खरमुक्त घर अभियान

रूपा गहतराज

नेपालगन्ज — संघीय सरकारले बाँकेका गरिब तथा विपन्न वर्गका लागि ‘खरमुक्त घर’ अभियान सुरु गर्ने भएको छ । त्यसका लागि १३ करोड ५० रुपैयाँ बजेट विनियोजन गरिएको छ । त्यसका लागि सम्बन्धित निर्वाचन क्षेत्रका प्रतिनिधिसभा सदस्यको नेतृत्वमा सुरक्षित नागरिक आवास समन्वय समिति गठन गरिएको छ । 

‘जिल्लामा २ हजार ७ सय सुरक्षित नागरिक आवासका लागि बजेट छुट्याइएको छ,’ सघीय आयोजना कार्यान्वयन एकाइका इन्जिनियर होमनाथ भुसालले भने, ‘उक्त बजेट अनुसार सम्बन्धित निर्वाचन क्षेत्रका प्रतिनिधिसभा सदस्यको नेतृत्वमा रहेको समितिले काम सुरु गरेको हो ।’

उनका अनुसार नेपालगन्ज उपमहानगरपालिकामा १ हजार ४ सय घरलाई प्रतिघर ५० हजार रुपैयाँका दरले सहयोग गर्न लागिएको छ । डुडुवा गाउँपालिकामा ७ सय, जानकी गाउँपालिकामा ३ सय र नरैनापुर गाउँपालिकामा ३ सय घरका लागिसरकारले बजेट छुट्याएको छ ।

‘खरका छाना भएका घरलाई सुरक्षित बनाउन टिन उपलब्ध गराउने अभियान हो,’ उनले भने, ‘आगलागीको जोखिमबाट सिंगो बस्ती जोखिममा पर्दै गएपछि सरकारले यस खालको योजना अघि सारेको हो ।’

खरमुक्त घरका लागि छनोट प्रक्रियासमेत सुरु भइसकेको छ । सहरी विकास तथा भवन निर्माण विभागले बाँकेसँगै बर्दियाका ३ सय ५० घरलाई खरमुक्त बनाउनेछ । जिल्लाको बढैयातालमा १ सय र गुलरिया नगरपालिकामा २ सय खरका घरमा टिनका लागि अनुदान दिइने इन्जिनियर भुसालले बताए ।

‘वडामा आवेदन परेपछि आर्थिक रूपमा कमजोरलाई प्राथमिकतामा राखेर अनुदान दिइनेछ,’ उनले भने । छनोट भएका स्थानीय तहका वडामा २५ देखि १ सय ४० वटा घरसम्म योजनामा समेटिने उनले बताए ।

‘वडाले स्थानीय तह र स्थानीय तहले समितिमा पठाएपछि अनुदान दिने क्रम सुरु हुनेछ,’ उनले भने । सरकारले प्रतिघर टिन लगाउनका लागि ५० हजार रुपैयाँ नगद सहयोग गर्नेछ ।

प्रकाशित : जेष्ठ ८, २०७६ ११:५८
प्रतिक्रिया
पठाउनुहोस्

बर्दिया चिनाउन कार र्‍याली

कान्तिपुर संवाददाता

रूपन्देही — वन्यजन्तु र सफारी पर्यटनको सम्भावना भएर पनि ओझेलमा परेको बर्दिया निकुञ्ज र आसपासका पर्यटकीय गन्तव्यको प्रचारका लागि व्यवसायीले कार र्‍याली गरेका छन् । दुई दिनअघि बर्दियाको ठाकुरद्वाराबाट सुरु र्‍याली मंगलबार बिहान बुटवल आइपुगेको छ । उनीहरू दाङ, कपिलवस्तु र लुम्बिनी हुँदै यहाँ आएका हुन् । 

बिहान यहाँका पर्यटन व्यवसायीसित बर्दिया निकुन्ज र त्यसको मध्यवर्ती क्षेत्रमा रहेका पर्यटकीय सम्भावनाबारे छलफल गरे । आन्तरिक पर्यटकका हिसाबले प्रदेश ५ को राजधानी बुटवलमा प्रशस्त सम्भावना रहेकाले भ्रमणका लागि निम्ता गरेका थिए ।

प्रदेशको पश्चिम छेउमा भए पनि वन्यजन्तु र सफारी पर्यटनका लागि बर्दिया विश्वमै परिचित रहेको पर्यटन व्यवसायीले जानकारी गराएका थिए । बुद्ध जन्मस्थल लुम्बिनीपछि प्रदेशको महत्त्वपूर्ण गन्तव्यका रूपमा निकुञ्ज रहे पनि सरकारले विकासमा
सहयोग नगरेको उनीहरूको गुनासो छ ।

गत माघीको अवसरमा बर्दिया भ्रमण वर्षको घोषणा गरे पनि अहिलेसम्म प्रचारप्रसार थिएन । त्यसैले मुलुकका अन्य पर्यटकीय स्थलमा पुगेर बर्दिया चिनाउन लागि परेको पर्या-पर्यटन विकास मंचका पूर्वअध्यक्ष कृष्णप्रसाद भट्टराईले बताए । ‘प्रदेश सरकारले लुम्बिनी भ्रमण वर्षसँगै बर्दियालाई जोडन सकेन,’ उनले भने, ‘बर्दिया र लुम्बिनी नीतिगत रूपमा जोडिन आवश्यक छ ।’

विकास मंचको अगुवाइमा गत जेठ ५ गते र्‍याली सुरु भएको थियो । पाल्पा, पोखरा, चितवन, नेपालगन्ज हुँदै सदरमुकाम गुलरियामा पुगेर यसको समापन गरिने उनले बताए । र्‍यालीलाई यहाँ होटल तथा रेस्टुरेन्ट व्यवसायी संघ जिल्ला शाखाले स्वागत गरेको थियो । बर्दियामा पर्यटक भित्र्याउने लक्ष्यसहित भ्रमण वर्ष घोषणा गरिएकाले प्रचार आयोजना गरिएको पर्या-पर्यटन विकास मन्चका अध्यक्ष मोहनलाल थारुले बताए ।

‘बर्दिया भ्रमण वर्ष सफल बनाउन प्रचार थालिएको हो,’ उनले भने, ‘बर्दियामा पर्यटकीय विकासका लागि सरकारबाट सहयोग भएको छैन ।’ लुम्बिनी र बर्दिया निकुन्जलाई जोडेर पर्यटकीय पूर्वाधार विकास गर्न सकेमा त्यसले प्रदेशको समृद्धिमा सहयोग पुर्‍याउने उनले बताए ।

गत वर्ष प्रदेश सरकारले सार्वजनिक गरेको बजेटमा ठाकुरद्वारामा नाट्यशाला निर्माण गर्ने उल्लेख थियो । त्यसबाहेक त्यहाँको पर्यटन प्रवर्द्धनका लागि बजेट छुटयाइएको थिएन ।

प्रकाशित : जेष्ठ ८, २०७६ ११:५६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT