पहिरोमा परी एकको मृत्यु, वीपी र मध्यपहाडी राजमार्ग अवरुद्ध

राजकुमार कार्की

सिन्धुली — सिन्धुलीको फिक्कल गाउँपालिका–१ को झुल्केमा पहिरोमा परी शुक्रवार दिउँसो एक महिलाको ज्यान गएको छ । प्रहरीका अनुसार लगातारको वर्षापछि खसेको पहिरोको कारण ३५ वर्षीय हेमकुमारी सुनुवारको मृत्यु भएको हो ।

गोठमा काम गर्दै गरेको बेलामा पहिरो झरेर बगाएको र स्थानीय स्वास्थ्य चौकीमा उपचारको क्रममा मृत्यु भएको प्रहरी उपरीक्षक चक्रबहादुर सिंहले जानकारी दिए ।

पहिरोमा परी गोठ र त्यहाँ रहेका तीनवटा गाई र केही बाख्रा बगेका छन् । वीपी राजमार्गको ठाउँ ठाउँमा पहिरो खसेर सडक अवरुद्ध बनेको छ । गोलन्जोर गाउँपालिका–५ को सोलाभन्ज्याँङ र खनियाँखर्क नजिक पहिरो खसेर शुक्रवार बिहानैदेखि वीपी राजमार्ग अवरुद्ध बनेको थियो । मेसिनले पहिरो पन्छाएपछि एकतर्फी सडक सञ्चालनमा आएको छ ।

यस्तै, माथिल्लो बारामा समेत पहिरो खसेर सडक अवरुद्ध बनाएको छ । पानी परिरहेकाले पहिरो सफा गर्न कठिनाइ उत्पन्न भएको छ । सुनकोशी गाउँपालिका–१ को कमेरे नजिक खहरेमा आएको बाढीका कारण राजमार्ग अवरुद्ध बनेको छ । सडक अवरुद्ध हुँदा राजधानी भित्रिने र बाहिरिने सयौँ सवारी साधन रोकिएका छन् ।

पानी पर्न नरोकिएकाले अवरुद्ध सडक खुलाउन कठिनाइ उत्पन्न भएको छ । त्यस्तै मध्यपहाडी राजमार्ग अन्तर्गत गोलन्जोर गाउँपालिका–६ को हैवारमा पहिरो खस्दा सडक अवरुद्ध बनेको छ ।

प्रकाशित : असार २७, २०७६ १५:४४
प्रतिक्रिया
पठाउनुहोस्

बाराका विभिन्न स्थान डुबानमा

पवन यादव

सिमरा(बारा) — विगत ५ दिनदेखिको निरन्तर झरी र मुसलधारे वर्षाका कारण बारा जिल्लाको विभिन्न स्थानमा घर र सडक डुबानमा परेका छन् ।बर्षाको पानीले जितपुर सिमरा उपमहानगरपालिका १८ बडहरवामा आधा दर्जन बढी घरहरू डुबानमा परेका छन् । 

पानीको बहाव क्रमिक रूपमा बढ्दै गएको कारण थप घरहरू डुबानमा पर्ने सम्भावना समेत बढेको स्थानीय बासिन्दाले बताएका छन् । गाउँ नजिकै रहेको बंगरी र दुधौरा नदीमा पनि पानीको बहाव बढ्दै गएको र नदीको पानी सतहभन्दा माथि उक्लेर खेतहरु जलमग्न भएका छन् ।

बाराको लालबकैया, बंगरी, दुधौरा, पसाहा नदीमा बिहानदेखि नै ठुलो बाढी आएको छ । ती सबै नदीमा अहिले तीव्र गतिमा पानीको बहाव बढ्न थालेको स्थानीय बासिन्दाले बताएका छन् । लालबकैया नदीमा बिहानको तुलनामा पानीको बहाव धेरै बढेको निजगढकी धनमाया लामाले जानकारी दिइन । ‘बिहान पानी कम थियो,’ उनले भनिन, ‘११ बजे सम्म पानीको सतह धेरै माथि उक्लेको र पानीको वेग पनि धेरै बढेको छ ।’

वर्षाको पानीले जिल्ला सदरमुकाम कलैयाका सडक तथा खुल्ला स्थानहरु पुरै जलमग्न भएका छन् । कलैया लगायत आसपासका गाउँहरुमा रहेका होचा घरहरुमा समेत अहिले पानी पस्न थालेको छ ।

जिल्लाको ठुला तथा साना नदीहरुमा पानीको बहाव बढेपनि अहिलेसम्म मानवीय तथा भौतिक क्षति नभएको जिल्ला प्रहरी कार्यालयका प्रवक्ता डीएसपी रंजितसिंह राठौरले जानकारी दिए ।

जितपुर सिमरा २४ हरपुरमा दुधौरा नदीको बाढी पस्ने सम्भावना बढेकोले स्थानीय बासिन्दालाई स्थानीय मस्जिदमा सारिएको बाराका प्रमुख जिल्ला अधिकारी राजेश पौडेलले जानकारी दिए ।‘बाढीले प्रभाव पार्ने सम्भावित क्षेत्रको पहिचान भइसकेकोले त्यस क्षेत्रका स्थानीय तहलाई सजग गराएका छौँ,’ उनले भने, ‘२ दिनको बर्खाले खासै ठुलो असर नपर्ला ।’ तै पनि स्थानीय प्रशासन, स्थानीय तह सजग रहेको उनले दाबी गरे ।

बाढी बस्ती पस्ने सम्भावित स्थानका स्थानीय तहलाई समयमै सचेत रहन र पानीको मुहान थुनिएको क्षेत्रलाई सफा गर्न सजग गराइएको उनले जानकारी दिए । स्थानीय तहमा रहेका विपद् व्यवस्थापन समितिलाई समेतसक्रिय गराइएको र अहिलेसम्म बाढीले क्षति नपुर्‍याएको उनले दाबी गरे ।

यस्तै भारी वर्षाका कारण निजगढ नगरपालिकाको विभिन्न क्षेत्रपनि डुबानमा परेका छन् । वर्षाको पानीले निजगढ बजार क्षेत्रका अधिकांश सडक जलमग्न हुँदा यात्रु र सर्वसाधारण समस्यामा परेका छन् ।

प्रकाशित : असार २७, २०७६ १५:३०
पूरा पढ्नुहोस्
प्रतिक्रिया
पठाउनुहोस्