साढे २ करोडमा अस्पताल

कान्तिपुर संवाददाता

दैलेख — इन्जिनियर दम्पतीले निजी लगानीमा दुल्लुमा १५ शय्याको अस्पताल सञ्चालनमा ल्याएका छन् । ग्रामीण क्षेत्रमा अस्पताल स्थापनापछि स्थानीयवासी स्वास्थ्य सेवा पाइने आसले खुसी भएका छन् ।

निजी लगानीमा दुल्लुमा स्थापित आशाराम हस्पिटल उद्घाटन कार्यक्रममा बोल्दै कर्णाली प्रदेशसभा सदस्य सुशील थापा ।तस्बिर : कान्तिपुर

इन्जिनियर कपिल खनाल र उनकी श्रीमती इन्जिनियर सुशीला मिश्रले २ करोड ५० लाखको लागतमा ‘आशाराम हस्पिटल’ निर्माण गरेका हुन् । आधुनिक सुविधासहित अस्पताल स्थापना भएपछि महँगो रकम तिरेर सहरतिर जानुपर्ने बाध्यता हटेको दुल्लुका नगर प्रमुख घनश्याम भण्डारीले बताए । ‘निजी लगानीमा सुविधा सम्पन्न अस्पताल बनेपछि यहाँका बासिन्दालाई धेरै राहत मिल्ने अपेक्षा गरिएको छ,’ उनले भने ।

Citizen


अस्पतालमा आकस्मिक सेवाका साथै एक्स–रे, भिडियो एक्स–रे, डिजिटिल एक्स–रे, डेन्टल सेवा, स्तरीय प्रयोगशाला सेवा सुविधा रहेका अस्पतालका प्रबन्ध निर्देशक कपिल खनालले बताए । सहरका सुविधा सम्पन्न अस्पतालमा पाइने सुविधा यहाँ उपलव्ध रहेको उनको भनाइ छ ।

हजुरबुवाको नाममा स्थापित उक्त अस्पताललाई निकट भविष्यमै सय शय्यामा स्तरोन्नति गरिने उनले जानकारी दिए । अस्पताल उद्घाटन कार्यक्रममा प्रदेशसभा सदस्य सुशील थापाले उपचार नपाएर ज्यान गुमाउन नपर्ने बताए । ‘निजीस्तरबाट जिल्लाकै सुविधा सम्पन्न अस्पताल स्थापना भएपछि जनता खुसी भएका छन्,’ उनले भने, ‘अब उपचार नपाएर कसैको ज्यान जाने छैन ।’

अहिले दुल्लुसहित दैलेखका बिरामीले जटिल स्वास्थ्य समस्या आउँदा उपचारका लागि सुर्खेत, नेपालगन्ज जानुपर्ने बाध्यता छ । अस्पतालका हाडजोर्नी विशेषज्ञ डा. प्रकाश थापाले गाउँमै सहज र भरपर्दो सेवा उपलब्ध भएपछि बिरामी बाहिर जाने क्रम रोकिने बताए ।

प्रकाशित : माघ २९, २०७५ १०:४२
प्रतिक्रिया
पठाउनुहोस्

केरा खेतीमा रोग, पहेँलिँदै बोट कुहिँदै गबारो

भवानी भट्ट

कञ्चनपुर — कञ्चनपुरमा केरा खेतीमा गबारो कुहिने र पात सुक्ने समस्या देखिएको छ । सुरुमा पात पहेँलिँदै जाने र पछि गबारोसमेत कुहिएर बोटको वृद्धि विकास रोकिने गरेको छ । पछिल्ला एक/डेढ महिनामा यस्तो समस्या देखिएको हो ।

कञ्चनपुरको वेदकोट नगरपालिका ५ पोल्खरीमा रोग पहिचान गर्न नमुना लिँदै कृषि प्राविधिकहरू । तस्बिर : भवानी/कान्तिपुर

असारतिर रोपेको केराको बोट पूरै पहेँलो भएको छ । गबारो कुहिएर गन्हाउन थालेको छ । ‘गबारो तान्दा फेदसम्म कुहिएको आउ‘छ,’ यसै वर्षदेखि केरा खेती सुरु गरेका वेदकोट नगरपालिका ५ पोल्खरीका गौरीसिंह बोहराले भने, ‘पातहरू पनि पहेँलो भएर सुुक्दै गएका छन् ।’

बोहरासहित ३ परिवारले असारमा १ हजार ५ सय केराका बोट ल्याएर खेती सुरु गरेका थिए । तिनै परिवारको बारीमा एउटै किसिमको समस्या देखिएको छ । ८ महिनासम्म पनि राम्ररी वृद्धि विकास हुन नसकेको उनीहरू बताउँछन् ।

कृषकहरूका अनुसार जिल्लाभरिकै केरामा अहिले गबारो कुहिने र पात पहेँलो हुने समस्या देखिएको छ । टिस्यु कल्चरबाट उत्पादन गरिएका सबै बोटहरूमा उक्त समस्या देखिएको केरा उत्पादन तथा कृषि सहकारी संस्था कञ्चनपुरका अध्यक्ष पूर्णसिंह साउदले बताए ।

‘केही दिनयता बढेको चिसोका कारण पनि यस्तो समस्या भएको हुन सक्छ,’ उनले भने, ‘अन्य रोग वा समस्या नभए गर्मी लाग्ने बित्तिक्कै गबारो पलाउन सुरु हुन्छ ।’ कञ्चनपुरमा यस वर्षमात्रै ४० बिघाभन्दा बढीमा केरा खेती सुरु गरिएको छ । अधिकांशमा यस्तो समस्या देखिएको कृषकहरू बताउँछन् । बाली संरक्षण प्रयोगशाला सुन्दरपुर कञ्चनपुरका बाली संरक्षण अधिकृत अमर ठगुन्नाका अनुसार लक्षण हेर्दा ढुसीजन्य रोग हुन सक्ने देखिएको छ । तर ल्याब परीक्षणका लागि सुन्दरपुरकै प्रयोगशालाका साथै काठमाडौंमा समेत नमुना पठाइएको उनले बताए ।

‘चिसोले हो वा रोगकै कारण यस्तो भएको हो परीक्षणपछि मात्रै खुल्छ,’ बाली संरक्षण अधिकृत ठगुन्नाले भने, ‘तर तत्काल हेर्दा ढुसीजन्य रोगका लक्षण पनि देखिएका छन्, यसका ब्याक्टेरिया सामान्य रूपमा हेर्न सकिँदैन ।’ उनले केराखेतीमा देखिएको समस्याबारे कृषि मन्त्रालय र सुदूरपश्चिम प्रदेशको कृषि मन्त्रालयमा समेत जानकारी गराइएको बताए ।

ठगुन्नाका अनुसार जिल्लामा खेती गरिएकोमध्ये जी ९ प्रजातिमा यस्तो समस्या देखिएको छ । जी ९ कञ्चनपुरका लागि सिफारिस नगरिएको जात पनि हो । सिफारिस हुने क्रममा रहेको ठगुन्नाले बताए । तर कृषकहरूले यही जातलाई बढी रुचाउने गरेको उनले जानकारी दिए । उनका अनुसार फोनमार्फत र कृषकहरू आफैं आएर पनि केरामा देखिएको समस्याबारे जानकारी गराउन थालेका छन् ।

प्रधानमन्त्री कृषि आधुनिकीकरण परियोजना धान जोन कञ्चनपुरका वरिष्ठ कृषि विकास अधिकृत टीकाराम थापाका अनुसार ३ वर्षअघि पनि हिउ‘दमा केरामा यस्तै समस्या देखिएको थियो । कतिपय कृषकले ठूल्ठूला बारीहरू काटेर खाली गरेका थिए ।

तर गर्मी लागेसँगै उक्त समस्या आफैं हटेर गएपछि सुधार भएको उनले बताए । ‘अन्य रोग, कीरा नलागेको भए चिसोले नै यस्तो भएको हुन सक्छ,’ वरिष्ठ कृषि विकास अधिकृत थापाले भने, ‘विषादीले समेत उक्त समस्या समाधान हु‘दैन, तातो लागेपछि आफैं ठीक हुन्छ ।’ उनले खेतीको व्यवस्थापनको कमजोरीका कारण पनि यस्तो समस्या देखिने बताए ।

प्रकाशित : माघ २९, २०७५ १०:४०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT