेल महागंगा आरती पर्यटकीय गन्तव्य बन्न थालेको छ । यसलाई अझ व्यवस्थित गर्नु हामी सबैको काम हो ।’

प्रकाशित : जेष्ठ ३०, २०७६ ०९:४८
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT