पहिरोले कुलो भत्काउँदा विद्युत अवरुद्ध
डोल्पा–दुनै — वर्षाका कारण पहिरो खसेर जैरीगाड साना जलविद्युत केन्द्रको कुलो भत्किँदा विद्युत आपुर्ति अवरुद्ध भएको छ ।
पहिरोले नहरको ७० मिटर कुलो बगाएर विद्युत अवरुद्ध हुँदा सदरमुकाम दुनै र आसपासको क्षेत्र अन्धकारमय बनेको छ ।
ठूलीभेरी नगरपालिका–३ जैरिगाडस्थित साना जलविद्युत आयोजनाको माथिबाट आएको पहिरोले नहरमा राखिएको पेनस्टक पाइपलाई समेत बगाए पछि विद्युत आपुर्ति अवरुद्ध भएको हो ।
२ सय किलोवाट क्षमताको आयोजना बन्द हुँदा उपभोक्ता समस्यामा परेका छन् । विद्युत आपुर्ति ठप्प हुँदा सदरमुकाम दुनैका सरकारी तथा गैर सरकारी कार्यालयको काममा समेत निकै समस्या आएको प्रमुख जिल्ला अधिकारी भुपेन्द्र थापाले बताए ।
दुनै बजार, माथिल्लो दुनै, तिप्ला, थाला, लोचा, जुफाल, रुम, मोतिपुर, डाँगीबाडा, सु जिउ गाँउका १ हजार २ सय बढी परिवार समेत अन्धकारमय बनेका छन् ।
विद्युत बन्द हुँदा एसईई परीक्षाको तयारीमा रहेका विद्यार्थी समेत समस्यामा परेका छन् ।
प्रकाशित : फाल्गुन ६, २०७५ १६:०९