दुई सरकारी कार्यालय खुले

कान्तिपुर संवाददाता

नवलपरासी — संघीयता कार्यान्वयनपछि नवलपरासीबाट टुक्रिएर नयाँ जिल्ला बनेको नवलपुरमा जिल्ला अस्पताल र घरेलु कार्यालय खुलेका छन् ।

दुवैको गण्डकीका मुख्यमन्त्री पृथ्वीसुब्बा गुरुङले उद्घाटन गरेका हुन् । सरकारी कार्यालय र अधिकांश संरचना नवलपरासीमा परेपछि नयाँ जिल्लामा वर्ष दिनयता नयाँ कार्यालय खुल्ने क्रम जारी छ । १२ वर्षअघि स्थानीयको प्रयासमा धान्याचल महायज्ञ गरेर स्थापना गरिएको डण्डाको मध्यविन्दु सामुदायिक अस्पताललाई सरकारले जिल्ला अस्पताल बनाउने निर्णय गरेको हो ।

Citizen


महायज्ञबाट त्यतिबेला संकलित करिब २ करोड रुपैयाँको लागतमा भवन निर्माण गरेर सञ्चालनमा आएको अस्पताललाई सरकारले जिल्ला अस्पताल बनाउने निर्णय गरेअनुसार मंगलबार मुख्यमन्त्रीले साइनबोर्ड फेरेर जिल्ला अस्पताल लेखिएको बोर्ड अनावरण गरेका हुन् ।

मुख्यमन्त्री गुरुङले अबदेखि उक्त अस्पताल सञ्चालनको जिम्मेवारी सरकारको रहेको घोषणा गरे । ५५ शैय्या सञ्चालनको अनुमति पाएको जिल्ला अस्पतालमा सरकारी दरबन्दीका चिकित्सक र प्राविधिक कर्मचारी खटाइएको छ । चारजना चिकित्सकको दरबन्दी रहेको अस्पतालमा हाल तीनजना कार्यरत छन् । जिल्ला विभाजनपछि पूर्वी नवलपरासीमा पहिलोपटक सरकारले जिल्ला अस्पताल बनाउने निर्णय गरे पनि समुदायले निर्माण गरेर सञ्चालन गर्दै आएको पुरानै भवनमा जिल्ला अस्पताल नवलपुर लेखिएको छ ।

अस्पताल हातामा जर्मनको हेल्फी भन्ने संस्थाको ४ करोड ५० लाख सहयोगमा आधुनिक भवन निमार्णाधीन अवस्थामा छ । अब अस्पतालको सबै जिम्मेवारी सरकारको रहेको र उपचारका लागि चितवन वा काठमाडौं धाउनपर्ने अवस्था अन्त्य हुनेगरी सबै व्यवस्थापन गरिने मुख्यमन्त्री गुरुङले बताए । यसैगरी सेक्टर वन कार्यालय हातामा हाल अस्थायी रूपमा रहने भए पनि छिटै अर्को घर भाडामा लिएर सञ्चालन हुनेगरी घरेलु तथा साना उद्योगको जिल्ला कार्यालय खुलेको छ ।

हालसम्म पूर्वी नवलपरासीको कावासोतीमा १६ वटा सरकारी कार्यालय स्थापना भइसकेको छ । मालपोत, नापी, विद्युत्, दूरसञ्चार, प्रहरी र इलाका प्रशासन कार्यालय पहिल्यैदेखि सञ्चालनमा रहे पनि स्तरोन्नति गरेर सञ्चालन गरिएका छन् । अधिकांश कार्यालय घर भाडामा लिएर सञ्चालन गरिएका छन् ।

जिल्ला कार्यालयहरू स्तरोन्नति गरिएका कारण कर्मचारीको दरबन्दी थप्ने काम भइरहेको प्रमुख जिल्ला अधिकारी उदयराज नेपालले बताए । ‘सबै सरकारी कार्यालयलाई एउटै ब्लकमा राख्न जग्गा प्राप्तिको सबै काम सकिएको छ,’ उनले भने, ‘सबै सरकारी कार्यालयलाई एकै ठाउँमा राख्दा व्यवस्थित र सेवाग्राहीलाई सहज हुनेछ ।’

प्रकाशित : फाल्गुन ३०, २०७५ १०:१९
ADVERTISEMENT
प्रतिक्रिया
पठाउनुहोस्
ADVERTISEMENT

घर जलेपछि चन्दा उठाएर बिहे

भरत जर्घामगर

सिरहा — बिहे घरमा नातागोता, आफन्तजन र छिमेकी भरिभराउ थियो । सजिसजाउ टेन्टमा स्वयंवरका सोफा सजिएका थिए । विवाह घर बाजागाजाले गुन्जमायन अनि उमंग, टोलनै उल्लासमय । मंगलबार साँझ दुलाहाको पर्खाइमा थिए सिरहा गम्हरियाका राधेश्याम चौधरी परिवारसहित टोलवासी । 

राधेश्याम चौधरीकी जेठी छोरी सुष्माको विवाहमा सुनसरी डुमराहाबाट साँझ बेहुला सुरजसहित जन्ती आउने भएकाले मंगलबार बिहानैदेखि टोल छिमेकका निम्तालुलाई भोज खुवाउन पकवान तयारी भइरहेको थियो तर बिहे भोज बनाउन प्रयोग गरिएको ग्यास सिलिन्डरपड्किँदा क्षणभरमै उमंग रुवावासीमा परिणत भयो ।

सिरहाको लहान नगरपालिका २२ गम्हरियाका राधेश्यामकी जेठी छोरी सुष्माको बिहे भोज बनाउन प्रयोग गरिएको ग्यास सिलिन्डर बिहान ९ बजे पड्किँदा आगो लागी बिहे सामग्रीसहित दुई घर जलेर नष्ट भए ।

आगलागीबाट राधेश्यामका मामाका छोरा सुखीलाल चौधरी र थेटर चौधरीको घर, सरसामान जलेर नष्ट भयो । आगलागीबाट बिहेको सामग्री, खाद्यान्न, लत्ताकपडा, सुखीलाल चौधरीको ८ लाख नगदसहित गरगहना, थेटर चौधरीका घरका सामान जलेर नष्ट भयो ।

बिहेको उमंगमा रहेका निम्तालु टोलछिमेकी आगो निभाउन तल्लीन भए । लहान र गोलबजार नगरपालिकाको वारुण यन्त्रले तीन घण्टापछि आगो नियन्त्रणमा लिए पनि बिहे घर हेर्दाहेर्दै खण्डहरमा परिणत भयो । आगलागीबाट नगद, सुनचाँदी, गरगहनासहित २५ लाख रुपैयाँ बराबरको धनमाल जलेर नष्ट भएको प्रहरीको प्रारम्भिक अनुमान छ ।

‘बिहेको उमंग स्थल हेर्दाहेर्दै खण्डहर भयो,’ बेहुलीका ठूलो बुबा बालकृष्णले भने, ‘सजिसजाउ बिहे घरमा दैवले विपत्ति निम्त्याइदियो ।’ विवाह सामग्री नष्ट भएपछि बेहुलीका बुबा राधेश्यामसँग भक्कानिनुबाहेक केही विकल्प रहेन ।

‘२ लाख रुपैयाँ स्वालम्बन बैंक, १ लाख श्रमजीवी बचत तथा ऋण सहकारी र ३ लाख रुपैयाँ गाउँघरमा ऋण लिएर छोरीको विवाह तयारी गरेको थिएँ,’ बेहुलीका बुबा राधेश्यामले भने, ‘एकातिर यस्तो विपत्ति आइलाग्यो, अर्कोतिर ऋण, दैवले पनि मै गरिबलाई नै दुःख दियो ।’

सम्पत्तिको नाममा डेठ कठा जग्गा मात्र भएका राधेश्यामको परिवारले हाउस वायरिङ गरेर गुजारा चलाएको थियो । पाँच छोरी र एक छोराका पिता राधेश्यामले सुनसरीबाट एसएलसी उत्तीर्ण जेठी छोरी सुष्माको मगनी भएपछि ऋण काढेर भए पनि विवाहको चाँजोपाँजो मिलाएका थिए । ‘हुर्केबढेको छोरी विवाह गर्नैपर्थ्यो,’ बुधबार बिहान छोरी अन्माएर पठाएपछि चिन्तित राधेश्यामले भने, ‘ऋण काढेर बिहे तयारी गर्दा मैमाथि वज्रपात आइपर्‍यो ।’

गुजारा चलाउन समस्या भएपछि पाँच वर्षअघि राधेश्याम वैदेशिक रोजगारीका लागि कतार हान्निएका थिए । आलमुनियम कम्पनीमा काम पाए पनि दुई वर्षमै कम्पनीटुटेपछि उनी फर्किए । त्यतिखेर कतार गएको ऋण माक्र चुत्ता गरे । पैसा कमाउन सकेनन् । ‘त्यसपछि गाउँघरमै हाउस वायरिङ गरेर गुजारा चलाएँ,’ उनले भने, ‘पटक पटक मैमाथि दैव लाग्यो हजुर ।’

आगलागीबाट सबै नष्ट भएपछि बिहे रोक्न हुँदैन भनेर छरछिमेक र वडाध्यक्ष विन्देश्वर यादवको पहलमा बिहे उतार्न तत्कालै चन्दा संकलन सुरु गरे । ‘छिमेकी भोटिया टोलबाट पनि तत्कालै २४ हजार नगद, गाउँबाट ९ हजार गरी ३३ हजार संकलन भएपछि लत्ताकपडा र विवाह सामग्री किन्न छिमेकी खटिए,’ छरछिमेक र नातागोताको गुन सम्झँदै राधेश्याम भन्छन्, ‘गम्हरीयाका घरलौरीबाट दाल, चामल, तरकारी संकलन भयो, कोही छिमेकी स्वयंम्वर स्थल सिंगार्न थाले ।’

६ घण्टामै पुनः बिहेस्थललाई पहिलाजस्तै सिंगारियो तर पहिलाजस्तो रौनक रहेन । छिमेकीले जन्तीलाई भोज खुवाउन खानेकुरा तयार पारे । नातागोता आफन्तले बिहेमा उपहार दिन दोहोरो सामग्री खरिद गरे । साँझ ९ बजे सुनसरी डुमराहाबाट जन्ती आए । बिहेकर्म गरेर बुधबार बिहान बेहुली अन्माएर पठाए । ‘सपनाजस्तै लाग्छ,’ टोलाइरहेका श्यामपरी र राधेश्याम दम्पतीले भने, ‘बिहे त टर्‍यो तर जीवनभर अविस्मरणीय बनेर मानसपटलमा रहिरहने भयो ।’

प्रकाशित : फाल्गुन ३०, २०७५ १०:१६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT