हुरीपीडितलाई जस्तापाता दिने सांसदको घोषणा

कान्तिपुर संवाददाता

नवलपरासी — पूर्वी नवलपरासीको देवचुली नगरपालिकामा हुरीले छानो उडाएका परिवारलाई सांसद विनोद चौधरीले एक सय बन्डल जस्तापाता सहयोगको घोषणा गरेका छन् । चौधरी फाउन्डेशनका अध्यक्ष उद्योगपति चौधरीले व्यक्तिगत तर्फबाट रंगीन जस्तापाता दुई दिनभित्रै उपलब्ध गराउने बताए ।

मंगलबार राति डेढ मिनेट आएको हावाहुरीले नगरको सीताबास, रामबास, मुन्डे, विशालटार र लक्ष्मीपुर क्षेत्रका दुई सयभन्दा बढी घरगोठको छानो उडाएको थियो । असिनापानीले खाद्यान्न र लत्ताकपडा भिजाउँदा स्थानीय मर्कामा परेका छन् ।

प्रकाशित : जेष्ठ ९, २०७६ १९:३३
प्रतिक्रिया
पठाउनुहोस्
ADVERTISEMENT
ADVERTISEMENT

गजुरी बन्छेटारको दुर्घटनामा मृत्यु हुनेको संख्या १२ पुग्यो, हराएका तीन फेला परेनन्

कान्तिपुर संवाददाता

धादिङ — पृथ्वी राजमार्गको गजुरी बन्छेटारमा चार दिनअघि दुर्घटनामा परेका दुई भारतीय बालकसहित तीन जना अझै बेपत्ता छन् । बस दुर्घटनामा बेपत्ता भएका ५ मध्ये झापाका कृष्णप्रसाद निरौला र लोकबहादुर भण्डारीको शव बुधबार साँझ त्रिशूली किनारमा फेला परेको छ । यी दुईसहित मृत्यु भएकाको संख्या १२ पुगेको छ । 

दुर्घटनापछि भारत मेघालयका दिदी/भाइ क्रमश : १३ वर्षीय रिया मार्विन र ११ वर्षीय रिशान बेपत्ता छन् । यी दुईसँगै यात्रामा रहेकी आमा शकुन्तला गुरुङले आफ्नो सन्तान बेपत्ता भएको बताएकी हुन् । दुर्घटनामा घाइते उनी राजधानीस्थित ट्रमा सेन्टरमा उपचार गराइरहेकी छन् । सिद्धलेक ४ सलाङघाटका २३ वर्षीय उज्ज्वल पाण्डे पनि बेपत्ता छन् । उनलाई एकाबिहानै काठमाडौं पठाउन दाजु उद्धवले मोटरसाइकलमा राखेर राजमार्गसम्म ल्याई सोही बसमा चढाएर घर फर्केका थिए ।

जिल्ला प्रहरीले बेपत्ता ३ जनाको तस्बिर र हुलिया सार्वजनिक गर्दै खोजतलासमा सहयोग गर्न त्रिशूली किनारका बासिन्दा र मजदुरलाई आग्रह गरेको छ । बेपत्ता भारतीय बालबालिकाको खोजी गर्ने क्रममा भारतबाट आफन्तजनसमेत घटनास्थल पुगेका छन् । नेपाल प्रहरी तथा सशस्त्र प्रहरीका गोताखोरहरूले दैनिक त्रिशूली किनारमा खोजी कार्य जारी राखेको गजुरीस्थित प्रहरी निरीक्षक नवराज ढुंगेलले बताए ।

प्रकाशित : जेष्ठ ९, २०७६ १९:२५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT