राजपत्र संशोधन मागले नगरसभा अनिश्चित

नगरपालिका प्रमुख निमफुन्जो शेर्पा र उपप्रमुख सुशीला पाख्रिनले शनिबार राजमार्गमै पत्रकार सम्मेलन गरेर बहुमतका नाममा वडाध्यक्षले विकासविरोधी गतिविधि सञ्चालन गरेको आरोप लगाएका थिए । शुक्रबार नगरसभा तयारी भइरहेका बेला कांग्रेसबाट निर्वाचित वडाध्यक्षसहित सदस्यहरू हलबाट निस्केका थिए ।

उनीहरू पालैपालो निस्केपछि गणपूरक संख्या नपुगेपछि बेलुका सभा स्थगित गरिएको थियो । राजपत्र गत साउनमा पारित गरी लागू गरिएको थियो । उक्त नगरपालिकामा कांग्रेसको बहुमत छ । नगरप्रमुख, उपप्रमुख भने तत्कालीन एमालेबाट निर्वाचित भएका थिए ।

छ महिनाअघि अनुमोदन भएर लागू गरिएको राजपत्र विवाद निकालेर नगरपालिकाले गर्ने विकासमा बाधा पुर्‍याएको आरोप प्रमुख शेर्पाले लगाएका छन् । स्थानीयको उपस्थितिमा गरिएको सम्मेलनमा विधान मिचेर माग पूरा गर्न नसकिने जिकिर शेर्पाले गरे ।

वडाध्यक्षहरूले भने प्रमुख र उपप्रमुखलाई बढी अधिकार दिएर बहुमतको अपमान गरेको संशोधन प्रस्ताव पेस गरेको बताएका छन् । २० गतेको बैठकले तय गरेको सभामा सदस्यहरू अनुपस्थित भएपछि विवाद सुरु भएको हो । बाह्रबिसे २ का वडाध्यक्ष एवं राजपत्र संशोधन संघर्ष समिति संयोजक बमबहादुर तामाङले त्यतिबेलाको प्रस्ताव राम्रोसँग छलफल नगरी अनुमोदन गरेकाले संशोधन माग गरेको बताए । तामाङले प्रमुख र उपप्रमुखलाई असीमित अधिकार दिएर आफूहरूको अधिकार कटौतीमा आपत्ति जनाए ।

राजपत्रमा उल्लेख भएअनुसार विपद् व्यवस्थापन र फ्रिज हुने रकम खर्चिने प्रावधानलगायत १२ बुँदामा बहुमत सदस्यको असहमति रहेको बताए । नगरका प्रशासकीय अधिकृत फणिन्द्रप्रसाद पौडेलका अनुुसार राजपत्र संशोधनमा छलफल गर्न नगरसभाभन्दा ७ दिनअघि प्रमुखलाई प्रस्ताव पेस गर्नुपर्ने प्रावधान छ ।