होमस्टेले सुधार्‍यो आनीबानी

प्रताप रानामगर

दमौली — तनहुँको व्यास–१४ कुलुङमा होमस्टे सञ्चालनमा आएको धेरै समय भएको छैन । होमस्टे सञ्चालन अघि स्थानीयको रहनसहन र जीवनशैली पुरानै थियो । घरआँगन, गल्ली र बाटोघाटो व्यवस्थित थिएनन् । ‘पहिले घरवरिपरि जताततै सुंगुर बंगुरका खोर थियो,’ स्थानीय श्रीमाया आलेले भनिन्, ‘दुर्गन्धले बसिनसक्नु हुन्थ्यो ।’ 

होमस्टे सञ्चालनपछि भने गाउँ र गाउँवासीको आनीबानीमा निकै परिवर्तन आएको छ । स्थानीयले घरआँगन, बाटोघाटो सरसफाइमा ध्यान दिएका छन् । होमस्टे मार्फत गाउँमा पर्यटक भित्र्याउन गाउँले लागेका छन् ।

‘गाउँ सुन्दर छ,’ उनले भनिन्, ‘अझै राम्रो बनाउन सरसफाइमा ध्यान दिएका छौं ।’ पर्यटकलाई मध्यनजर गर्दै घरवरिपरि पाल्दै आएको सुंगर र बंगुरको खोर सबैले हटाएको उनले बताइन् । होमस्टेका कारण सरसफाइमा परिर्वतन आएको उनको भनाइ छ । गत मंसिरबाट होमस्टे सञ्चालन गरेको कुलुङ सामुदायिक होमस्टेका अध्यक्ष रीतामाया थापाले बताइन् ।

होमस्टे सञ्चालन भएपछि गाउँमा परिवर्तन आएको उनको दाबी छ । घरआँगन, बाटोघाटो सरसफाइ, फोहोर व्यवस्थापन, बाटोघाटोमा फूल रोपणजस्ता काम भएको छ । ‘गाउँवासीको आनीबानीमा निकै परिवर्तन भएको छ,’ उनले भनिन्, ‘पहिले परिचय पनि दिन नसक्नेले अहिले आफूलाई लागेको सबै कुरा भन्न सक्ने भएका छन् ।’

अतिथि सत्कारदेखि खानापान र पाहुनालाई गाउँ घुमाउन सक्ने भएका छन् । होमस्टेले व्यक्तिको व्यक्तित्व विकास र समाज परिवर्तनमा सहयोग गरेको उनले बताइन् । होमस्टे सञ्चालन गरेपछि गण्डकी प्रदेश सरकारले पूर्वाधार विकासका लागि दस लाख रुपैयाँ दिएको थियो । मौलिक संस्कृतिहरू लोप हुने अवस्थामा पुगेको थियो । होमस्टेमा आउने पाहुनालाई लोपन्मुख नाँच देखाउँछन गाउँलेले ।

मगर जातिको मौलिक नाँच कौराहा, झाउरे, कृष्णचरित्र र नेवार समुदायको लाखे नाच पाहुनालाई देखाउँदा लोपन्मुख नाचको संरक्षण भएको स्थानीय छाब्दीबाराही आमा समूहकी अध्यक्ष एव्म होमस्टे सञ्चालक नानीमाया आलेले बताइन् । पाहुनालाई देखाउन पनि पुराना नाच संरक्षणतर्फ लागेका छौं । होमस्टे सञ्चालनपछि व्यक्तिको आनीबानीमा परिर्वतनदेखि संस्कृति संरक्षणसम्म सहयोग भएको छ ।

सरसफाइयुक्त यस गाउँमा आउने पर्यटकले पारिवारिक व्यवहार, सद्भाव, सहिष्णुता एवं एकताले पर्यटकको मन जित्ने वातावरण सिर्जना गरिरहेका छन । अर्गानिक खानाका परिकार, मगर र नेवार समुदायको सांस्कृतिक नाच, प्राकृतिक दृश्यालोकन, प्रसिद्ध धार्मिकस्थल छाब्दीबराही मन्दिरको दर्शन गर्न पनि कुलुङ होमस्टेका विशेषता हो । तनहुँको सदरमुकाम दमौलीबाट १८ किलोमिटर तथा पृथ्वी राजमार्गको छिर्कनबाट ७ किलोमिटर दक्षिणमा कुलुङ होमस्टे पुग्न सकिन्छ ।

