स्वयंसेवक शिक्षकलाई अवकाश

०७५ सालमा गरिएको विद्यालय अनुगमन प्रतिवेदन, नगर शिक्षा नियमावली ०७४ को नियम १६ को उपनियम (१) अनुसार उनीहरू कार्यरत विद्यालय अर्कै विद्यालयमा गाभिएपछि उनीहरूको सेवा अवधि नथपिएको नगरपालिकाले जनाएको छ ।

चित्रिपाटन आधारभूतका जंगबहादुर शाही र नीमकुमारी मल्ल, भगवती आधारभूतकी कमला चन्द तथा हिमाली आधारभूतकी रोजिका कुसारीको सेवा अवधि नथप्ने निर्णय भएको छ । यसैगरी शितल आधारभूतकी जानकी ओली शाह, जनभावना आधारभूतका नवराज ओली, पिपलचौतारा आधारभूतकी लक्ष्मी शाह र विपना खडकाको सेवा अवधि पनि नगर कार्यपालिकाले नथप्ने निर्णय गरेको हो ।

विद्यालय अन्यत्रै गाभिएको कारण उनीहरूको सेवा अवधि थप नभएको शिक्षा, युवा तथा खेलकुद शाखा संयोजक थलवीर ओलीले बताए । ०७५ मा गरिएको विद्यालय अनुगमन प्रतिवेदन र अन्य कानुनको आधारमा विद्यालय मर्ज गरिएको संयोजक ओलीले बताए । उनका अनुसार मापदण्ड नपुगेपछि विद्यालय मर्ज गरिएको हो । नगरपालिकाले गत वर्ष उनीहरू सबैलाई परीक्षा गराएर करारमा नियुक्त गरेको थियो । विद्यालयको प्रगति राम्रो हुन नसकेको, अर्को विद्यालयको दूरी ३० मिनेटभन्दा कम रहेको कारण गाभिएको र शिक्षकलाई अवकाश दिइएको निमित्त प्रमुख प्रशासकीय अधिकृत रामबहादुर केसीले बताए ।

सोही कार्यपालिकाको बैठकले आठ विद्यालय गाभ्ने, एउटाको कक्षा घटाउने तथा एउटा संस्थागत विद्यालयको अनुमति खारेज गरेको छ । ब्राहमणगाउँस्थित चित्रिपाटन आधारभूत र गौरीचौरको हिमाली आधारभूतलाई पायक पर्ने विद्यालयमा गाभ्ने निर्णय भएको छ । नगरपालिकाका अनुसार जनभावना आधारभूतलाई नेपाल राष्ट्रिय मावि गत्तसैनामा, शितल आधारभूतलाई मावि गोइरी र जनचेतना आधारभूतलाई जनता मावि झिन्चौरमा गाभ्ने निर्णय भएको छ ।

त्यस्तै भगवती आधारभूतलाई कालिका मावि सुन्दरपानी, पिपलचौतारा आधारभूतलाई आधारभूत विद्यालय घाँटीगौंरा र बालहित आधारभूतलाई जनविकास मावि टाकुरामा गाभ्ने निर्णय भएको नगर कार्यपालिकाले जनाएको छ । बैठकले ४ नम्वर वडास्थित गोतामकोटस्थित सिर्जना बोर्डिङ स्कुलको सञ्चालन अनुमति खारेज पनि गरेको छ ।

योसँगै नगरपालिकामा विद्यालय संख्या घटेको छ । नगरमा ६३ विद्यालयमध्ये अब ५४ मात्र भएका छन् । नगरपालिकाको नीतिअनुसार काम गर्न नसक्नेलाई गाभ्ने नीति अनुसार मापदण्ड नपुगेका विद्यालय गाभिएको नगर प्रमुख गोर्खबहादुर केसीले बताए ।