गण्डकीका मुख्यमन्त्री र चिनियाँ प्राध्यापकहरुबीच भेटवार्ता

मंगलबार चिनियाँ प्राध्यापकहरुको टोलीसँग भेटघाट गर्दै हेवई विश्वविद्यालयका नेपाल हेर्ने विभागका निर्देशक प्राध्यापक झाङ्ग सु विन र युनान विश्वविद्यालयका प्राध्यापक डा. युवान क्वान नेतृत्वको प्राध्यापकहरुको समूहले मुख्यमन्त्री गुरुङसँग छलफल गरेका हुन् । मुख्यमन्त्रीको कार्यलायमा भएको भेटघाटमा मुख्यमन्त्री गुरुङले टोलीलाई गण्डकी प्रदेशको अवस्था र प्रदेशले लिएको कार्यदिशाको बारेमा जानकारी गराएका थिए ।

सोही क्रममा उनले मुस्ताङको कोरला नाका सञ्चालनमा ल्याउनुपर्ने बताएका थिए । पर्यटन र खेलकुदको क्षेत्रमा लागानी गरिदिन समेत मुख्यमन्त्री गुरुङ्ले सो टोलीलाई आग्रह गरेका थिए । चिनियाँ टोलीले आफ्नो लगानीकर्ता नेपालमा लगानी गर्न इच्छुक रहेको तर त्यसका लागि अनुकुलता आवश्यक रहेको बताएका थिए ।

गण्डकी प्रदेशमा अनुकुल वातावरण बनाउन आफू तयार रहेको मुख्यमन्त्री गुरुङलाई आश्वसन दिए । चिनियाँ टोलीले होङ्सी सिमेन्टले भोगिरहेको समस्याको विषयमासमेत मुख्यमन्त्रीको ध्यानाकर्षण गराएको थियो । मुख्यमन्त्री गुरुङले यसबारे आफू अवगत रहेको र प्रदेश ५ सँग अहिले समस्या सम्बन्धित रहेको जानकारी गराए । होङ्सी सिमेण्टले अहिले प्रदेश ५ को पाल्पाबाट कच्चा पदार्थ ढुवानी गरिरहेको छ ।