यस्तै तनहुँको प्रसिद्ध छाब्दीबाराही मन्दिरबाट करिब ६ किलोमिटरको दूरीमा पूर्वतर्फ कुलुङ रहेको छ पहाडकी रानी उपनामले परिचित पर्यटकीय नगरी बन्दीपुरबाट करिब १२ किलोमिटर दूरीमा कुलुङ रहेको छ ।

प्रकाशित : श्रावण २०, २०७६ ०९:३७
ADVERTISEMENT
प्रतिक्रिया
पठाउनुहोस्
ADVERTISEMENT

सहकारी नियमावली पारित

प्रतीक्षा काफ्ले

गण्डकी — गण्डकी प्रदेशको मन्त्रिपरिषद्ले प्रदेश सहकारी नियमावली पारित गरेको छ । सहकारी ऐन कार्यान्वयनका लागि बनेको नियमावली लामो समयपछि पारित भएको हो । 

सरकारका प्रवक्ता तथा भौतिक पूर्वाधार विकासमन्त्री रामशरण बस्नेतले लामो समयसम्म छलफलमा रहेको सहकारी नियमावली पारित भएको आइतबार पत्रकार सम्मेलनमा बताए । मन्त्रिपरिषद् बैठक गत शुक्रबार बसेको थियो । नियमावली पारित भएसँगै प्रदेशअन्तर्गतका सहकारीको दर्ता, नवीकरणलगायत कामको बाटो खुलेको छ ।

यसैगरी बैठकले मुख्यमन्त्री पृथ्वीसुब्बा गुरुङको विदेश भ्रमणको स्वीकृतिका लागि केन्द्रसँग अनुरोध पठाउने निर्णय गरेको छ । भदौ ७ र ८ गते तमुदी यूकेको आयोजनामा हुन लागेको नेपालीहरूको भेलालाई मुख्यमन्त्री गुरुङले सम्बोधन गर्न जाँदै छन् । भ्रमणमा प्रदेश सरकारको आर्थिक दायित्व नपर्ने बस्नेतले बताए ।

यसैगरी बैठकले प्रदेश विकास प्राधिकरणसम्बन्धी विधेयकको तर्जुमाका लागि सैद्धान्तिक स्वीकृति दिएको छ । आर्थिक मामिला तथा योजना मन्त्रालयले ससर्त अनुदानको कार्यविधि, समपूरक अनुदानसम्बन्धी कार्यविधि र विशेष अनुदानसम्बन्धी कार्यविधि स्वीकृतका लागि प्रस्ताव ल्याएको छ ।

सोहीअनुरूप समपूरक अनुदान कार्यविधि २०७५ मा केही संशोधन पेस भएका दफा ४, उपदफा ३ को सट्टा संशोधनका लागि प्रस्तावित उपदफा ३ मा रहेका ७० प्रतिशतसम्म भन्ने शब्दको सट्टा ६० प्रतिशतसम्म भन्ने राखेर संशोधन गरेको छ ।

स्थानीय तहसँग सहकार्य गरी गरिने योजनाको काममा प्रदेश सरकारले ७० र स्थानीय तहले ३० प्रतिशत बजेट राख्नुपर्ने व्यवस्था संशोधन भएर स्थानीय सरकारको ४० र प्रदेश सरकारको ६० प्रतिशत रहनेछ । उद्योग पर्यटन वन तथा वातावरण मन्त्रालयको केही प्लास्टिकजन्य पदार्थ नियन्त्रणका लागि बनेको विधेयकको मस्यौदा गर्न सैद्धान्तिक स्वीकृति पनि बैठकले दिएको छ ।

भूमि व्यवस्था, कृषि तथा सहकारी मन्त्रालयको गण्डकी प्रदेशमा चिनियाँ सरकारको सहयोगमा सञ्चालन हुने डेरीका माध्यमबाट ग्रामीण गरिबी घटाउने कार्यक्रम सहजीकरणका लागि कृषि मन्त्रालयलाई स्वीकृत दिने निर्णय गरेको छ । कृषिमन्त्रीको संयोजकत्वमा २ विज्ञसहित १७ सदस्यीय कार्यसमितिसमेत गठन गरिनेछ ।

प्रकाशित : श्रावण २०, २०७६ ०९:३६
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT