म्याद सकियो, पुल बनेन

प्रताप रानामगर

दमौली — तनहुँको भीमाद मिर्मीभीम मार्गमा रहेको जिदी खोला मोटरेबल पुल निर्माण अलपत्र परेको छ । ठेकेदारले लापरबाहीले पुल अलपत्र परेको हो । 

पुल निर्माणको म्याद सकिइसकेको छ । तर, पुल भने बन्न सकेको छैन । पुलको जग राख्ने र सबस्ट्रक्चर राख्ने कामबाहेक केही पनि नभएको डिभिजन सडक तनहुँका सूचना अधिकारी सचिन श्रेष्ठले बताए । ‘पुल निर्माणमा प्रगति नभएपछि ठेकेदार कम्पनी शान्ति निर्माण सेवालाई ताकेता गरिरहेका छौं,’ उनले भने ।

दुई स्पानको पुलको लम्बाइ ७० मिटर छ । चार करोड ९० लाख ८२ हजार रुपैयाँको लागतमा पुल निर्माणका लागि २०७३ असार २९ मा सम्झौता भएको थियो । सम्झौता भएको दुई वर्षको अवधिमा निर्माण सम्पन्न गर्नुपर्ने म्याद थियो । सम्झौताअनुसार ०७५ असार २८ मा निर्माण सम्पन्न गर्नुपर्ने हो ।

ठेकेदार कम्पनीले म्याद थपका लागि निवेदन दिएको श्रेष्ठले बताए । ‘निवेदन दियो भन्दैमा म्याद थप्ने होइन । ठेकेदारसँग पुल निर्माणमा ढिलाइको कारणसहित उत्तर मागेका छौं,’ उनले भने, ‘तर, अहिलेसम्म चित्तबुझ्दो उत्तर आएको छैन ।’ चित्त बुझदो उत्तर नआए हर्जना लगाउने गरी म्याद थप्न सकिने उनले उल्लेख गरे । म्याद थपका लागि निवेदन दिए पनि अहिलेसम्म कुनै प्रक्रिया अघि बढाइएको छैन ।

निर्माण सामग्री नपाउँदा निर्माणमा ढिलाइ भएको ठेकेदार विनोद महर्जनले बताए । ‘फाउन्डेसनका काम भइसकेको छ,’ उनले भने, ‘अन्य निर्माण सामग्री नआउँदा ढिलाइ भएको हो ।’ निर्माण सामग्री नेपालमा नपाइने र भारतबाट ल्याउनुपर्ने भएकोले माग गरिसकेको ठेकेदार कम्पनीले जनाएको छ । निर्माण सामग्री आएको ६ महिनाभित्र पुल निर्माण सकिने उनले बताए ।

पुल निर्माण नहुँदा बर्खायाममा समस्या हुने स्थानीय निर्मल थापाले बताए । ‘खोलामा बाढी आउँछ,’ उनले भने, ‘गाडी तर्न सकिँदैन । सवारी साधन तर्न नसक्दा यात्रुले सास्ती खेप्नुपरेको छ ।’ ज्यान जोखिममा राखेर तर्न बाध्य भएको उनले बताए । उक्त सडक खण्डमा कालोपत्रे र ग्राभेल भइसकेको छ । जिदी खोलामा मोटरेबल पुल निर्माण सुरु भएपछि मिर्मी–भिमाद सडक खण्डअन्तर्गत जिदीखोलादेखि रातेपहरासम्म कालोपत्रे गरिएको छ ।

प्रकाशित : श्रावण २८, २०७६ १०:१६
ADVERTISEMENT
प्रतिक्रिया
पठाउनुहोस्
ADVERTISEMENT

फिडर छात्रावासमा पुरुष कुरुवा

प्रकाश बराल

बागलुङ — यहाँको एक विद्यालयमा ४० वर्षअघि स्थापित फिडर छात्रावासमा (छात्रामात्र बस्न पाउने) पुरुष कर्मचारी बसेका छन् । तोकिएकी वार्डेन भने दुई वर्षदेखि नियमित बस्दिनन् । महिला वार्डेन नबस्दा किशोरीहरूले आफ्नो समस्या पनि बताउन सकेका छैनन् ।

विद्यामन्दिर माविमा सञ्चालित फिडर छात्रावासमा लेखापाल धर्मराज शर्मा २ दशक देखि बस्दै आएका हुन् ।

महिलाको साटो पुरुष बसेपछि किशोरीहरूले बिरामी पर्दा आफ्नो समस्या बताउन नसकेको गुनासो गरे । ‘राति बिरामी पर्दा हामीले सरलाई भन्न सक्दैनौं, मेडम बसिदिए राम्रो हुन्थ्यो,’ एक किशोरीले भनिन्, ‘नुहाउने, कपडा फेर्ने लगायतको बेला पनि समस्या पर्छ ।’ वार्डेन गंगा शर्माले धर्मराजको श्रीमतीसहित बस्ने भएकाले केटीहरूलाई समस्या नपर्ने बताइन् । उनले भवन निर्माणाधीन भएकाले नियमित बस्न नसकेको समेत दाबी गरिन् ।

धर्मराज भने २०५६ सालदेखि यहाँ बस्दै आएको खुलेको छ । उनी कार्यालय सहयोगीका रूपमा विद्यालय प्रवेश गरेका थिए । पछि उनलाई लेखापालको जिम्मा दिइएको छ । उनी परिवारसहित छात्रावास बस्दै आएका हुन् । प्रअ शान्तमणि ढकालले भने पुरुष हटाएर महिला वार्डेन अनिवार्य बस्ने व्यवस्था गर्न लागेको बताए ।

‘म आएको तीन महिना भयो, वार्डेन नबसेको देखेपछि कुरा उठाएको छु,’ ढकालले भने, ‘हटाउन खोज्दा लेखापालले गाह्रो मानिरहनु भएको छ ।’ २० जनासम्म छात्रा राखिने छात्रावासका लागि सरकारले प्रतिव्यक्ति मासिक ४ हजारका दरले दस महिनाको ४० हजार रुपैयाँ अनुदान दिन्छ । छात्रावासको वार्डेनलाई २ हजार, सुरक्षागार्डलाई २ हजार ४ सय अतिरिक्त भत्तासमेत दिने गरेको छ ।

शिक्षा विकास तथा समन्वय इकाइको प्रमुखको अध्यक्षतामा जिल्ला प्रशासन कार्यालयको अधिकृत र जिल्ला समन्वय समितिको प्रतिनिधि सदस्यमा रहेको व्यवस्थापन समिति रहने गरेको छ । विद्यालयको प्रअ पदेन सदस्य र छात्रवासको वार्डेन सदस्य सचिव रहने व्यवस्था छ । समन्वय प्रमुख कुश्मराज उपाध्यायले पुरुष बस्नै नपाइने बताए ।

प्रकाशित : श्रावण २८, २०७६ १०:१५
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT