पुल नबन्दा बस्ती डुबानको चिन्ता

सन्जु पौडेल

(रूपन्देही) — बुटवल उपमहानगरपालिकाअन्तर्गत तीनकुने–देवीनगर जोडने पुल निर्माणमा ढिलाइले स्थानीय सास्ती खेप्न बाध्य छन्  । नगरको मध्य भागमा लामो समयसम्म पुल निर्माण नहुँदा मर्का परेको हो  ।

असार मसान्तभित्र पूरा गर्नेर् गरी गत फागुनमा शिलान्यास गरिएको थियो । अहिलेसम्म जग निर्माणको काम सकिएको छैन ।

घना बस्ती जोडने पुल अधुरै रहे वर्षायाममा ओहोरदोहोर नहुने र बस्ती डुबानमा पर्ने चिन्ता बढेको छ । वर्षामा तीनकुने, देवीनगर डुबानमा पर्ने खतरा रहेको स्थानीय तिलक पौडेलले बताए । ‘काम पूरा नगर्ने ठेकेदारले किन जिम्मा लिनू,’ उनले भने, ‘पुल नबन्दा वृद्धवृद्धा र विद्यार्थीले दुःख पाएका छन् ।’

यहाँबाट रानीगन्ज, अमुवा, मनोहरा, कालीकानगर, मझुवालगायत बस्तीका बासिन्दा ओहोर–दोहोर गर्छन् । लामो समयदेखि उनीहरू घुमाउरो बाटो प्रयोग गर्न बाध्य भएको स्थानीय सरोजकुमार श्रेष्ठले बताए । ‘टाढाबाट आउने विद्यार्थी, यात्रु र गाडीलाई सास्ती भएको छ,’ उनले भने, ‘पुल निर्माण नहुँदा भित्री सडकमा गाडीको चाप बढेको छ ।’

बाबुल दिव्य जेभी कन्स्ट्रक्सनले १ करोड ४० लाख रुपैयाँमा उपमहानगरसित ठेक्का सम्झौता गरेको हो । निर्माण अवधि पूरा हुन एक महिना बाँकी रहेका बेला पुलको ५ प्रतिशत पनि काम भएको छैन । निर्माणमा तीव्रता दिन सम्बन्धित निकायले पनि चासो दिएका छैनन् । जसले गर्दा कामको प्रगति शूल्य रहेको छ । यसअघि जीर्ण रहेको पुल भत्काएर नयाँ निर्माण गर्न लागिएको हो ।

‘नयाँ पुल बन्ने भयो भनेर खुसी थियौं,’ समावेशी टोल विकास संस्थाका अध्यक्ष दुर्गाप्रसाद पौडेलले भने, ‘अहिले थुनिएका छौं । वर्षामा बस्ती, व्यापारिक प्रतिष्ठान र शिक्षण संस्था डुबानमा पर्ने चिन्ता छ ।’ शिलान्यास गर्दा असार मसान्तमा सम्पन्न गर्ने भनिए पनि अहिलेसम्म जग निर्माण नहुनु विडम्बना भएको उनले बताए ।

यसको निगरानी गर्ने निकाय छिटो कामका लागि दबाब दिनुको साटो कानमा तेल हालेर बसेको उनले आरोप लगाए । उक्त पुल भएर प्रत्येक दिन हजारौं मानिस ओहोरदोहोर गर्थे । व्यस्त सडकको पुल स्तरोन्नतिको काम तोकिएको अवधिमा पूरा नहुँदा समस्या बढेको छ । निर्माण कम्पनीका प्रतिनिधि सन्दीप थापाले सम्झौताअनुसार असार मसन्तमा पुल निर्माण सम्पन्न गर्न नसकिने बताए । उनले कमजोरी भएको स्वीस्कार गरे ।

‘पहिला बिजुलीको पोल नसार्दा काम गर्न दुःख भयो,’ उनले भने, ‘अहिले कुलापानीको कामले ढिला भएको हो ।’ निर्माण कम्पनीको लापरबाहीले समयमै काम सम्पन्न हुन नसकेको बुटवल उपमहानगरपालिकाका योजना प्रमुख सुमन श्रेष्ठले बताए ।

‘जिम्मा दिने बेला गरिएको सम्झौता अवधि तोड्न नमिलेर पर्खिएका छौं,’ उनले भने, ‘३ महिना २५ दिनको अवधि सकिएपछि मात्रै कारबाही गर्ने विकल्प छ ।’ उक्त अवधि नपर्खेर कारबाही गर्दा निर्माण कम्पनी अदालत जाने र झन् समस्या बल्झिने भएकाले कुर्नुको विकल्प नरहेको उनले जनाए ।

प्रकाशित : जेष्ठ २९, २०७६ १२:३४
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

झरीमा लगाएको कालोपत्रे उप्कियो

आश गुरुङ

(लमजुङ) — आर्थिक वर्षको अन्तिमतिर आएर बेंसीसहरको मनाङे चौतारादेखि सेराबजारसम्मको सडकको ओभरले (पुरानो कालोपत्रेमाथि कालोपत्रे) सुरु गरिएको छ  । गत वर्षभन्दा यसपटक चाँडै पानी पर्न थालेको छ  ।

तर, सडकको मर्मत भने झरीमा समेत जारी छ । पुरानो कालोपत्रेबाट ३ सेन्टिमिटर पुनः नयाँ बिटुमिन राखेर गरिएको कालोपत्रे उक्किन थालेको छ । मनाङे चौताराका पूर्णचन्द्र घिमिरेले वर्षायामको समय गरिने विकास राम्रो नहुने बताए । ‘कालोपत्रे गर्दै आयो । हेर्दा राम्रो देखियो । केही गिट्टी पनि मिसिएको जस्तो देखिन्छ’ उनले भने, ‘गाडी हिँडैमा कालोपत्रे उक्कियो । गाडी फर्काउँदा भत्कियो । खै के हो, बुझ्नै सकिएन ।’

करिब ९ सय मिटर सडक ओभरले गर्नुपर्नेमा सडक मर्मत सुरु गरिएको एक महिनाको अवधिमा पुरानो बैंक चोकसम्म करिब ३ सय मिटर ओभरले गरिएको छ । ‘पानी परेको बेलासमेत काम गर्छन्,’ हाइस्कुलचोकका राजु थापाले भने । सडक मर्मत भए पनि राम्रो हुन नसकेको उनले बताए । ‘अलकत्र केही ठाउँमा नलागेको देखियो । यसरी अडिन्छ त ? भन्दा बाक्लो हाले त उकिन्छ भनेर कामदारले जवाफ दिए,’ उनले भने ।

सडक डिभिजन दमौलीले बेंसीसहर बजारभित्रको मुख्य सडकको लेयरमा कालोपत्रेको काम सुरु गरेको हो । बजार एरियारमा ‘ओभरले’ गर्न सुरुमा खाल्डो टालेर पछि पुरानो कालोपत्रेमाथि कालोपत्रे थप राखिएको छ । कुल १ करोड रुपैयाँको स्टेमेट भ्याटबाहेक ७७ लाख २७ हजारमा ठेक्का निकालिएको थियो । बेंसीसहर नगरपालिका प्रमुख गुमानसिंह अर्यालले अनुगमन र निरीक्षण राम्रो हुन नसक्दा काम पनि राम्रो नभएको बताए । ‘अहिले मात्रै होइन, यहाँको मर्मत कहिल्यै राम्रो हुन सकेन । कति भनें, भनें’ उनले भने, ‘पहिले राम्रैजस्तो लाग्छ, पछि बिग्रने गरेको छ ।’

डिभिजन सडक कार्यालयअन्तर्गत लमजुङको एकाइ कार्यालयका सब–इन्जिनियर हरिकुमार श्रेष्ठले काम राम्रो भएको दाबी गरे । कालोपत्रे भने केही ठाउँमा उक्किएको उनले स्विकारे । ‘ओभरलोड गाडी गुडा, गाडी थन्क्याउँदा तथा फर्काउने, घुमाउने ठाउँमा छेउछाउ केही उक्किएको छ । केही ठाउँमा भत्किएको पनि छ,’ उनले भने, ‘त्यसलाई मर्मत गर्न निर्माण व्यवसायीलाई भनिसकेका छौं ।’

कालोपत्रे हालिसकेपछि कम्तीमा ७२ घण्टा राख्नुपर्नेमा गाडीका पांग्रा घुमाउँदा उक्किएको उनले बताए । उनले वर्षायामको समय पानी पर्ने भएकाले पानी पर्दै गर्दा काम नगर्न आग्रह गरिएको बताए ।

उक्त काम सक्न असार मसान्तभित्रको समयसीमा छ । पोखरास्थित भान्जा एसआर जेभीले वैशाख १० गते सम्झौता गरेर काम अघि बढाएको सडक कार्यालयका डिभिजन इन्जिनियर विष्णुप्रसाद काफ्लेले बताए । उनका अनुसार सुरुमा सडकको खाल्डाखुल्डी पुरिएको र त्यसपछि अलकत्र हालेर कालोपत्रे गरिएको छ । ‘तोकिएको समयमा काम सक्छौं’ उनले भने ।

प्रकाशित : जेष्ठ २९, २०७६ १२:३२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT