चन्द समूहका सोलुखुम्बु सचिव पक्राउ

रमेशकुमार पौडेल

चितवन — प्रहरीले चन्द समूहका सोलुखुम्बु जिल्ला सेक्रेटरी (सचिव) शिवा खड्कालाई चितवनमा पक्राउ गरेको छ । चितवन जिल्ला प्रहरी कार्यालयका प्रवक्ता प्रहरी नायब उपरीक्षक डीएसपी एकनारायण कोइरालाका अनुसार शिवालाई बिहीबार भरतपुर महानगरपालिका–२६ ज्योतिनगरबाट प्रहरीले नियन्त्रणमा लिएको हो ।

जिम्मेवारी सोलुखुम्बु नै भएपनि लुकीछिपी चितवन बस्ने गरेको सूचनाको आधारमा खोजतलास गर्दा उनलाई गिरफ्तार गरेको डीएसपी कोइरालाले बताए ।

उनी चन्द समूहमा सुरुदेखि नै आबद्ध रहेको र सो पार्टीको महिला संगठनको केन्द्रीय सदस्य, कोशी ब्यूरो संयोजक हुँदै एक वर्षदेखि पार्टीको जिल्ला सेत्रेटरी भएर काम गर्दै आएको भन्ने खुल्न आएको कोइरालाले जानकारी दिए ।

प्रकाशित : असार २६, २०७६ १९:१७
प्रतिक्रिया
पठाउनुहोस्

सिद्धबाबा नजिकै पहिरो खसेपछि सिद्धार्थ राजमार्ग अवरुद्ध

घनश्याम गौतम

रुपन्देही — सिद्धार्थ राजमार्गको बुटवल नजिकैको सिद्धबाबामा पहिरो गएपछि बिहीबार साँझदेखि राजमार्ग अवरुद्ध भएको छ । राजमार्गको माथिल्लो सिद्धबाबा नजिकैको हेडबक्समा माथिबाट पहिरो खसेर सडक अवरुद्ध भएको हो । 

सडकमा ठुला ढुङ्गा सहितको पहिरो खसेको छ । पहिरोले पाल्पाबाट बुटवलतर्फ आउँदै गरेको बस दुर्घटना हुनबाट जोगिएको र अहिले पाल्पा तर्फबाट आएका सवारी साधन दोभानमै र बुटवलबाट गएका सवारी साधन तल्लो सिद्धबाबा नजिकै राखिएको छन् ।

पानी परिरहेकाले पहिरो तत्काल हटाउन सक्ने अवस्था नरहेको इलाका प्रहरी कार्यालय बुटवलका प्रहरी नायव उपरीक्षक भीमलाल भट्टराईले बताए ।

बुटवल क्षेत्रमा तीन दिनदेखि लगातार पानी परिरहेको छ । पानी पर्न नरोकिएसम्म पहिरो पन्छ्याउन पनि कठिन रहेको प्रहरीले जनाएको छ ।

प्रकाशित : असार २६, २०७६ १९:०३
पूरा पढ्नुहोस्
प्रतिक्रिया
पठाउनुहोस्