रुकुम पश्चिममा ३ अर्ब प्रस्ताव

तीन नगर तथा तीन गाउँपालिकामध्ये सबैभन्दा बढी बजेट आठबीसकोट नगरपालिकाले प्रस्ताव गरेको छ । उसले आगामी आर्थिक वर्षका लागि ६८ करोड २२ लाख बजेट नगरसभामा पेश गरेको छ । उपप्रमुख गीता नेपालीले नगर सभामा चालुतर्फ २५ करोड ७१ लाख र पुँजीगततर्फ ४२ करोड ५० लाखको बजेट प्रस्ताव गरिन् ।

मुसीकोट नगरपालिकाले साढे ६१ करोड बजेट प्रस्ताव गरेको छ । उप प्रमुख प्रेमकुमारी सुनारले ६१ करोड २७ लाख ९६ हजारको बजेट प्रस्तुत गरेकी छिन् । नगरपालिकामा सबैभन्दा कम चौरजहारी नगरपालिकाले ४३ करोड ५३ लाखको बजेट ल्याएको छ । गाउँपालिकातर्फ सबैभन्दा बढी त्रिवेणि गाउँपालिकाले बजेट प्रस्ताव गरेको छ ।

प्रमुख प्रशासकीय अधिकृत दिपेन्द्र रावलले ४० करोडको हाराहारीमा बजेट प्रस्ताव गरिएको र यस उपर छलफल सुरु भएको बताए । सानीभेरी गाउँपालिकाले ३२ करोड ९० लाख १४ हजारको बजेट ल्याएको छ । जसमा चालुतर्फ ११ करोड ५९ लाख र पुँजीगततर्फ ७ करोड ६५ लाख रुपैयाँ छ ।

गाउँपालिकातर्फ बाँफिकोट गाउँपालिकाले सबैभन्दा कम २९ करोड ५४ लाख बजेट प्रस्ताव गरेको छ । चालुतर्फ ९ करोड ९२ लाख १९ हजार ३ सय ९० र पुँजीगततर्फ ६ करोड ३२ लाख तथा संघबाट प्राप्त ससर्त १३ करोड २४ लाख बजेट आउने विवरण समेतको बजेट उपाध्यक्ष मनकला पुनले पेस गरेकी हुन् । असार मसान्तभित्रै नीति कार्यक्रम तथा बजेट पास गर्ने तयारी स्थानीय तहले गरेका छन् ।