सकारात्मक सोचको विकास गरौं : मुख्यमन्त्री पोखरेल 

माधव अर्याल

पाल्पा — सकारात्मक सोचको विकास नगर्दासम्म विकास र समृद्धि सम्भव नभएको प्रदेश ५ का मुख्यमन्त्री शंकर पोखरेलले बताएका छन् । उनले दिमागमा रहेको नकारात्मक सोचलाई २०७६ सालको सुरुवातबाट नै त्यागेर जान आफ्ना प्रदेशका नागरिकलाई आग्रह गरेका हुन् । 


प्रदेशसभा सदस्य डा. पुरनमान बज्रचार्यले तानसेनमा आयोजना गरेको शुभकामना तथा सम्मान कार्यक्रममा बोल्दै उनले सकारात्मक सोंच भएन भने विकास र समृद्धिको सपना पूरा नहुने बताए। ‘सबैको राम्रा पक्षलाई भन्दा नराम्रा पक्षलाई बढी वकालत गर्दै हिँड्ने एउटा बानी छ,’ उनले भने, ‘त्यसलाई सुधार गर्न सकियो भने विकास र समृद्धिको सपना पूरा हुन्छ।’ प्रदेश ५ सरकार समृद्ध प्रदेश निर्माणको अभियानमा जुटेको उनले बताए।

विगतमा जो जसले नकारात्मक सोच राखे पनि अब सकारात्मक सोच लिएर अघि बढ्ने हो भने समृद्धि छिटै आउने उनले बताए। ‘५ नम्बर प्रदेशकै पर्यटकीय गन्तव्यका रुपमा पाल्पालाई विकास गर्ने सोच बनाएका छौं,’ उनले भने, ‘तानसेनलाई पर्यटनमैत्री सहरका रुपमा विकास गरेर सोच पनि बदल्न जरुरी छ।’

उनले ५ नम्बर प्रदेशकै संग्रहालयका रुपमा पाल्पा दरबारलाई विकास गर्न लागेको बताउँदै श्रीनगर बतासेडाँडामा बन्ने सांस्कृतिक डबलीबाट फाइदा लिन सक्नुपर्नेमा जोड दिए।

मुख्यमन्त्री पोखरेलले संविधान जारी भएपछि बितेका तीन वर्ष काम गर्न नसकेको स्वीकारे। ‘पहिलो वर्ष भूकम्प र नाकाबन्दी, दोस्रो वर्ष तीन वटा निर्वाचन गर्दागर्दै बितेको छ,’ उनले भने, ‘गएको एकवर्ष तीन वटै सरकार कानून बनाउनमा बिताएका छन्।’

तेस्रो वर्ष संघीयता कार्यान्वयन गर्ने कानून बनाउने वर्षका रुपमा गुजार्‍र्यौं। तीनवटै वर्ष जटील र चुनौतीपूर्ण थिए तर विकास ४ बाट बढेर ६ प्रतिशतको विकास हासिल भएको छ।’

प्रदेश नम्बर ५ का सभामुख पूर्णबहादुर घर्तीले नयाँ वर्षले प्रदेशलाई विकासको मोडमा अघि बढाउन कानुन निर्माण र योजना तर्जुमाको अन्तिम चरणमा पुगेको बताए। उनले प्रदेश सरकारले गरेका कामहरुले गति लिने बताए।

सभामुख घर्तीले समृद्ध प्रदेश खुसी जनता सरकारको नारालाई सबैले साथ दिएर अगाडी बढ्न आग्रह गरे। सोही अवसरमा पिपुल्स क्रियशन प्रालिले सञ्चालन गरेको सेरोफेरोन्यूज डटकमले प्रकाशन गरेको भित्तेपात्रोको मुख्यमन्त्री पोखरेल र सभामुख घर्तीले विमोचन गरे। सोही अवसरमा डा. बज्राचार्यले तानसेन बजारभित्रका ८४ पुगेका ज्येष्ठ नागरिकलाई सम्मान गरेका थिए।

प्रकाशित : वैशाख १, २०७६ १३:२८
प्रतिक्रिया
पठाउनुहोस्

चर्पी बनाउन अटेर गर्नेको सुविधामा रोक

माधव अर्याल

पाल्पा — रम्भा गाउँपालिका–४, हुमीन लोहोरेङका जितबहादुर सारुले भूकम्पले भत्काएको चर्पी अहिलेसम्म बनाएका छैनन् । उनको घर–आँगन फोहोर छ । लिपपोत गरिएको छैन । घरमा पढेलेखेकी बुहारी बस्छिन् । छोरा विदेश छन् । चर्पी बनाउनेबारे चिन्ता गरेका छैनन् । 

अहिलेसम्म शौचालय नबनाएपछि गाउँपालिका अध्यक्ष विष्णुप्रसाद भण्डारी उनको घरमा पुगे । उनलाई सम्झाउन महिला स्वास्थ्य स्वयंसेविका धेरैपटक धाइन् । ‘अटेर गरेपछि प्रहरीसमेतको टोलीले घरमा गएर सम्झाइबुझाइ गर्‍यो,’ वडाध्यक्ष भोजबहादुर विकले भने, ‘अटेर गर्नेको अब सेवासुविधा रोकिनेछ ।’ गाउँपालिका पूर्ण सरसफाइउन्मुख छ । ५ नम्बर वडा पूर्णसरसफाइ घोषणा भइसक्यो ।

४ नम्बर वडा तयारीमा छ । अहिलेसम्म २० प्रतिशत परिवारले पूर्ण सरसफाइमा साथ दिएका छैनन् । त्यसैले अनुगमन गरिएको छ । लोहोरेङ गाउँमा जितबहादुरजस्तै १०/१२ घरले अटेर गरेका हुन् । उनीहरूलाई धेरैपटक सम्झाइबुझाइ गरिसकिएको छ । गाउँपालिका अध्यक्ष भण्डारी, प्रहरी सहायक निरीक्षक राजु थारु, वडाध्यक्ष विकलगायतको टोली सम्झाउन पुग्यो । प्रहरीको त्रास देखाइयो । ‘अब पाँच दिनभित्र सबै काम सक्छौं भनेका छन्,’ वडाध्यक्ष विकले भने, ‘यदि मानेनन् भने उनीहरूलाई सबै सेवासुविधा रोक्ने गरी निर्णय गर्नेछौं ।’

हुमीन बजार नजिकका ६ घरमा शौचालय छैनन् । माथिल्लो टोलमा पनि अवस्था उस्तै छ । मार्सिडाँडाका केही घरपरिवारले अटेर गरेका छन् । उनीहरूलाई पनि अनुगमन टोलीले सम्झाएको छ । ‘रम्भा गाउँपालिकाको आफ्नै शान, पूर्ण सरसफाइ उन्मुख गाउँपालिका हाम्रो अभियान’ लाई सफल पार्न पूर्ण सरसफाइ वडा घोषणा गर्न लागेको प्रमुख प्रशासकीय अधिकृत कृष्णप्रसाद ढकालले बताए ।

‘हात धुने, सरसफाइ गर्ने भन्ने सिकाउन पनि गार्‍हो काम हो,’ उनले भने, ‘अभियानलाई साथ दिनुस् भन्दै घरघरमा डुल्दा पनि समस्या देखियो ।’ घर–घरमा विभिन्न सूचकसहितको फ्ल्याक्स सूचना टाँसिएको छ । गाउँपालिका अध्यक्ष, उपाध्यक्ष, वडाध्यक्षहरू, स्वास्थ्यकर्मी, सुरक्षाकर्मी, सुआहारा कार्यक्रमका कर्मचारी, महिला स्वास्थ्य स्वयंसेविकालगायतका सरोकारवाला अभियानमा छन् ।
‘गाउँपालिकाको टिम अभियानमा होमिएको छ,’ स्वास्थ्य शाखा प्रमुख महेश आचार्यले भने, ‘तर पनि अटेर गर्नेहरू रहेका छन् ।’ उनले गाउँपालिका र वडाले अब अटेरी गर्नेलाई सिफारिसलगायत सेवासुविधा रोक्ने चेतावनी दिएको बताए । अनुगमनमा खटिएका वडा ३ का सदस्य हेमप्रसाद अर्यालले भने, ‘सरसफाइलाई पूर्ण रूपमा संचालन गर्नका लागि पानी आवश्यक देखियो ।’

गाउँपालिकाले हुमीनमा विभिन्न टोली बनाएर अनुगमन गर्दै आएको छ । पूर्ण सरसफाइयुक्त वडा घोषणा गर्न गैरसरकारी संस्था सुआहारा र पछौटेपन उन्मूलन समाज (बेस) ले प्राविधिक सहयोग गरेका छन् ।

प्रकाशित : चैत्र २४, २०७५ ०९:५८
पूरा पढ्नुहोस्
प्रतिक्रिया
पठाउनुहोस्