आँखा उपचारमा स्वास्थ्य बिमा

नेपाल स्वास्थ्य बिमा बोर्डले मुसीकोट नगरपालिका १, सल्लेमा रहेको आँखा उपचार केन्द्रलाई सेवा प्रदायक स्वास्थ्य संस्थाका रुपमा अनुमति दिएपछि स्वास्थ्य बिमितले आँखाको जाँच तथा उपचार गराए बापतको शुल्क तिर्नुपरेको छैन ।

आँखासम्बन्धी कुनै पनि समस्या भएको स्वास्थ्य बिमित आँखा उपचार केन्द्र सल्ले आएपछि केन्द्रले स्वास्थ्य बिमाबाट भुक्तानी लिने गरी बिरामीको उपचार हुने गरेको केन्द्रका सहायक इन्चार्ज पहलसिंह ओलीले बताए । उनका अनुसार स्वास्थ्य बिमा बोर्डबीच सम्झौता भएपछि बिरामीले यस्तो सुविधा पाएका हुन् । ‘आँखा उपचार केन्द्रले स्वास्थ्य बिमा बोर्डबाट भुक्तानी लिन्छ,’ उनले भने, ‘स्वास्थ्य बिमा गरेका कसैले पनि यहाँको सेवा लिँदा पैसा तिर्नु पर्दैन ।’

केन्द्रबाट हालसम्म ५ सय ८० स्वास्थ्य बिमितले सेवा लिइसकेका छन् । नाम दर्ता, चेकजाँच, उपचार तथा चस्माबापत झन्डै ४ लाख बराबरको उपचार भइसकेको आँखा उपचार केन्द्रको भनाइ छ । केन्द्रले चस्मामा भने सीमा तोकेको छ । स्वास्थ्य बिमा गरेका बिरामीले १ हजार रुपैयाँसम्मको चस्मा लिएपछि शुल्क तिर्नुपर्दैन ।

सोभन्दा महँगो चस्मा लिन खोजेपछि भने थप पैसा आफैंले तिर्नुपर्छ । जिल्लामा उपचार हुन नसक्ने बिरामीलाई रिफर गर्ने व्यवस्थासमेत गरिएको सहायक इन्चार्ज ओलीले बताए । दाङको तुलसीपुर, काठमाडौंको तिलगंगालगायत अस्पतालमा रिफर गर्ने गरिएको छ । त्यहाँको उपचार पनि स्वास्थ्य बिमाको कार्डबाटै गरिने ओलीले बताए ।

२ हजार ५ सय तिरेर स्वास्थ्य बिमा गरेपछि स्वास्थ्य बिमा बोर्डसँग सम्झौता गरेका अस्पतालमा ५० हजारसम्मको उपचार निःशुल्क हुन्छ । जिल्लामा २०७४ चैत १ देखि स्वास्थ्य बिमा भर्न सुरु गरिएको थियो । हालसम्म १७ हजार २ सय ९६ महिला र १५ हजार ७ सय ५४ पुरुषले स्वास्थ्य बिमा गरेका केन्द्रको भनाइ छ ।

स्वास्थ्य बिमाका लागि जिल्लाका ७३ वडामा १/१ स्वयंसेवक परिचालन गरिएको छ । स्वास्थ्य बिमाले धेरैको उपचारमा सहज बनाइदिएको स्वास्थ्य बिमा बोर्डका जिल्ला संयोजक भरतबहादुर खड्काले बताए ।